.jpg)
សម្លៀកបំពាក់ជាផលិតផលមួយដែលកម្ពុជាបាននាំចេញច្រើនទៅកាន់ទីផ្សារជប៉ុន។ រូបថត ភ្នំពេញប៉ុស្តិ៍
ភ្នំពេញៈ ទំហំពាណិជ្ជកម្មទ្វេភាគីកម្ពុជា-ជប៉ុនក្នុងរយៈពេល ១០ ខែឆ្នាំ ២០១៩ មានតម្លៃប្រមាណ ១,៩ ពាន់លានដុល្លារ កើនឡើង ០,៤៤ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។ នេះបើយោងតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន (Jetro)។
ទិន្នន័យ Jetro បានបង្ហាញថា ក្នុងរយៈពេល ១០ ខែ ឆ្នាំ ២០១៩ នេះការធ្វើពាណិជ្ជកម្មរវាងប្រទេសទាំង ២ មានតម្លៃសរុប ១,៩ ពាន់លានដុល្លារ កើនឡើង ៨ ៥០៤ ដុល្លារ បើធៀបរយៈពេលដូចគ្នាកាលពីឆ្នាំមុន ដែលមានតម្លៃ ១,៨៩ លានដុល្លារ។ ក្នុងនោះការនាំចេញទំនិញពីកម្ពុជាទៅជប៉ុន មានតម្លៃ ១,៤៥ លានដុល្លារ កើន ៧,៨ ភាគរយ និងការនាំចូលទំនិញពីជប៉ុនមកកម្ពុជាមានតម្លៃ ៤៤៤ ៩៣៧ ដុល្លារ កើនឡើង ៣៤,២ ភាគរយ។
ដោយឡែកសម្រាប់ខែតុលា ឆ្នាំ ២០១៩ ទំហំពាណិជ្ជកម្មសរុបប្រទេសទាំង ២ មានតម្លៃ ២២១ ៤៩១ ដុល្លារ កើនឡើង ១,៥ ភាគរយ បើធៀបនឹងខែតុលា ឆ្នាំ ២០១៨។
លោក ឈួ វិចិត្រ ប្រធានក្រុមហ៊ុនតំបន់សេដ្ឋកិច្ចពិសេស Sanco Cambo Investment Group Co., Ltd ដែលមានផ្ទៃដីជាង ៨៣ ហិកតាក្នុងក្រុងប៉ោយប៉ែតបានប្រាប់ភ្នំពេញ-ប៉ុស្តិ៍កាលពីថ្ងៃម្សិលមិញថា សកម្មភាពនៃការផលិតរបស់ក្រុមហ៊ុនជប៉ុនក្នុងតំបន់សេដ្ឋកិច្ចពិសេសសានកូ-ប៉ោយប៉ែត កំពុងមានដំណើរការទៅមុខយ៉ាងរលូន ដោយផលិតផលមួយចំនួនត្រូវបាននាំចេញទៅប្រទេសជប៉ុន និងមួយចំនួនទៀតនាំទៅកាន់ប្រទេស ថៃ។ លោកបន្តថាភាគច្រើននៃរោងចក្រជប៉ុនក្នុងតំបន់សេដ្ឋកិច្ចពិសេសសានកូ-ប៉ោយប៉ែត គឺគ្រឿងផ្គុំអេឡិចត្រូនិក។
លោកថ្លែងថា៖ «ការផលិតរបស់ក្រុមហ៊ុនជប៉ុននៅតំបន់សេដ្ឋកិច្ចពិសេសសានកូ បានកើនឡើងជារៀងរាល់ឆ្នាំ ហើយការនាំចេញទៅកាន់ប្រទេសជប៉ុនដោយផ្ទាល់ក៏បានកើនឡើងច្រើនផងដែរ»។
លោកបន្តថា ការចូលមកវិនិយោគរបស់ក្រុមហ៊ុនជប៉ុនកំពុងផ្តល់ផលប្រយោជន៍ឲ្យកម្ពុជាជាច្រើនដូចជា ការបង្កើតការងារ ចំណេះដឹងពីការប្រើប្រាស់បច្ចេកវិទ្យា និងរបៀបធ្វើការដ៏ល្អផងដែរ។
ទោះយ៉ាងណាលោក វិចិត្រ ក៏បានស្នើថា ប្រសិនបើកម្ពុជាមានគោលនយោបាយលើកទឹកចិត្តចំពោះវិនិយោគិនជប៉ុនបន្ថែមទៀតនោះ នឹងមានក្រុមហ៊ុនជប៉ុនធំៗបន្ថែមទៀតចូលមកបណ្តាក់ទុនដោយផ្ទាល់នៅក្នុងប្រទេសកម្ពុជា។
បច្ចុប្បន្នតំបន់សេដ្ឋកិច្ចពិសេសសានកូ-ប៉ោយប៉ែត មានក្រុមហ៊ុនចំនួន ១០ កំពុងមានប្រតិបត្តិការដោយ ៩ ក្រុមហ៊ុន ជារបស់វិនិយោគិនជប៉ុនមានដូចជា NHK Spring, Techno Park Poi Pet Pvt Co., Ltd. និង Steel Hub។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ថា ការកើនឡើងនៃទំហំពាណិជ្ជកម្មទោះតិច ឬច្រើនសុទ្ធតែបង្ហាញសញ្ញាវិជ្ជមានសម្រាប់សេដ្ឋកិច្ច។ នៅពេលទំហំការនាំចេញធំបែបនេះគឺបង្ហាញថា ជប៉ុនគឺជាទីផ្សារមានសក្តានុពលសម្រាប់កម្ពុជា។
លោកលើកឡើងថា៖ «ទំហំពាណិជ្ជកម្មរវាងប្រទេសទាំង ២ នឹងមានទំហំធំបន្ថែមទៀតនៅពេលខាងមុខ ខណៈបច្ចុប្បន្នរដ្ឋាភិបាលជប៉ុនបានបញ្ចេញប្រាក់ជាច្រើនក្នុងការកសាងហេដ្ឋារចនាសម្ព័ន្ធតភ្ជាប់រវាងប្រទេសជាច្រើនក្នុងតំបន់»។
បើតាមលោក លឹម ហេង ទំនិញដែលកម្ពុជានាំចេញទៅប្រទេសជប៉ុនភាគច្រើនគឺសម្លៀកបំពាក់ និងស្បែកជើង គ្រឿងបន្លាស់រថយន្ត និងគ្រឿងផ្គុំអេឡិចត្រូនិក ខណៈទំនិញជប៉ុននាំមកកម្ពុជា ជាផលិតផលសម្រេច និងគ្រឿងអេឡិចត្រូនិក។
លោក ស៊ាង ថៃ អ្នកនាំពាក្យក្រសួងពាណិជ្ជកម្មមិនអាចទាក់ទងបានទេពីម្សិលមិញ។
របាយការណ៍ធនាគារជាតិនៃកម្ពុជា (NBC) បានបង្ហាញថា ក្នុងឆមាសទី ១ ឆ្នាំ ២០១៩ ការនាំចេញរបស់កម្ពុជាទៅកាន់ទីផ្សារអន្តរជាតិមានតម្លៃសរុប ៦,៨ ពាន់លានដុល្លារ ក្នុងនោះជប៉ុននៅចំណាត់ថ្នាក់ទី ៤ ជាមួយនឹងចំណែកទីផ្សារ ៧,៧ ភាគរយ។ រីឯការនាំចូលទំនិញមកកម្ពុជា ប្រទេស ជប៉ុន ឈរនៅលេខ ៤ ដោយមានចំណែកទីផ្សារ ៤,៥ ភាគរយ ក្នុងចំណោមការនាំចូល ១០,៥ ពាន់លានដុល្លារ៕LA
