ភ្នំពេញ: ស្ត្រីខ្មែរ ២ រូប ដែលបង្កើតកម្មវិធីទីផ្សារអេឡិចត្រូនិកថ្មីមួយ «WeMall» ដែលបច្ចុប្បន្នមានផលិតផលជាង ៦០០ ប្រភេទដាក់លក់ និងទើបនឹងឈានជើងចូលទីផ្សារអេឡិចត្រូនិកដែលកំពុងរីកចម្រើនរបស់កម្ពុជាបានប្តេជ្ញាលើកស្ទួយ ផលិតផលក្នុងស្រុក។
WeMall ត្រូវបានបង្កើតឡើងដោយស្ត្រីខ្មែរ ២ រូបគឺកញ្ញា ទូច សុជាតិតា និងអ្នកស្រី ហ៊ាង អូមួយ ដែលបានប្រកាសដាក់ឲ្យដំណើរការជាផ្លូវការកាលពីថ្ងៃទី ១ ខែ សីហា ឆ្នាំ ២០២០។
កញ្ញា ទូច សុជាតិតា សហស្ថាបនិក WeMall ប្រាប់ភ្នំពេញ ប៉ុស្តិ៍កាលពីថ្ងៃព្រហស្បតិ៍ថា ការបង្កើតទីផ្សារអេឡិចត្រូនិកក្នុងគោលបំណងដើម្បីលើកស្ទួយផលិតផលក្នុងស្រុកដើម្បីផ្សព្វផ្សាយទៅកាន់ទីផ្សារអន្តរជាតិពិសេសជំរុញការលើកកម្ពស់ផលិតផលដែលផលិតដោយស្ត្រីខ្មែរ។
កញ្ញាថ្លែងថា៖ «សព្វថ្ងៃយើងចង់ធ្វើយ៉ាងណាឲ្យផលិតផលក្នុងស្រុករបស់យើងមានទីផ្សារល្អ ដូច្នេះការដាក់លក់ផលិតផលក្នុងផ្សារអេឡិចត្រូនិករបស់យើងនឹងងាយស្រួលស្វែងរក»។
ផ្សារអេឡិចត្រូនិកនេះមានតាំងលក់ផលិតផលក្នុងស្រុកសុទ្ធជាង ៦០០ ប្រភេទរាប់ចាប់តាំងពីផលិតផលពីសិប្បកម្មពីឫស្សី គ្រឿងចម្លាក់ពីលោហធាតុ គ្រឿងអលង្ការ ហូលផាមួង ស្បែកជើង និងកាបូប ជាដើមដែលបានតាំងលក់លើគេហទំព័រ WeMall.shop។
កញ្ញាកត់សម្គាល់ថា ផលិតផលខ្មែរមានគុណភាពមិនចាញ់ផលិតផលនាំចូលពីបរទេសប៉ុន្មាននោះទេ ប៉ុន្តែអ្វីដែលជាឧបសគ្គសម្រាប់អតិថិជនគឺការពិបាករកទិញផលិតផលទាំងនោះ។
កញ្ញានិយាយថា៖ «ខ្ញុំឃើញថា ការទិញ-លក់ទំនិញតាមអនឡាញមានការកើនឡើងយ៉ាងខ្លាំង។ យើងជឿថាការដាក់ផលិតផលលក់នៅលើផ្សារអេឡិចត្រូនិកនឹងមានការគាំទ្រច្រើនពីអ្នកទិញទាំងក្នុងស្រុក និងក្រៅស្រុក ហើយយើងសង្ឃឹមថា ក្រោយពីស្ថានភាពជំងឺកូវីដ ១៩ ផុតរលត់ទៅនឹងមានការបញ្ជាទិញពីក្រៅប្រទេសផងដែរ»។
អ្នកស្រី ដេន ម៉ាស់ ប្រធានសមាគមសិប្បកម្មភូមិចម្លាក់ប្រាក់ និងជាម្ចាស់អាជីវកម្ម ដេន ម៉ាស់ សិប្បកម្មធ្វើដោយដៃស្ថិតនៅក្នុងស្រុកពញាឮ ខេត្តកណ្តាលដែលមានផលិតផលតាំងលក់ក្នុង WeMall និយាយថាផ្សារអេឡិចត្រូនិកនេះនឹងជួយពង្រីកទីផ្សារឲ្យផលិតផលរបស់អ្នកស្រី។
អ្នកស្រីបន្តថា គ្រឿងចម្លាក់ពីស្ពាន់ និងប្រាក់មានការគាំទ្រច្រើនពីអតិថិជននៅប្រទេសថៃ រីឯអតិថិជនក្នុងស្រុកមិនច្រើននោះទេ៖ «ខ្ញុំសូមអំពាវនាវឲ្យប្រជាជនខ្មែរជួយគាំទ្រផលិតផលក្នុងស្រុកឲ្យកាន់តែច្រើន»៕ LA