The Phnom Penh Post Search

Search form

Logo of Phnom Penh Post newspaper Phnom Penh Post - ផ្សារ​ហ៊ុន​នឹង​មាន​ក្រុម​ហ៊ុន​ឯកជន​១ទៀត​




ផ្សារ​ហ៊ុន​នឹង​មាន​ក្រុម​ហ៊ុន​ឯកជន​១ទៀត​

ផ្សារ​ហ៊ុន​នឹង​មាន​ក្រុម​ហ៊ុន​ឯកជន​១ទៀត​

ភ្នំពេញៈ ក្រុម​ហ៊ុន​រោងចក្រ​កាត់ដេរ Grand Twin International (Cambodia) Ltd របស់​តៃវ៉ាន់​នឹង​ចូល​ផ្សារ​ហ៊ុន នៅ​ដើម​ឆ្នាំ​ក្រោយ។

រោងចក្រ​នេះ​នឹង​ក្លាយ​ជា​ក្រុមហ៊ុន​ឯកជន​ដំបូង​គេ ដែល​បាន​ចុះ​បញ្ជី​នៅ​លើ​ផ្សារ​ហ៊ុន​កម្ពុជា។

អ្នក​រក​ស៊ី​នៅ​ក្នុង​វិស័យ​នេះ និង​មន្ត្រី​ពាក់​ព័ន្ធ បាន​ឲ្យ​ដឹង​ថា ការ​ចូល​របស់​រោងចក្រ​នេះ នឹង​ក្លាយ​ជា​កត្តា​ជំរុញ​ធ្វើ​ឲ្យ​ផ្សារហ៊ុន​ដែល​ទើប​នឹង​បង្កើត​ថ្មី​របស់​កម្ពុជា មាន​ដំណើរ​ការ​កាន់​តែ​ប្រសើរ។

រោងចក្រ Grand Twin International (Cambodia) Ltd បាន​ចុះ​ហត្ថលេខា​លើ​កិច្ច​សន្យា​រៀប​ចំ IPO ជាមួយ​ក្រុមហ៊ុន​ធានា​ទិញ​មូលបត្រ ភ្នំពេញ ស៊ីឃ្យូរីធី (PPS) កាល​ពី​ខែ​មិថុនា ឆ្នាំ​មុន ខណៈ​ក្រុមហ៊ុន​TY Fashion (Cambodia) Co.,Ltd ដែល​ជា​រោងចក្រ​របស់​តៃវ៉ាន់​ដែរ​នោះ​ចុះ​ហត្ថលេខា​កាល​ពី​ខែ​កក្កដា​។

លោក​Stephen Hsu អគ្គ​នាយក​របស់​PPS បាន​ឲ្យ​ដឹង​ថា បន្ទាប់​ពី​ចំណាយ​ពេល​ជាង​មួយ​ឆ្នាំ​នៃ​ការ​ខិតខំ​របស់​ក្រុម​ហ៊ុន​ទាំង​ពីរ ក្រុមហ៊ុន​ទាំង​នេះ​បាន​បញ្ជូន​លិខិត​បញ្ជាក់​អំពី​គោល​បំណង​របស់​ខ្លួន ក្នុង​ការ​ចូល​ក្នុង​ផ្សារ​ហ៊ុន​មក​កាន់​គណៈកម្មការ​ផ្សារ​មូលបត្រ​កម្ពុជា (SECC)​តាំង​ពី​ចុង​ឆ្នាំ​២០១១។ លោក​បន្ត​ថា៖ «យើង​កំពុង​ធ្វើ​ការ​ជាមួយ​រោងចក្រ​ទាំង​ពីរ នៅ​ពេល​តែ​មួយ ហើយ​ដំណើរ​ការ​នេះ នឹង​ប្រព្រឹត្ត​ទៅ​យ៉ាង​ល្អ។ បច្ចុប្បន្ន​វា​ឈាន​ដល់​ដំណាក់​កាល​ចុង​ក្រោយ​ហើយ។ បន្ទាប់​ពី​ក្រុម​ហ៊ុន​ទាំង​ពីរ ផ្លាស់​ប្តូរ​មាត្រា​របស់​ខ្លួន នៅ​ក្រសួង​ពាណិជ្ជកម្ម​មក នឹង​ដាក់​ពាក្យ​សុំ​អនុញ្ញាត​ចុះ​បញ្ជី​ជា​ផ្លូវ​ការ​»។

លោក​សង្ឃឹម​ថា​ក្រុមហ៊ុន​ទាំង​នេះ អាច​ចុះ​បញ្ជី​បាន​ដោយ​ជោគ​ជ័យ នៅ​លើ​ផ្សារហ៊ុន នៅ​ដើម​ឆ្នាំ​២០១៣។

លោក មិញ បាន​កុសល អគ្គ​នាយក SECC បាន​ឲ្យ​ដឹង​ថា លោក​មិន​បាន​ទទួល​ឯក​សារ​លម្អិត​ពី​ក្រុមហ៊ុន​នោះ​ឡើយ ដោយ​លោក​បាន​បញ្ជាក់​ថា ក្រុម​ហ៊ុន​ដែល​បាន​ចុះ​បញ្ជី​នៅ​លើ​ផ្សារ​ហ៊ុន ចាំ​បាច់​ត្រូវ​បញ្ជូន​ឯកសារ​មក SECC ដើម្បី​ទទួល​បាន​ការ​អនុញ្ញាត។ លោក​ថ្លែង​ថា៖ «ពួក​គេចាំ​បាច់​ត្រូវ​បញ្ជូន​ឯកសារ​មក​យើង ដើម្បី​ត្រួត​ពិនិត្យ​ថា​តើ​ពួក​គេ​បំពេញ​តាម​លក្ខ​ខណ្ឌ​របស់​យើង​ដែរ​ឬ​អត់។​បើ​ឯកសារ​របស់​ពួក​គេ​ត្រូវ​តាម​លក្ខ​ខណ្ឌ យើង​នឹង​អនុញ្ញាត​ឲ្យ​ពួក​គេ​ភ្លាម»។ លោក​បន្ត​ថា​ការ​អនុញ្ញាត​នឹង​ត្រូវ​ការ​ពេល​ប្រហែល​១ ទៅ ២​ខែ។

លោក ស្វាយ ហៃ ប្រធាន​ក្រុមហ៊ុន​ជើង​សារ​ធនាគារ​អេស៊ីលីដា​បាន​ឲ្យ​ដឹង​ថា ការ​ចូល​ផ្សារ​ហ៊ុន​របស់​ក្រុម​ហ៊ុន​ទាំង​នេះ នឹង​ធ្វើ​ឲ្យ​ផ្សារ​ហ៊ុន​កាន់​តែ​មាន​សកម្មភាព។ លោក​បញ្ជាក់​ថា៖ «ផ្សារ​ហ៊ុន​យើង​មាន​ដំណើរ​ការ​ជា​បណ្តើរ​ៗ ទោះ​បី​យើង​មាន​តែ​ក្រុមហ៊ុន​មួយ​ក៏​ដោយ។ បើ​យើង​មាន​ក្រុមហ៊ុន​ច្រើន ចុះ​បញ្ជី វា​នឹង​ទាក់​ទាញ​វិនិយោគិន​កាន់​តែ​ច្រើន​»។ លោក​បន្ត​ថា​មក​ទល់​ពេល​នេះ​មាន​ក្រុម​ហ៊ុន​ប្រមាណ​១០ មក​ពី​វិស័យ​ឯក​ជន និង​រដ្ឋ បង្ហាញ​ចំណាប់​អារម្មណ៍​ចង់​ចូល​ក្នុង​ផ្សារ​ហ៊ុន​៕CS

អត្ថបទគួរចាប់អារម្មណ៍