.jpg)
ភ្នំពេញៈ ផ្សារមូលបត្រកម្ពុជា (CSX) កាលពីថ្ងៃម្សិលមិញបានដាក់ឲ្យដំណើរការសាកល្បងនូវប្រព័ន្ធជួញដូរចល័ត (MTS) តាមអនឡាញដែលអនុញ្ញាតឲ្យក្រុមវិនិយោគិន ជួញដូរមូលបត្រដែលចុះបញ្ជីនៅផ្សារហ៊ុនដោយប្រើប្រាស់ស្មាតហ្វូន និងឧបករណ៍ចល័តផ្សេងទៀត។
លោក Jong Weon Ha អគ្គនាយករងក្រុមហ៊ុនផ្សារមូលបត្រកម្ពុជាកាលពីថ្ងៃម្សិលមិញបាននិយាយថា ប្រព័ន្ធជួញដូរចល័ត (MTS) នេះនឹងជួយធ្វើឲ្យចំនួននៃការជួញដូរមូលបត្រនៅកម្ពុជាមានចំនួនកាន់តែច្រើនមានសុវត្ថិភាព និងមានភាពឆាប់រហ័ស។
ប្រព័ន្ធជួញដូរនេះនឹងដាក់ឲ្យដំណើរការផ្លូវការនៅថ្ងៃទី ២៥ ខែមិថុនាហើយដើម្បីប្រើប្រាស់ប្រព័ន្ធនេះវិនិយោគិនត្រូវមានគណនីជួញដូរនៅក្រុមហ៊ុនមូលបត្រណាមួយដែលជាសមាជិករបស់ CSX និងបានចុះឈ្មោះជាមួយផ្សារហ៊ុនកម្ពុជា។
ប្រព័ន្ធជួញដូរចល័ត គឺជាប្រព័ន្ធជួញដូរតាមអ៊ីនធឺណិតដែលត្រូវបានអភិវឌ្ឍឡើងក្រោមការជួយគាំទ្រពីសំណាក់ភ្នាក់ងារសហប្រតិបត្តិការ អន្តរជាតិកូរ៉េ ដោយដំណើរការនៅលើ web browser ដែលមានស្រាប់នៅលើស្មាតហ្វូន និងថេប្ល៊ិត។ ប្រព័ន្ធនេះនឹងអនុញ្ញាតឲ្យវិនិយោគិនដាក់ការបញ្ជាជួញដូរ កែប្រែ និងលុបចោលការបញ្ជារបស់ខ្លួនបានដោយខ្លួនឯង។
គិតត្រឹមដំណាច់ឆ្នាំ ២០១៧ វិនិយោគិនដែលបានចុះឈ្មោះនៅគណៈកម្មការមូលបត្រកម្ពុជាមានចំនួនប្រមាណ ៩២០០ នាក់។ ជាមធ្យមក្នុង ១ ថ្ងៃមានប្រតិបត្តិការប្រហែល ១៥ ០០០ និងមានតម្លៃប្រហែល ១៥ ០០០ ដុល្លារក្នុងចំណោមក្រុមហ៊ុនទាំង ៥ ដែលមានចុះបញ្ជីក្នុងផ្សារមូលបត្រកម្ពុជា។ នេះបើ តាម CSX៕LA
