.jpg)
ផ្សារមូលបត្រកម្ពុជាប្រមូលទុនបានប្រមាណ $១៥១ លាន គិតត្រឹមឆ្នាំ ២០១៩។ ហេង ជីវ័ន
ភ្នំពេញៈ ប្រធានគណៈកម្មការមូលបត្រកម្ពុជា (SECC) បានឲ្យដឹងកាលពីថ្ងៃចន្ទ ថាផ្សារមូលបត្រកម្ពុជា (CSX) បានប្រមូលទុនប្រហែល ១៥១ លានដុល្លារ ពីការជួញដូរមូលបត្រ និងបណ្ណបំណុលសាជីវកម្មគិតត្រឹមឆ្នាំនេះ កើនឡើងច្រើនប្រហែល ២៦ ភាគរយ ធៀបនឹង ១២០ លានដុល្លារ គិតត្រឹមឆ្នាំ២០១៨។
លោក ស៊ូ សុជាតិ អគ្គនាយក SECC បានឲ្យដឹងថា តាំងពី CSX ប្រតិបត្តិការមក មានក្រុមហ៊ុនចុះបញ្ជី ៥ បានជួញដូរមូលបត្ររបស់ពួកគេ និងគ្រឹះស្ថានហិរញ្ញវត្ថុ ៣ បានចុះបញ្ជីបណ្ណបំណុលសាជីវកម្មនៅផ្សារគោលរបស់ CSX។
លោកថ្លែងថា៖ «រហូតមកដល់ពេលនេះ យើងមានផលិតផល ២ ប៉ុណ្ណោះគឺមូលបត្រ និងបណ្ណបំណុលសាជីវកម្មដែលកំពុងត្រូវបានជួញដូរនៅលើផ្សារមូលបត្រកម្ពុជាដោយប្រមូលមូលនិធិបានប្រហែល ១៥១ លានដុល្លារ។ សម្រាប់ឆ្នាំ ២០២០ យើងនឹងមានក្រុមហ៊ុនពីរបីទៀតចុះបញ្ជី និងជួញដូរមូលបត្ររបស់ពួកគេ និងក្រុមហ៊ុន ២-៣ ចុះបញ្ជីបណ្ណបំណុលសាជីវកម្ម»។
លោក ហុង សុខហួរ អគ្គនាយក CSX បានឲ្យដឹងថា ផ្សារហ៊ុនរបស់កម្ពុជាកំពុងរីកចម្រើនជាប្រចាំជាមួយនឹងការចុះបញ្ជីកាន់តែច្រើនឡើងៗ និងការកើនឡើងចំនួនក្រុមវិនិយោគិនកាន់តែសកម្ម «ទាំងគណៈកម្មការមូលបត្រកម្ពុជា និងផ្សារមូលបត្រកម្ពុជាកំពុងព្យាយាមទាក់ទាញក្រុមហ៊ុន និងក្រុមវិនិយោគិនកាន់តែច្រើន មកទីផ្សារនេះ ដើម្បីធ្វើឲ្យទីផ្សាររួមចំណែក កាន់តែច្រើនឡើងដល់សេដ្ឋកិច្ច»។
ទិន្នន័យ CSX បានចេញផ្សាយកាលពីដើមខែតុលាថា សន្ទស្សន៍របស់ CSX បានបង្ហាញកំណើនដ៏រឹងមាំនៅត្រីមាសទី ៣ ឆ្នាំនេះជាមួយនឹងមូលធនទីផ្សារកើនឡើងជាង ៤០ ភាគរយធៀបនឹងត្រីមាសទី ២ ដែលជាការកើនឡើងខ្ពស់បំផុតចាប់តាំងពីផ្សារហ៊ុននេះបានបើកដំណើរការកាលពីឆ្នាំ ២០១២។
ទិន្នន័យនេះបង្ហាញថា នៅត្រីមាសទី ៣ ឆ្នាំនេះមូលធនទីផ្សារបានឡើងដល់ ៨០០ លានដុល្លារ កើនឡើងពី ៥៧០ លានដុល្លារ ពីត្រីមាសទី ២។ សន្ទស្សន៍ CSX បានកើនដល់ ៨៦៩,១៦ ពិន្ទុ កាលពីចុងខែមុនដែលជាតួលេខខ្ពស់បំផុតនៅរយៈពេល ៦ ឆ្នាំចុងក្រោយនេះ។
ទិន្នន័យនេះបង្ហាញថា គណនីជួញដូរថ្មី ៧២៥ ត្រូវបានបើកនៅត្រីមាសទី ៣ ដែលធ្វើឲ្យចំនួនសរុបកើនឡើងដល់ ២២ ១៩៦។ ទំហំការជួញដូរជាមធ្យមក្នុង ១ ថ្ងៃនៅត្រីមាសទី ៣ មានចំនួន ២៧ ១២១ ដុល្លារ ឬ ១២ ៥៣៩ ភាគហ៊ុន។ ការជួញដូរដោយក្រុមវិនិយោគិនបុគ្គលមានចំនួនប្រហែល ៩៤ ភាគរយ។
ទិន្នន័យ CSX បង្ហាញថា តម្លៃភាគហ៊ុនរបស់ក្រុមហ៊ុន ៥ ដែលចុះបញ្ជីនៅលើផ្សារហ៊ុននេះបានបង្ហាញជាទូទៅនូវកំណើនដ៏រឹងមាំនៅចុងត្រីមាសទី ៣ ឆ្នាំនេះធៀបនឹងរយៈពេលដូចគ្នាកាលពីឆ្នាំមុន។
ទំហំជួញដូរកាលពីថ្ងៃចន្ទបានកើនឡើង ៤ ដងធៀបនឹងថ្ងៃសុក្រមុន កើនឡើងដល់ ១៨៦, ៨៧ លានរៀល។ ក្រុមហ៊ុនរួមចំណែកធំបំផុតគឺ កំពង់ផែក្រុងព្រះសីហនុ (PAS) ដែលមានចំណែក ៤៦,៧៨ ភាគរយ បន្ទាប់មករដ្ឋាករទឹក (PWSA) មានចំណែក ៣៣,២ ភាគរយ៕LA
