.jpg)
ការតាំងបង្ហាញផលិតផលខ្មែរក្នុងកម្មវិធីមួយនៅរាជធានីភ្នំពេញ។ ហុង មិនា
ភ្នំពេញៈ សេចក្តីព្រាងច្បាប់ស្តីពីសុវត្ថិភាពម្ហូបអាហារត្រូវបានរំពឹងថានឹងបញ្ជូនទៅទីស្តីគណៈរដ្ឋមន្ត្រីពិនិត្យ និងសម្រេច បន្ទាប់ពីស្ថានភាពជំងឺកូវីដ១៩នៃព្រឹត្តិការណ៍សហគមន៍ ២០ កុម្ភៈត្រូវបានគ្រប់គ្រងបាននៅពេលខាងមុខ។
អ្នកនៅក្នុងវិស័យទេសចរណ៍ជឿថាច្បាប់នេះនឹងរួមចំណែកទាក់ទាញភ្ញៀវទេសចរមកទស្សនានៅប្រទេសកម្ពុជា បន្ទាប់ពីកម្ពុជាអាចគ្រប់គ្រងបាននៃការឆ្លងជំងឺកូវីដ១៩។
សេចក្តីព្រាងច្បាប់ស្តីពីសុវត្ថិភាពម្ហូបអាហារត្រូវបានរៀបចំឡើងក្នុងឆ្នាំ ២០១៥ ដោយមាន ១១ ជំពូក ៥៣ មាត្រា។
ច្បាប់នេះមានគោលបំណងបង្កើតប្រព័ន្ធសុវត្ថិភាពម្ហូបអាហារសម្រាប់ការពារសុខភាពមនុស្ស និងអ្នកប្រើប្រាស់តាមរយៈការទប់ស្កាត់ ការគ្រប់គ្រង និងលុបបំបាត់ការបំពុល និងគ្រោះថ្នាក់ដែលបណ្តាលមកពីម្ហូបអាហារ។
បទប្បញ្ញត្តិច្បាប់នេះ គ្របដណ្តប់លើម្ហូបអាហារទាំងកែច្នៃ និងមិនកែច្នៃ ដែលមានកំណត់ក្នុងច្បាប់ និងលើខ្សែចង្វាក់ផលិតកម្មម្ហូបអាហារទាំងមូល ស្របតាមគោលការណ៍សុវត្ថិភាពម្ហូបអាហារចាប់ពីកសិដ្ឋានដល់តុបរិភោគ។
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំក្រសួងពាណិជ្ជកម្ម ឲ្យដឹងថា សេចក្តីព្រាងច្បាប់ស្តីពីសុវត្ថិភាពម្ហូបអាហារត្រូវបានក្រុមការងារនៃក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុបានបញ្ចប់ការជជែកពិភាក្សាគ្នាម្តងរួចហើយ កាលពីថ្ងៃទី ៤ ខែកុម្ភៈកន្លងមក។
លោក ផាន អូន ឲ្យដឹងទៀតថាសេចក្តីព្រាងច្បាប់នេះនឹងបន្តដាក់ឆ្លងទៅក្នុងកិច្ចប្រជុំអន្តរក្រសួងម្តងទៀត មុននឹងបញ្ជូនទៅគណៈរដ្ឋមន្ត្រី ប៉ុន្តែលោកមិនទាន់ដឹងថានឹងកំណត់ពេលណានោះទេ ដោយសារការរីករាលដាលនៃជំងឺកូវីដ១៩នៃព្រឹត្តិការណ៍សហគមន៍ ២០ កុម្ភៈមិនទាន់ធូរស្រាលនៅឡើយ។
លោកថ្លែងថា៖ «ខ្ញុំជឿថានៅពេលស្ថានភាពធូរស្បើយការប្រជុំវែកញែកជជែកដើម្បីឲ្យទិដ្ឋភាពច្បាប់អាចសម្រេចទៅបាននឹងលឿនទៅតាមនោះដែរ»។
លោកបន្ថែមថា សេចក្តីព្រាងច្បាប់ស្តីពីសុវត្ថិភាពម្ហូបអាហារត្រូវបានធ្វើឡើងស្របនឹងការប្តេជ្ញាចិត្តរបស់រាជរដ្ឋាភិបាលក្នុងការបំពេញកាតព្វកិច្ចទៅតាមអង្គការពាណិជ្ជកម្មពិភពលោកដែលកម្ពុជាបានចូលជាសមាជិករបស់អង្គការនេះ។
សេចក្តីព្រាងច្បាប់ស្តីពីម្ហូបអាហារក៏នឹងឆ្លើយតប និងបំពេញបន្ថែមទៅនឹងច្បាប់ស្តីពីការគ្រប់គ្រងគុណភាពសុវត្ថិភាពទំនិញ និងសេវា និងច្បាប់ផ្សេងទៀតនឹងធានាបាននូវផលិតផលម្ហូបអាហារមួយដែលមានសុវត្ថិភាព ការទទួលខុសត្រូវរបស់ពាណិជ្ជករ អាជីវករ អ្នកផលិត និងចែកចាយ និងអ្នកនាំចូលត្រូវមានកាតព្វកិច្ចទទួលខុសត្រូវចំពោះមុខច្បាប់។
លោកនិយាយថា៖ «សេចក្តីព្រាងច្បាប់នេះត្រូវបានប្រកាសឲ្យប្រើនៅថ្ងៃណាមួយនោះ ខ្ញុំជឿថាសុវត្ថិភាពម្ហូបអាហារនឹងទទួលបានការធានាមួយកម្រិតទៀត ដូច្នេះវាជាយន្តការមួយទាក់ទាញទេសចរណ៍ក្នុងស្ថានភាពជំងឺកូវីដ១៩អាចគ្រប់គ្រងបានក៏នឹងមានភាពកកក្តៅពីអ្នកទេសចរណ៍អន្តរជាតិ និងក្នុងស្រុកក៏ដូចជាប្រជាពលរដ្ឋអ្នកប្រើប្រាស់ចុងក្រោយសុវត្ថិភាពក្នុងការទទួលទានផងដែរ»។
លោក តុប សុភ័ក្រ អ្នកនាំពាក្យក្រសួងទេសចរណ៍ប្រាប់ភ្នំពេញ ប៉ុស្តិ៍ថា សម្រាប់ភ្ញៀវទេសចរផ្នែកម្ហូបអាហារមានតួនាទីយ៉ាងសំខាន់ក្នុងការទាក់ទាញពួកគេមកទស្សនានៅតាមតំបន់គោលដៅទេសចរណ៍នានានៅកម្ពុជា។ គ្រប់ទិសដៅទេសចរណ៍ទាំងអស់ចាំបាច់បំផុតត្រូវមានម្ហូបអាហារដែលមានគុណភាព អនាម័យល្អ សម្រាប់បម្រើសេវាដល់អតិថិជនរបស់ខ្លួន។
លោក សុភ័ក្រ ថ្លែងថា៖ «ម្ហូបអាហារពិតជាចាំបាច់ណាស់សម្រាប់វិស័យទេសចរណ៍ ក្រសួងទេសចរណ៍ក៏ធ្លាប់ធ្វើកម្មវិធីមហោស្រពទេសចរណ៍ម្ហូបអាហារនាពេលកន្លងមក ហើយបាននិងកំពុងជ្រើសរើសមុខម្ហូបអាហារជាលក្ខណៈជាតិ ដើម្បីឲ្យភ្ញៀវទេសចរមកកម្ពុជាទទួលបានម្ហូបអាហារសម្គាល់តាមគោលដៅទេសចរណ៍»។
លោកថ្លែងទៀតថា៖ «ទាំងនេះគឺជាការខិតខំប្រឹងប្រែងរបស់រដ្ឋាភិបាល ក៏ដូចជា ក្រសួងទេសចរណ៍ក្នុងការពង្រឹងផលិតផលទេសចរណ៍ម្ហូបអាហារមួយដ៏ទាក់ទាញសម្រាប់ភ្ញៀវទេសចរ»។
ប្រធានសមាគមទីភ្នាក់ងារទេសចរណ៍កម្ពុជាលោកស្រី ឆាយ ស៊ីវលីន ធ្លាប់បានលើកឡើងនាពេលកន្លងមកថា នៅពេលច្បាប់នេះត្រូវបានដាក់ឲ្យប្រើប្រាស់ កម្ពុជានឹងក្លាយជាគោលដៅទាក់ទាញការវិនិយោគលើវិស័យម្ហូបអាហារ។
លោកស្រីនិយាយថា៖ «វាក៏អាចធ្វើឱ្យមានការវិនិយោគលើហាងលក់ម្ហូបអាហារសម្រាប់ភ្ញៀវទេសចរបញ្ហាសុវត្ថិភាព និងគុណភាពអាហារ គឺជាផ្នែកមួយដ៏សំខាន់សម្រាប់ភ្ញៀវទេសចរ ព្រោះភ្ញៀវទេសចរ គឺតែងចង់ទទួលទានអាហារដែលមានគុណភាព រសជាតិ និងអនាម័យ។ ពេលធ្វើដំណើរទៅប្រទេសណាភ្ញៀវតែងសួរពីប្រភេទអាហារ និងសុវត្ថិភាពអាហារមុនគេ»។
យោងតាមរបាយការណ៍ក្រសួងទេសចរណ៍បានឲ្យដឹងថា កាលពីឆ្នាំ ២០២០ កន្លងទៅនេះ កម្ពុជាទទួលបានភ្ញៀវទេសចរអន្តរជាតិតែ ១,៣១ លាននាក់ប៉ុណ្ណោះ ដោយមានការថយចុះប្រមាណ ៨០% និងទទួលបានភ្ញៀវទេសចរផ្ទៃក្នុងប្រមាណ ៩ លាននាក់ ថយចុះ ២០% បើធៀបនឹងឆ្នាំ ២០១៩ កន្លងទៅ។
ការធ្លាក់ចុះនៃចំនួនភ្ញៀវទេសចរអន្តរជាតិកាលពីឆ្នាំមុនបានធ្វើឲ្យឧស្សាហកម្មទេសចរណ៍កម្ពុជាបាត់បង់ចំណូលជាង ៣ ពាន់លានដុល្លារអាមេរិក ដោយប្រាក់ចំណូលពីទេសចរណ៍អន្តរជាតិទទួលបានក្នុងឆ្នាំ ២០២០ មានត្រឹម ១,០២៣ ពាន់លានដុល្លារ ធ្លាក់ចុះ ៧៩,២ ភាគរយ បើធៀបនឹងឆ្នាំ ២០១៩ ដែលមានចំនួន ៤,៩១៩ ពាន់លានដុល្លារ៕
