.jpg)
ពិធីចុះកិច្ចព្រមព្រៀងលើកិច្ចសហប្រតិបត្តិការរវាង ផ្សារមូលបត្រកម្ពុជា (CSX) និងធនាគារព្រីនស៍កាលពីថ្ងៃម្សិលមិញ។ រូប សហការី
ភ្នំពេញៈ ផ្សារមូលបត្រកម្ពុជា (CSX) និងធនាគារ ព្រីនស៍ បានចុះកិច្ចព្រមព្រៀងកិច្ចសហប្រតិបត្តិការ (MOC) សម្រាប់ការផ្ដល់កញ្ចប់ពិសេសដល់ក្រុមហ៊ុនចុះបញ្ជីនៅផ្សារហ៊ុនដែលអាចទទួលបានអត្រាកម្ចីកាន់តែប្រសើរ និងប្រាក់បញ្ញើថេរ។
ធនាគារ ព្រីនស៍ បានក្លាយជាធនាគារពាណិជ្ជកម្មទី ៣ សម្រាប់ការផ្ដល់កញ្ចប់ពិសេសដល់ក្រុមហ៊ុនចុះបញ្ជី បន្ទាប់ពីធនាគារកាណាឌីយ៉ា និងធនាគារអភិវឌ្ឍន៍ការវិនិយោគកម្ពុជា (BIDC) ដែលបានធ្វើចាប់តាំងពីខែមីនា ឆ្នាំមុន។
លោក ហុង សុខហួរ អគ្គនាយក CSX បានឲ្យដឹងថា កញ្ចប់ពិសេសដែលផ្ដល់ដោយធនាគារ ព្រីនស៍ ជាអត្ថប្រយោជន៍សម្រាប់ក្រុមហ៊ុនចុះបញ្ជីក្នុងចំណោមអត្ថប្រយោជន៍ផ្សេងទៀតដែលរដ្ឋាភិបាលបានផ្ដល់ដូចជាការលើកលែងពន្ធ ការកាត់បន្ថយពន្ធលើប្រាក់ចំណូល ៥០ ភាគរយក្នុងរយៈពេល ៣ ឆ្នាំជាដើម។
លោកថ្លែងថា៖ «ការលើកទឹកចិត្តបានបង្ហាញការបំពេញបន្ថែមដ៏ល្អមួយរវាងវិស័យមូលបត្រ និងវិស័យធនាគារនេះក៏បង្ហាញតម្លាភាព និងប្រតិបត្តិការអាជីវកម្មដ៏រឹងមាំរបស់ក្រុមហ៊ុនចុះបញ្ជីនៅ CSX ដែលធ្វើឲ្យធនាគារនេះផ្ដល់កម្ចីកាន់តែប្រសើរជាងក្រុមហ៊ុនធម្មតាដែលមិនបានចុះបញ្ជី»។
លោកបន្តថា៖ «លើសពីនេះទៅទៀត CSX នឹងស្វែងរកការលើកទឹកចិត្តពីរដ្ឋាភិបាល និងវិស័យឯកជនសម្រាប់ក្រុមហ៊ុនចុះបញ្ជី។ CSX ក៏រីករាយក្នុងការផ្ដល់ការពិគ្រោះយោបល់ដោយសេរីដល់ក្រុមហ៊ុនដែលមានចំណាប់អារម្មណ៍ក្នុងការបោះផ្សាយមូលបត្រសាធារណៈលើកដំបូងផងដែរ ដូច្នេះពួកគេអាចធ្វើដំណើរការកាន់តែលឿន និងកាត់បន្ថយការចំណាយ»។
លោកបន្ថែមថា៖ «ក្រុមហ៊ុនចុះបញ្ជីដែលមានចំណាប់អារម្មណ៍ក្នុងការផ្ដល់ជូននេះពួកគេអាចទាក់ទង CSX ឬធនាគារ Prince Bank ដើម្បីទទួលបានព័ត៌មានលម្អិត»។
លោក ហ៊ន សុរចនា ប្រធាននាយកប្រតិបត្តិធនាគារព្រីនស៍បានឲ្យដឹងថា អនុស្សរណៈយោគយល់គ្នាគឺជាផ្នែកមួយនៃការអភិវឌ្ឍទីផ្សារមូលធនតាមរយៈការផ្ដល់ការលើកទឹកចិត្តដល់ក្រុមហ៊ុនចុះបញ្ជី និងបុគ្គលិករបស់ពួកគេ។ លោកថ្លែងថា៖ «ខ្ញុំសង្ឃឹមថា ក្រុមហ៊ុនទាំងនោះនឹងស្វែងរកភាពកាន់តែងាយស្រួលដើម្បីទទួលបានកម្ចីសម្រាប់ប្រតិបត្តិការរបស់ពួកគេ ជាមួយនឹងលក្ខខណ្ឌកាន់តែប្រសើរ សម្រាប់កំណើនអាជីវកម្មរបស់ពួកគេ»។
លោក សុខហួរ ឲ្យដឹងថា បន្ទាប់ពីប្រតិបត្តិការរបស់ CSX រយៈពេលជិត ៧ ឆ្នាំ មកចំនួនក្រុមវិនិយោគិនបានកើនឡើងដល់ ២២ ០០០ នាក់ ខណៈក្រុមហ៊ុននឹងត្រូវចុះបញ្ជីមូលបត្ររបស់ពួកគេ និងមូលបត្របំណុលនៅលើ CSX ហើយយើងរំពឹងថា នៅឆ្នាំនេះយើងនឹងទទួលបានការកើនឡើង ២ ដងនៃការចុះបញ្ជីក្រុមហ៊ុនធៀបនឹងឆ្នាំ ២០១៩»។
កាលពីឆ្នាំ ២០១៩ មូលធននីយកម្មទីផ្សារបានកើនឡើង ១៥៧ ភាគរយ ដល់ ៨០០,៣៩ លានដុល្លារ។ បច្ចុប្បន្នមានក្រុមហ៊ុន ៥ ចេញភាគហ៊ុន និងក្រុមហ៊ុន ៣ ចេញបណ្ណបំណុលដែលប្រមូលមូលនិធិសរុបបានរហូតដល់ ១៥១ លានដុល្លារ នៅផ្សារមូលធន៕LA
