ភ្នំពេញៈ អគ្គនាយកដ្ឋានពន្ធដារ ប្រមូលបានចំណូលពន្ធអាករបានជាង ២ ពាន់លានដុល្លារនៅឆ្នាំ ២០១៨ កើនឡើង ១៣,៣៧ ភាគរយ បើធៀបរយៈពេលដូចគ្នាកាលពីឆ្នាំ ២០១៧។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារកាលពីថ្ងៃអង្គារ។
នៅកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ ប្រចាំឆ្នាំ ២០១៨ និងសមិទ្ធផល ៥ ឆ្នាំ ព្រមទាំងទិសដៅសម្រាប់អនុវត្តបន្តសម្រាប់ឆ្នាំ ២០១៩ របស់អគ្គនាយកដ្ឋានពន្ធដារកាលពីថ្ងៃទី ២៩ មករា លោក គង់ វិបុល អគ្គនាយក នៃអគ្គនាយកដ្ឋានពន្ធដារ បានបង្ហាញថា GDT ប្រមូលចំណូលពន្ធដារគ្រប់ប្រភេទបានជាង ២,១៩ ពាន់លានដុល្លារកើនលើសផែនការជាង ២៧៤ លានដុល្លារ។
របាយការណ៍បានបង្ហាញថា នៅខែធ្នូ ឆ្នាំ ២០១៨ អគ្គនាយកដ្ឋានពន្ធដារប្រមូលចំណូលបានជាង ១៤២ លានដុល្លារ កើនឡើងចំនួន ៣១ លានដុល្លារ បើធៀបនឹងខែធ្នូឆ្នាំ ២០១៧។
យោងតាមសេចក្តីប្រកាសព័ត៌មាន ក្នុងរយៈពេល ៥ ចុងក្រោយនេះ អគ្គនាយកដ្ឋានពន្ធដារ សម្រេចបានកំណើនចំណូលពន្ធ ក្នុងរង្វង់ប្រមាណ ២០ ភាគរយក្នុងមួយឆ្នាំ ក្នុងនោះឆ្នាំ ២០១៤ ប្រមូលចំណូលបាន ១,០៦ ពាន់លានដុល្លារ ឆ្នាំ ២០១៥ មានជាង ១,៣ ពាន់លានដុល្លារ ឆ្នាំ ២០១៦ មានចំនួនជាង ១,៥ ពាន់លានដុល្លារ និងឆ្នាំ ២០១៧ ប្រមូលបានជាង ១,៩៧ ពាន់លានដុល្លារ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានចូលរួមក្នុងកិច្ចប្រជុំបូកសរុបលទ្ធផលប្រមូលចំណូលប្រចាំឆ្នាំនេះបានបន្តគាំទ្រអគ្គនាយកដ្ឋានពន្ធដារក្នុងបេសកកម្មដើម្បីធានាបាននូវប្រសិទ្ធភាពក្នុងការអនុវត្តការប្រមូលចំណូលពន្ធ និងឈានទៅសម្រេចឲ្យបានលើសផែនការឲ្យបានជាអតិបរិមា សម្រាប់ឆ្នាំ ២០១៩ នេះ។
តាមលោករដ្ឋមន្ត្រីក្រសួងសេដ្ឋកិច្ច ដើម្បីសម្រេចបាន ក្នុងការអនុវត្តការប្រមូលចំណូលពន្ធ អគ្គនាយកដ្ឋានត្រូវបន្តធ្វើទំនើបកម្មរដ្ឋបាលសារពើពន្ធ ដោយសិក្សារៀបចំផែនការយុទ្ធសាស្ត្របច្ចេកវិទ្យាព័ត៌មាន ដើម្បីបង្កើតឲ្យមានមជ្ឈមណ្ឌលរក្សាទិន្នន័យរួមរបស់អគ្គនាយកដ្ឋានពន្ធដារ រៀបចំធ្វើបច្ចុប្បន្នភាព និងសិក្សារៀបចំបន្ថែមនូវបទប្បញ្ញត្តិស្ដីពីពន្ធដារ សម្រាប់គំាទ្រដល់ការគ្រប់គ្រងប្រមូលចំណូលពន្ធ និងការបន្តធ្វើបច្ចុប្បន្នភាពព័ត៌មានអចលនទ្រព្យទាំងអស់នៅរាជធានីភ្នំពេញ និងនៅតាមតំបន់ដែលជាកម្មវត្ថុនៃពន្ធលើអចលនទ្រព្យ៕LA