ក្រុមហ៊ុន Smile Shop App ដែលជាផ្សារទំនើបអនឡាញឈានមុខគេមួយនៅកម្ពុជាបានចុះអនុស្សរណៈយោគយល់គ្នា (MoU) ជាមួយក្រសួងពាណិជ្ជកម្ម ក្នុងការផ្តល់ជូននូវកញ្ចប់ម្ហូបអាហារ គ្រឿងទេស ត្រីសាច់ស្រស់ៗដឹកជូនអតិថិជនបានទាំងតំបន់ ក្រហម លឿងទុំ និងលឿងដល់ទីកន្លែងនៅក្នុងតំបន់ដែលបានកំណត់។
ការចុះ MoU នេះត្រូវបានធ្វើឡើងតាមរយៈវីដេអូដែលចុះហត្ថលេខារវាងតំណាងក្រសួងពាណិជ្ជកម្ម និង លោក Jack Lee ពាណិជ្ជករជនជាតិចិន ជាសហស្ថាបនិក និងជាអគ្គនាយកក្រុមហ៊ុន Smile Shop កាលពីរសៀលថ្ងៃសៅរ៍ទី ១ ខែឧសភា។
លោក Jack Lee បានស្ងើចសរសើរដល់ការខិតខំប្រឹងប្រែងរបស់រាជរដ្ឋាភិបាលដែលដឹកនាំដោយសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានចំណាយអស់ទាំងកម្លាំងកាយចិត្ត និងប្រាជ្ញាក្នុងការនាំមកនូវសុខសន្តិភាព ការអភិវឌ្ឍដល់សង្គមកម្ពុជារហូតមកដល់សព្វថ្ងៃនេះ។
លោក Jack Lee ក៏បានថ្លែងអំណរគុណដល់ថ្នាក់ដឹកនាំក្រសួងពាណិជ្ជកម្មដែលបានផ្តល់នូវកិច្ចសហការ ការផ្តល់នូវអនុសាសន៍ល្អៗ និងការគាំទ្រយ៉ាងពេញលេញដល់ក្រុមហ៊ុន Smile Shop ឲ្យបានចូលរួមសកម្មភាពជាមួយក្រសួងក្នុងអំឡុងពេលបិទខ្ទប់នេះ។
លោកបានថ្លែងយ៉ាងដូច្នេះថា៖ «តាមរយៈការចុះអនុស្សរណៈយោគយល់គ្នានេះនឹងបើកលទ្ធភាពបន្ថែមទៀតដល់ផ្សារអនឡាញ Smile Shop ចូលរួមដោះស្រាយស្ថានភាពលំបាកដែលបងប្អូនប្រជាជនយើងកំពុងតែជាប់នៅក្នុងតំបន់ក្រហម និងតំបន់លឿងទុំ។ ក្រុមហ៊ុន Smile Shop និងផ្តល់ជូននូវកញ្ចប់ម្ហូបអាហារ គ្រឿងទេស ត្រីសាច់ស្រស់ៗដឹកជូនអ្នកបានទាំងតំបន់ក្រហម លឿងទុំ និងលឿងដោយដឹកជញ្ជូនម្ហូបអាហារទាំងនោះទីដល់ទីកន្លែងនៅក្នុងតំបន់ដែលបានកំណត់»។
«យើងសង្ឃឹមជឿជាក់យ៉ាងមុតមាំថា ផ្សារអនឡាញ Smile Shop នឹងចូលរួមចំណែកជាមួយរាជរដ្ឋាភិបាលក្នុងការផ្គត់ផ្គង់ស្បៀងអាហារដល់បងប្អូនក្នុងតំបន់បិទខ្ទប់ឲ្យបានគ្រប់គ្រាន់ និងធានានូវហានិភ័យឆ្លងនូវជំងឺផ្សេងៗ ជាពិសេសគឺចូលរួមក្នុងការទប់ស្កាត់ការរីករាលដាលនៃជំងឺកូវីដ១៩ ដែលរាល់អតិថិជនទាំងអស់ធ្វើការទូទាត់ដោយមិនប្រើសាច់ប្រាក់ឡើយ (Cashless payment)»។ នេះបើយោងតាមការថ្លែងអះអាងរបស់លោក Lee។
កាលពីថ្ងៃទី ២៦ ខែមេសា ក្រសួងពាណិជ្ជកម្មក៏បានចុះ MoU ជាមួយផ្សារទំនើប Aeon Mall ផ្សារទំនើប Makro និងក្រុមហ៊ុន វីរៈ ប៊ុនថាំ អេចប្រេស ដើម្បីបញ្ចេញទំនិញឧបភោគបរិភោគចាំបាច់លក់នៅតំបន់បិទខ្ទប់ (តំបន់ក្រហម) ដើម្បីរក្សាតម្លៃទំនិញ និងស្ថិរភាពនៃការផ្គត់ផ្គង់ទំនិញនៅលើទីផ្សារក្នុងអំឡុងពេលបិទខ្ទប់ក្រុងភ្នំពេញ និងក្រុងតាខ្មៅ (ខេត្តកណ្តាល)។
ការចូលរួមពីវិស័យឯកជននេះ ត្រូវបានធ្វើឡើងស្របពេលក្រសួងពាណិជ្ជកម្មបានដាក់ឲ្យដំណើរការទីផ្សាអនឡាញ (shop.moc.gov.kh) កាលពីថ្ងៃទី ២១ មេសាកន្លងមក។
ទិន្នន័យដែលភ្នំពេញប៉ុស្តិ៍ទទួលបានបង្ហាញថា ចាប់ពីថ្ងៃទី ២១ ដល់ថ្ងៃទី ២៩ ខែមេសា ឆ្នាំ ២០២១ សកម្មភាពនៃការដាក់ស្តង់លក់ស្បៀងរបស់ក្រសួងពាណិជ្ជកម្មនៅតំបន់ក្រហម និងលឿងទុំ សម្រេចបានអង្ករ ចំនួន ៣ ៣៣១ បាវ មី(ជាតិ) ចំនួន ៩ ៦៦៥ កេះ ត្រីខ ៥៥២៤ យួរ ទឹកត្រី ចំនួន ២ ៨៥៣ យួរ ទឹកស៊ីអីវ ចំនួន ២ ៨២៣ យួរ ទឹកសុទ្ធ ២៩២ កេះ ព្រមទាំងផលិតផលមួយចំនួនទៀតដូចជា ប្រេងខ្យង និងឆៃពៅ ជាដើម។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានប្រាប់ភ្នំពេញប៉ុស្តិ៍នៅថ្ងៃទី ៣០ ខែមេសានេះថាគ្រឿងឧបភោគបរិភោគដែលរដ្ឋាភិបាលប្រគល់សិទ្ធិឱ្យក្រសួងពាណិជ្ជកម្មដាក់លក់នៅតំបន់បិទខ្ទប់ក្នុងរាជធានីភ្នំពេញនៅពេលនេះ គឺមានតម្លៃទាបជាងទីផ្សារ។ ការដាក់លក់នេះ គឺប្រជាជនអាចមកទិញផ្ទាល់ ឬតាមការបញ្ជាទិញតាមអនឡាញ ដោយក្រសួងក៏មានសេវាដឹកជញ្ជូនទៅដល់លំនៅឋានរបស់ប្រជាពលរដ្ឋក្នុងតំបន់ក្រហមផងដែរ។
បើយោងតាមលោក Lee ក្រុមហ៊ុន Smile Shop បានត្រៀមរួចជាស្រេចក្នុងការផ្តល់នូវទីផ្សារ អនឡាញ យ៉ាងទូលំទូលាយដល់ប្រជាកសិករ ដើម្បីដាក់លក់ផលិតផលក្នុងស្រុកនៅលើទីផ្សារអេឡិចត្រូនិក (E-Commerce) ដើម្បីបង្កើនការប្រើប្រាស់កាន់តែខ្លាំងទាំងនៅក្នុងស្រុក និងទីផ្សារនៅក្នុងបណ្តាប្រទេសផ្សេងៗទៀត ជាពិសេសនោះគឺទីផ្សារប្រទេសចិន៕