ភ្នំពេញៈ ពលករកម្ពុជាបម្រើការងារនៅក្រៅប្រទេសបានផ្ញើប្រាក់មកស្រុកកំណើតតាមរយៈធនាគារ អេស៊ីលីដា ភីអីលស៊ី មានចំនួនជាង ១៥៧ លានដុល្លារ នៅក្នុងត្រីមាសទី១ ឆ្នាំ ២០២១ ធ្លាក់ចុះជាង ៧ ភាគរយ ធៀបនឹងឆ្នាំមុន។
យោងតាមរបាយការណ៍ផ្តល់ដោយធនាគារអេស៊ីលីដា ភីអិលស៊ី ពលករកម្ពុជាបម្រើការងារនៅក្រៅប្រទេសបានផ្ញើប្រាក់មកគ្រួសារនៅឯស្រុកកំណើតមានចំនួន ១៥៧ ១៩៩ ៩១៦,៥១ ដុល្លារក្នុងរយៈពេល ៣ ខែឆ្នាំ ២០២១នេះ ធ្លាក់ចុះ ៧,៦៩ ភាគរយ ធៀបនឹងឆ្នាំមុនចំនួន ១៧០ ២៨៨ ១៤៥,៥១ ដុល្លារ។
របាយការណ៍នេះបង្ហាញទៀតថា ក្នុងនោះ ពលករកម្ពុជាបម្រើការងារនៅប្រទេស ជប៉ុន កូរ៉េ ថៃ និងម៉ាឡេស៊ី បានផ្ញើប្រាក់ចំនួន ១៤០ ៣៣៤ ៦៩២,៨៩ ដុល្លារ ធ្លាក់ចុះ ១៧ ភាគរយ ខណៈពលករកម្ពុជាមួយចំនួនទៀតបានផ្ទេរប្រាក់ពីក្រៅប្រទេសតាមរយៈសេវាកម្ម API ចំនួន ១៦ ៨៦១ ២២៣,៦២ ដុល្លារ កើនជាង ១២៤៣ ភាគរយ ធៀបនឹងត្រីមាសទី១ ឆ្នាំមុន។
លោកស្រី សូ ផនណារី អនុប្រធាននាយកប្រតិបត្តិនៃធនាគារអេស៊ីលីដា ភីអិលស៊ី ប្រាប់ ភ្នំពេញ ប៉ុស្តិ៍ថា ទោះជា ការផ្ទេរប្រាក់របស់ពលករកម្ពុជាក្រៅប្រទេសធា្លក់ ប៉ុន្តែ ចំនួនប្រតិបត្តិការបានកើនឡើង ៤៤,០៧ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
លោកស្រីនិយាយថា៖ «មូលហេតុគឺថាកម្មករផ្ទេរទំហំតូចច្រើនក្នុងអំឡុងពេលនៃការរាតត្បាតជំងឺកូវីដ ១៩ ជាសកលលោកដែលធ្វើឲ្យប៉ះពាល់ដល់សកម្មភាពអាជីវកម្មថយចុះដូច្នេះកម្មករអន្តោប្រវេសន៍ក៏ប្រឈមនឹងប្រាក់ចំណូលទាប ផងដែរ»។
យោងតាមរបាការណ៍ប្រចាំឆ្នាំនៃក្រសួងការងារ និងបណ្តុះបណ្តាលវិជ្ជាជីវៈ ពលករកម្ពុជាបម្រើការងារនៅបរទេសបានផ្ញើប្រាក់មកក្រុមគ្រួសារនៅស្រុកកំណើតចំនួន ២,៨០ ពាន់លានដុល្លារក្នុងមួយឆ្នាំៗ។
កាលពីឆ្នាំ ២០១៨ ពលករខ្មែរបានផ្ញើប្រាក់មកអ្នកផ្ទះប្រមាណ ១,៤ ពាន់ដុល្លារ ក្នុងនោះ ការផ្ញើរប្រាក់មកផ្ទះវិញរបស់ពលករនៅកូរ៉េមានជាង ៥៣ លានដុល្លារដែលមានចំណែកច្រើនជាងគេ។ នេះបើតាមរបាយការណ៍របស់ធនាគារជាតិ៕