ភ្នំពេញៈ ផ្សាររាត្រីកុងតឺន័រ (Jet’s Container Night Market) ដ៏ល្បីនៅកណ្តាលទីក្រុងភ្នំពេញទីបំផុតត្រូវបានបិទជាស្ថាពរហើយ ខណៈតំណាងក្រុមហ៊ុនវិនិយោគអះអាងថា ដោយសារតម្លៃជួលដីកើនឡើងខ្ពស់ និងមានបញ្ហាមួយចំនួន។
ផ្សាររាត្រីកុងតឺន័រ ដែលមានទីតាំងក្បែរស្ថានទូតរុស្ស៊ីត្រូវបានរើចេញស្ទើរអស់ទៅហើយគិតមកដល់ពេលនេះ។
Jet’s Container Night Market គឺជាផ្សាររាត្រីកុងតឺន័រធំជាងគេក្នុងរាជធានីភ្នំពេញ ដែលបានបើកដំណើរការកាលពីជាង ២ ឆ្នាំមុន ដោយមានហាងលក់ម្ហូបអាហារ ភេសជ្ជៈ និងវត្ថុអនុស្សាវរីយ៍ ចន្លោះពី ២០០-៣០០ ហាងតូប។
លោក ឆាយ សុភ័ណ្ឌ ប្រធានគ្រប់គ្រងគម្រោងរបស់ផ្សាររាត្រី កុងតឺន័រ Jet’s Container Night Market បាននិយាយថា ដោយសារតែកិច្ចសន្យាជួលដីត្រូវអស់ ស្របពេលម្ចាស់ដីដំឡើងថ្លៃ និងមានបញ្ហាក្នុងការសុំច្បាប់មួយចំនួននោះ ក្រុមហ៊ុនក៏បានសម្រេចបិទតែម្តង។
លោកថ្លែងថា៖ «តម្លៃជួលដី អាចនិយាយថា ជាហេតុផលចម្បង ដែលមិនអាចអនុញ្ញាតឲ្យក្រុមហ៊ុនបន្តដំណើរការបានតទៅទៀត»។
ទោះបីយ៉ាងនេះក្តីមុនពេលបិទ គេសង្កេតឃើញថា សកម្មភាពអាជីវកម្មហាងលក់រាយនៅទីនោះបានបិទទ្វារបណ្តើរៗតាំងពីប៉ុន្មានខែមកម៉្លេះ ខណៈហាងដែលនៅដំណើរការពុំមានអតិថិជន។
ក្នុងរយៈពេលប៉ុន្មានថ្ងៃចុងក្រោយនេះ គេឃើញមានក្រុមកម្មករ រថយន្តដឹកទំនិញ និងរថយន្តស្ទូចកំពុងធ្វើការរុះរើទីតាំងខាងលើយ៉ាងសកម្ម។
លោក សុភ័ណ្ឌ បានបន្តថា៖ «ក្រុមហ៊ុនកំពុងរុះរើសម្ភារ ដែលមានក្នុងទីតាំងខាងលើ យកទៅទុកនៅតំបន់វិហារសួគ៌ដែលជាទីតាំងផ្ទាល់របស់ក្រុមហ៊ុន ខណៈក្រុមហ៊ុនមានផែនការអភិវឌ្ឍតំបន់វិហារសួគ៌ឲ្យក្លាយទៅជាមជ្ឈមណ្ឌលពាណិជ្ជកម្ម និងកន្លែងរស់នៅដ៏ល្អប្រកបដោយប្រណីតភាពបំផុត»។
បុគ្គលិកផ្នែកសន្តិសុខម្នាក់ ដែលប្រចាំការនៅទីតាំងផ្សារ Jet’s Container Night Market បានឲ្យដឹងថា អាជីវករដែលជួលទីតាំងខាងលើបានរើសម្ភាររបស់ខ្លួនចេញប្រហែលជិត ១ ខែមកហើយ បន្ទាប់ពីក្រុមហ៊ុនជូនដំណឹងពីការបិទ។
លោក លី រតនៈអ្នកគ្រប់គ្រងហាង Beer Market បានប្រាប់ថា លោកបានជួលទីតាំងនេះ ក្នុងកិច្ចសន្យារយៈពេល ១ ឆ្នាំ ប៉ុន្តែបន្ទាប់ពីចំណាយពេលរៀបចំហាង និងបើកលក់បាន ៦-៧ ខែ ក្រុមហ៊ុនក៏បានជូនដំណឹងពីការបិទតែម្តង។
នៅមុនជួលទីតាំងខាងលើ ក្រុមហ៊ុនប្រាប់លោកថា ក្រុមហ៊ុនបានបន្តកិច្ចសន្យាជួលដីជាមួយម្ចាស់ដីរួចរាល់ហើយ។
លោកថ្លែងថា៖«ហេតុផលចម្បងដែលក្រុមហ៊ុនប្រាប់ពីការបិទផ្សារ គឺមានការប្តឹងពីស្ថានទូតរុស្ស៊ី ពីសំឡេងរំខាន។ ការបិទនេះ ធ្វើឲ្យខ្ញុំខាតប្រាក់ជាច្រើន»។
លោក រតនៈ បានលើកឡើងថា កាលពីពេលថ្មីៗនេះលោកឮព័ត៌មានថា ទីតាំងនេះនឹងត្រូវយកទៅអភិវឌ្ឍជាអគារលក់ទំនិញវិញក្នុងពេលឆាប់ៗ។
ប្រភពព័ត៌មានមួយបានឲ្យដឹងថា ទីតាំងផ្សាររាត្រីកុងតឺន័រ Jet’s Container Night Market មានទំហំជិត ២ ហិកតា ជាកម្មសិទ្ធិរបស់ក្រុមហ៊ុនរ៉ូយ៉ាល់គ្រុប របស់លោក គិត ម៉េង ហើយត្រូវបានក្រុមហ៊ុន Jet Group របស់លោក ស្រី ចាន់ថន ជួលយកមកបើកជាផ្សាររាត្រី Jet’s Container Night Market។
របាយការណ៍ស្រាវជ្រាវតម្លៃអចលនទ្រព្យក្នុងរាជធានីភ្នំពេញ ប្រចាំឆមាសទី ១ របស់ក្រុមហ៊ុនអចលនទ្រព្យ ឃី រៀលអុីស្ទេត បានឲ្យដឹងថា តម្លៃអចលនទ្រព្យក្នុងទីតាំងខាងលើមានតម្លៃចន្លោះពី ៣,៥០០ ដុល្លារទៅដល់ ៦,០០០ ដុល្លារក្នុង ១ ម៉ែត្រការ៉េ៕LA