ក្រុងហុងកុងៈ ផ្សារហ៊ុនអាស៊ីបានធ្លាក់ចុះជាថ្មីកាលពីថ្ងៃអង្គារដែលបន្តលក់ចេញភាគហ៊ុននៅទូទាំងពិភពលោក ខណៈដែលចំនួនអ្នកស្លាប់ដោយសារតែការរីករាលដាលយ៉ាងរហ័សនៃវីរុសក្នុងប្រទេសចិនបានកើនឡើងដល់ជាង ១០០ នាក់ និងរាប់ពាន់នាក់ឆ្លងជំងឺស្របពេលដែលក្រុមវិនិយោគិនបារម្ភពីផលប៉ះពាល់លើសេដ្ឋកិច្ចពិភពលោកដែលចុះខ្សោយរួចទៅហើយនោះ។
ពាណិជ្ជករកំពុងគេចចេញយ៉ាងរហ័ស ខណៈដែលកូរ៉ូណាវីរុសត្រូវបានរាយការណ៍ថា បានកើតមានក្នុងប្រទេសជាច្រើនស្របពេលដែលប្រេងក៏ធ្លាក់ថ្លៃផងដែរដោយសារការរំពឹងថាតម្រូវការនៅចិនដែលជាប្រទេសប្រើប្រាស់ប្រេងឈានមុខគេរបស់ពិភពលោកនឹងត្រូវបានរងប៉ះពាល់។
ក្រុមអ្នកវិភាគបានឲ្យដឹងថា មានការបារម្ភកាន់តែខ្លាំងឡើងថា វិបត្តិនេះអាចអាក្រក់ដូចការផ្ទុះជំងឺ SARS ដែលបានដាក់សម្ពាធលើទីផ្សារ និងសេដ្ឋកិច្ចពិភពលោកកាលពី ១៧ ឆ្នាំមុន។
សន្ទស្សន៍ «ភ័យខ្លាច» VIX ដែលវាស់វែងការប្រែប្រួលទីផ្សារបានកើនឡើង ១ ភាគ ៤ កាលពីថ្ងៃចន្ទដល់កម្រិតខ្ពស់បំផុតរបស់ខ្លួនគិតចាប់តាំងពីខែតុលាជាពេលដែលក្រុមវិនិយោគិនមានការបារម្ភអំពីការចរចាពាណិជ្ជកម្មរវាងប្រទេសចិន និងអាមេរិក។
វិបត្តិនេះកើតឡើង ខណៈសេដ្ឋកិច្ចពិភពលោកកំពុងបង្ហាញសញ្ញាស្ថិរភាព បន្ទាប់ពីការថមថយល្បឿនកំណើនរយៈពេលយូរ។
លោក Stephen Innes បម្រើការនៅក្រុមហ៊ុន AxiCorp បានថ្លែងថា៖ «ដោយសារថាប្រទេសចិនបានបង្កើនតួនាទីរបស់ខ្លួនយ៉ាងឆាប់រហ័សក្នុងចង្វាក់ផ្គត់ផ្គង់ពិភពលោកនោះ ទីផ្សារនេះបន្តជួបប្រទះករណីអាក្រក់បំផុត ដែលជាសេណារីយោកំណើនសេដ្ឋកិច្ចអវិជ្ជមាន»។
លោកថ្លែងថា៖ «សម្រាប់ផ្នែកច្រើនបំផុត ពាណិជ្ជករកំពុងធ្វើរឿងដោយងងឹតងងល់ដែលមិនដឹងអ្វីសោះអំពីភាពជំពាក់ជំពិនជាក់ស្ដែងរបស់ (វីរុសនេះ) សម្រាប់កំណើនសេដ្ឋកិច្ចពិភពលោក»។ លោកបន្ថែមថា៖ «នៅតែមានការគិតកាន់តែខ្លាំងនៅក្នុងទីផ្សារនេះថា កម្រិតការឆ្លងអាចកាន់តែអាក្រក់មុនពេលមានភាពប្រសើរឡើងវិញ»។
នៅក្នុងការជួញដូរពេលព្រឹក សន្ទស្សន៍ផ្សារហ៊ុនក្រុងសេអ៊ូលបានធ្លាក់ចុះជាង ៣ ភាគរយ និងសន្ទស្សន៍ផ្សារហ៊ុនក្រុងសិង្ហបុរីបានធ្លាក់ចុះជាង ២ ភាគរយ ខណៈដែលសន្ទស្សន៍ផ្សារហ៊ុនក្រុងស៊ីដនីបានធ្លាក់ចុះ ១,៤ ភាគរយ ខណៈដែលក្រុមវិនិយោគិននៅក្នុងទីផ្សារទាំងនោះបានវិលត្រឡប់មកពីការឈប់សម្រាករយៈពេលវែងរបស់ពួកគេ។
សន្ទស្សន៍ផ្សារហ៊ុនក្រុងម៉ានីលបានធ្លាក់ចុះជាង ១ ភាគរយ ខណៈដែលសន្ទស្សន៍ផ្សារហ៊ុនក្រុងវែលីងតោនបានធ្លាក់ចុះ ០,៩ ភាគរយ ហើយសន្ទស្សន៍ផ្សារហ៊ុនក្រុងតូក្យូបានធ្លាក់ចុះ ០,៩ ភាគរយ។
ការខាតបង់បានកើតមានបន្ទាប់ពីមានការលក់ចេញដ៏ច្រើននៅផ្សារហ៊ុននៅអឺរ៉ុប និងនៅក្រុងញូវយ៉ក។
លោក Alec Young បម្រើការងារនៅក្រុមហ៊ុន FTSE Russell មានប្រសាសន៍ថា៖ «នៅពេលនេះ នេះគឺជាការលក់ចេញសិន ហើយចាំសាកសួរអំពីស្ថានភាពនៅពេលក្រោយ»។ លោកបន្តថា៖ «ទីផ្សារមិនចូលចិត្តភាពមិនពិតប្រាកដ ហើយកូរ៉ូណាវីរុស គឺជាភាពមិនពិតប្រាកដចុងក្រោយ។ មិនមាននរណាម្នាក់ដឹងថា តើវានឹងប៉ះពាល់ដល់សេដ្ឋកិច្ចពិភពលោកខ្លាំងកម្រិតណានោះទេ»៕ LA