The Phnom Penh Post Search

Search form




Logo of Phnom Penh Post newspaper Phnom Penh Post - ផ្សារហ៊ុន​របស់​អាស៊ី​ មាន​លទ្ធផល​ចម្រុះ

ផ្សារហ៊ុន​របស់​អាស៊ី​ មាន​លទ្ធផល​ចម្រុះ

Content image - Phnom Penh Post
អេក្រង់​បង្ហាញ​តម្លៃ​ភាគហ៊ុន​របស់​ផ្សារហ៊ុន​ក្រុង​តូក្យូ​។ រូបថត AFP

ផ្សារហ៊ុន​របស់​អាស៊ី​ មាន​លទ្ធផល​ចម្រុះ

ក្រុងហុងកុងៈ ទីផ្សារ​ភាគហ៊ុន​អាស៊ី​មាន​លទ្ធផល​ចម្រុះ​កាលពី​ថ្ងៃ​ចន្ទ ខណៈ​ដែល​ចំណាប់​អារម្មណ៍​របស់​វិនិយោគិន​បាន​ងាក​ចេញពី​តំបន់​មជ្ឈិមបូព៌ា​ទៅកាន់​ចក្ខុវិស័យ​សេដ្ឋកិច្ចពិភពលោក និង​ការចុះហត្ថលេខា​លើ​កិច្ចព្រមព្រៀង​ពាណិជ្ជកម្ម​ដែល​គ្រោង​ធ្វើឡើង​នៅ​សប្តាហ៍​នេះ​រវាង​អាមេរិក និង​ប្រទេស​ ចិន​។

សន្ទស្សន៍ហ៊ុន​របស់​ផ្សារហ៊ុន​ធំ​ទាំង​ ៣ ​របស់​សហរដ្ឋអាមេរិក​បានបញ្ចប់​នៅ​ដែន​អវិជ្ជមាន​បន្ទាប់​បាន​កើនឡើង​ដល់​កម្រិត​ខ្ពស់​ថ្មី ហើយ​ការលក់​ភាគហ៊ុន​ចេញ​ដើម្បី​ប្រាក់ចំណេញ​ក៏​ដើរតួនាទី​សំខាន់​ផងដែរ​នៅក្នុង​ការធ្លាក់ចុះ​នេះ​។

ទោះបីជា​យ៉ាងណា​ក្រុមអ្នកវិភាគ​បាន​ចង្អុល​បង្ហាញ​ថា បើទោះ​ជា​ទិន្នន័យ​ស្តីពី​ការងារ​នៅ​អាមេរិក​ខុស​ការ​ព្យាករ​ក្តី វា​ពិតជា​បាន​បង្ហាញថា ធនាគារកណ្តាល​អាមេរិក​នឹង​ទំនង​ជា​រក្សា​អត្រា​ការប្រាក់​នៅ​កម្រិត​ទាប​សម្រាប់​រយៈពេល​ខាងមុខ ដោយ​អ្នកវិភាគ​មួយចំនួន​បានលើក​ឡើង​ថា វិធានការ​លើក​ក្រោយ​អាច​នឹង​មាន​ការទម្លាក់​អត្រា​ការប្រាក់​។

នៅក្នុង​ការជួញដូរ​នៅពេល​ព្រឹក សន្ទស្សន៍ហ៊ុន​របស់​ផ្សារហ៊ុន​ក្រុង​ហុងកុង​បាន​កើនឡើង ០,២​ ភាគរយ សន្ទស្សន៍ហ៊ុន​របស់​ផ្សារហ៊ុន​សិង្ហបុរី​កើនឡើង ០,១ ​ភាគរយ សន្ទស្សន៍ហ៊ុន​របស់​ផ្សារហ៊ុន​ក្រុង​សេអ៊ូល​បាន​កើនឡើង ០,៦ ភាគរយ ហើយ​សន្ទស្សន៍ហ៊ុន​របស់​ផ្សារហ៊ុន​ក្រុង​ហ្សាការតា​បាន​កើនឡើង ០,២ ​ភាគរយ​។

សន្ទស្សន៍ហ៊ុន​របស់​ផ្សារហ៊ុន​ក្រុង​តៃប៉ិ​បាន​កើនឡើង​ ០,៤ ​ភាគរយ​ បន្ទាប់ពី​លោកស្រី Tsai Ingwen បាន​ឈ្នះ​ការបោះឆ្នោត​ប្រធានាធិបតី​ភ្លូកទឹកភ្លូកដី​កាលពី​ចុង​សប្តាហ៍​មុន​សម្រាប់​អាណត្តិ​ទី​ ២ របស់​លោកស្រី​ដោយ​វិនិយោគិន​សាទរ​ចំពោះ ការ​ជម្រុះ​ចោល​ភាពមិនប្រាកដប្រជា​ដែល​បង្កឡើង​ដោយសារ​ការបោះឆ្នោត​។

ក្នុងចំណោម​ផ្សារហ៊ុន​ផ្សេងទៀត សន្ទស្សន៍ហ៊ុន​របស់​ផ្សារហ៊ុន​ក្រុង​ស៊ាងហៃ​បាន​ធ្លាក់ចុះ ០,៤ ភាគរយ សន្ទស្សន៍ហ៊ុន​របស់​ផ្សារហ៊ុន​ក្រុង​ស៊ីដនី​បាន​ធ្លាក់ចុះ ០,៦ ​ភាគរយ ហើយ​សន្ទស្សន៍ហ៊ុន​របស់​ផ្សារហ៊ុន​ក្រុង​វែលីងតោន​បាន​ធ្លាក់ចុះ ០,២ ​ភាគរយ​។ សន្ទស្សន៍​ហ៊ុន​របស់​ផ្សារហ៊ុន​ក្រុង​តូក្យូ​បាន​បិទទ្វារ​ដោយសារ​ថ្ងៃ​ឈប់សម្រាក​៕ KC

អត្ថបទគួរចាប់អារម្មណ៍