.jpg)
រដ្ឋាភិបាលបានសម្រេចពន្យារពេលការអនុវត្តពន្ធលើចំណេញមូលធនក្នុងរយៈពេល ១ ឆ្នាំ រហូតដល់ខែមករា ឆ្នាំ ២០២២។ ហុង មិនា
ភ្នំពេញ: រដ្ឋាភិបាលបានសម្រេចពន្យារពេលការអនុវត្តពន្ធលើចំណេញមូលធនក្នុងរយៈពេល ១ ឆ្នាំ ដើម្បីទុកពេលវេលាគ្រប់គ្រាន់ដល់អ្នកជាប់ពន្ធទាំងអស់ធ្វើការស្វែងយល់ឱ្យកាន់តែច្បាស់នូវបទប្បញ្ញត្តិស្តីពីពន្ធលើចំណេញមូលធន។
ការសម្រេចពន្យារពេលនេះត្រូវបានធ្វើឡើងបន្ទាប់ពីសមាគមអ្នកអភិវឌ្ឍន៍លំនៅឋានកម្ពុជាបានស្នើសុំឱ្យរដ្ឋាភិបាលពន្យារពេលការអនុវត្តពន្ធលើចំណេញមូលធនរហូតដល់ស្ថានភាពនៃការរាតត្បាតជំងឺកូវីដ ១៩ មានភាពធូរស្រាលឡើងវិញ ខណៈវិស័យអចលនទ្រព្យនៅប្រទេសកម្ពុជាកំពុងរងផលប៉ះពាល់ដោយសារវិបត្តិសុខភាពនេះ។
សេចក្តីជូនដំណឹងរបស់អគ្គនាយកដ្ឋានពន្ធដារចេញផ្សាយកាលពីថ្ងៃព្រហស្បតិ៍ថា៖ «យោងតាមលិខិតរបស់ក្រសួងសេដ្ឋកិច្ច និងហិរញ្ញវត្ថុស្តីពីសំណើសុំពន្យារពេលការអនុវត្តពន្ធលើចំណេញមូលធន និងចំណារឯកសារដ៏ខ្ពង់ខ្ពស់របស់នាយករដ្ឋមន្ត្រី ហ៊ុន សែន ចុះថ្ងៃទី ៩ ខែ តុលា ឆ្នាំ ២០២០ រាជរដ្ឋាភិបាលសម្រេចឱ្យពន្យារកាលបរិច្ឆេទកំណត់ការដាក់ឱ្យអនុវត្តពន្ធលើចំណេញមូលធនរយៈពេល ១ ឆ្នាំទៀតរហូតដល់ដំណាច់ឆ្នាំ ២០២១»។
ការសម្រេចពន្យារពេលនេះក្នុងគោលបំណងដើម្បីទុកពេលវេលាគ្រប់គ្រាន់ដល់អ្នកជាប់ពន្ធ និងសាធារណជនទាំងអស់ធ្វើការស្វែងយល់ឱ្យកាន់តែច្បាស់នូវបទប្បញ្ញត្តិស្តីពីពន្ធលើចំណេញមូលធន ព្រមទាំងជាការត្រៀមខ្លួនចូលរួមអនុវត្តពន្ធលើចំណេញមូលធននេះឱ្យកាន់តែមានភាពរលូន និងមានប្រសិទ្ធភាពខ្ពស់ចាប់ពីថ្ងៃទី ១ ខែ មករា ឆ្នាំ ២០២២ តទៅ។
ពន្ធចំណេញមូលធននឹងត្រូវអនុវត្តចំពោះការលក់ ឬផ្ទេរ ឬក៏បង្កើតឱ្យមានសិទ្ធិគ្រប់គ្រងលើទ្រព្យ ឬចុះបញ្ជីសម្រាប់ការផ្ទេរកម្មសិទិ្ធ ឬសិទ្ធិកាន់កាប់ទ្រព្យ។ យោងប្រកាសរបស់ក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១ ខែមេសា ឆ្នាំ ២០២០ ការបង់ពន្ធនេះគឺបានមកពីការលក់នៃអចលនទ្រព្យមួយចំនួនដូចជា ដី អគារ ភាគហ៊ុន អាជ្ញាប័ណ្ណ ប៉ាតង់ សញ្ញាបណ្ណបំណុល និងរូបិយប័ណ្ណក្នុងអត្រា ២០ ភាគរយ៕
វីដេអូ៖
