ភ្នំពេញៈ រដ្ឋាភិបាលបានដាក់ឱ្យដំណើរការជាផ្លូវការនូវមុខងារសន្ធានកម្មប្រព័ន្ធស្វ័យប្រវត្តិកម្មទិន្នន័យរវាងអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជា លើការចែករំលែកទិន្នន័យតាមរយៈប្រព័ន្ធបច្ចេកវិទ្យាព័ត៌មានដោយធ្វើទំនើបកម្មឱ្យទាន់សម័យ និងទាន់សភាពការណ៍នៃកំណើនសេដ្ឋកិច្ច និងកាន់តែច្បាស់លាស់នៃព័ត៌មានទិន្នន័យ។
ការដាក់ដំណើរការជាផ្លូវការនៃប្រព័ន្ធនេះត្រូវបានប្រកាសកាលពីថ្ងៃ ១៨ ខែមករា ដោយអនុលោមតាមក្រុមការងារចម្រុះរវាងអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជាដែលត្រូវបានបង្កើតឡើងកាលពីថ្ងៃទី ១៥ ខែមិថុនា ឆ្នាំ ២០១៨ ដើម្បីសហការ និងសម្របសម្រួលក្នុងការផ្តល់ជូនគ្នាទៅវិញទៅមកនូវព័ត៌មាន និងទិន្នន័យដែលអាចបម្រើឱ្យការសិក្សា វិភាគ លើកវិធានការពង្រឹងការគ្រប់គ្រង និងបង្កើនការប្រមូលចំណូលពន្ធដារ និងចំណូលពន្ធគយ ប្រកបដោយតម្លាភាព គណនេយ្យភាព ប្រសិទ្ធភាព និងស័ក្តិសិទ្ធិភាពក៏ដូចជាចូលរួមពង្រឹងការអនុវត្ត បទបញ្ជារាជរដ្ឋាភិបាលស្តីពីវិធានការបង្កើនប្រសិទ្ធភាពក្នុងការទប់ស្កាត់ និងបង្ក្រាបអំពើគេចវេះពន្ធនានា។ នេះបើយោងតាមសេចក្តីប្រកាសព័ត៌មានពីក្រសួងសេដ្ឋកិច្ច និងហិរញ្ញវត្ថុ។
សេចក្តីប្រកាសព័ត៌មាននោះបានសង្កត់ធ្ងន់ថា៖ «ការដាក់ឱ្យដំណើរការនូវមុខងារសន្ធានកម្មប្រព័ន្ធស្វ័យប្រវត្តិកម្មទិន្នន័យរវាងអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជា នាពេលនេះបានបង្ហាញពីវឌ្ឍនភាពថ្មីនៃការចាប់យកនូវសក្តានុពល និងកាលានុវត្តន៍នៃបច្ចេកវិទ្យាក្នុងការពង្រឹងកិច្ចសហប្រតិបត្តិការអន្តរស្ថាប័នឱ្យកាន់តែល្អប្រសើរបន្ថែមរវាងអគ្គនាយកដ្ឋានទាំង ២ លើការចែករំលែកទិន្នន័យតាមរយៈប្រព័ន្ធបច្ចេកវិទ្យាព័ត៌មានដោយធ្វើទំនើបកម្មភាពទាន់សម័យ ទាន់សភាពការណ៍នៃកំណើនសេដ្ឋកិច្ច និងកាន់តែច្បាស់លាស់នៃព័ត៌មានទិន្នន័យ ស្របតាមកម្មវិធីកែទម្រង់ដ៏មុតស្រួចរបស់រាជរដ្ឋាភិបាលជាពិសេសកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និងយុទ្ធសាស្ត្រកៀរគរចំណូល ២០១៩- ២០២៣ របស់រាជរដ្ឋាភិបាល»។
ក្រសួងបន្ត៖ «ទន្ទឹមនេះ ការដាក់ឱ្យដំណើរការនេះក៏ជាការចូលរួមចំណែកដ៏សំខាន់ក្នុងការជំរុញរដ្ឋាភិបាលអេឡិចត្រូនិក (e-Government) និងបដិវត្តន៍ឧស្សាហកម្មទី ៤ ជាពិសេសជាការឆ្លើយតប ប្រកបដោយប្រសិទ្ធភាពទៅនឹងការសម្រួលផ្នែកធុរកិច្ច (ease of doing business) ផង លើកតម្កើងឱ្យមានភាពស្មើគ្នានៃការវិនិយោគផង ព្រមទាំងឆ្លើយតបទៅនឹងផលប៉ះពាល់ពីជំងឺផ្លូវដង្ហើមបណ្តាលមកពីមេរោគកូវីដ១៩ ដែលតម្រូវឱ្យរក្សាគម្លាតសង្គម និងកាត់បន្ថយការជួបជុំគ្នា»។
លោក Anthony Galliano អគ្គនាយកក្រុមហ៊ុនសេវាកម្មហិរញ្ញវត្ថុ Cambodia Investment Management បានប្រាប់ភ្នំពេញប៉ុស្ដិ៍កាលពីថ្ងៃអង្គារថា អគ្គនាយកដ្ឋានទាំង ២ នេះស្ថិតក្រោមក្រសួងសេដ្ឋកិច្ច និងហិរញ្ញវត្ថុតែមួយ និងជាស្នូលនៃការរក និងការប្រមូលប្រាក់ចំណូលសម្រាប់ប្រទេសកម្ពុជា រហូតមកដល់ពេលថ្មីៗនេះមានការយល់ឃើញថា ពួកគេបានប្រតិបត្តិការផ្សេងពីគ្នាច្រើនជាងការភ្ជាប់ទំនាក់ទំនងជាមួយគ្នា។
លោកថា ការដាក់ឱ្យដំណើរការប្រព័ន្ធចុះបញ្ជីពាណិជ្ជកម្មអនឡាញគឺជាសមិទ្ធផលដ៏សំខាន់មួយសម្រាប់ប្រទេសកម្ពុជា នៅក្នុងចំណុចប្រទាក់ក្រឡាគ្នារបស់ក្រសួង និងជំហានផ្សេងទៀតនៅក្នុងការជំរុញរបស់រដ្ឋាភិបាលក្នុងការតភ្ជាប់ក្រសួងទាំងនេះ និងគំនិតផ្តួចផ្ដើមរបស់ខ្លួននៃការចែករំលែកទិន្នន័យពាក់ព័ន្ធក្នុងចំណោមនាយកដ្ឋានរបស់ខ្លួន។
លោកថ្លែងថា៖ «ការភ្ជាប់ទិន្នន័យនេះគឺពិតជាសំខាន់ណាស់ជាពិសេសសម្រាប់ការអនុវត្តច្បាប់ និងការអនុវត្តពន្ធ ហើយនឹងក្លាយជាឧបករណ៍ដ៏មានតម្លៃសម្រាប់ក្រុមសវនករដែលទទួលបានឱកាសក្នុងការផ្ទៀងផ្ទាត់ និងការធ្វើឱ្យមានសុពលភាពលក្ខខណ្ឌនៃការនាំចូល និងការនាំចេញទំនិញ ជាពិសេសពន្ធគយ និងពន្ធត្រូវប្រកាស»។
លោកបញ្ជាក់ថា៖ «វាក៏ផ្ដល់ការត្រួតពិនិត្យប្រៀបធៀបរវាងនាយកដ្ឋានរដ្ឋាភិបាលនានាដែលអាចមានផលប្រយោជន៍ក្នុងការបង្ការការគេចពន្ធ និងអាកប្បកិរិយារឹងរូស»។
ក្រសួងសេដ្ឋកិច្ចបញ្ជាក់ថា សន្ធានកម្មប្រព័ន្ធស្វ័យប្រវត្តិកម្មទិន្នន័យរវាងអគ្គនាយកដ្ឋានទាំង ២ ត្រូវបានដាក់ដំណើរការសាកល្បងដោយក្រុមការងារបច្ចេកទេស និងទទួលបានជោគជ័យចាប់តាំងពីថ្ងៃទី ២៥ ខែ វិច្ឆិកា ឆ្នាំ ២០២០៕LA