.jpg)
រថយន្តភីកអាប់ ដឹកតាមរថយន្តធំចេញពីរោងចក្រនៅខេត្តរ៉ាក់យ៉ងប្រទេសថៃសម្រាប់ការនាំចេញ។ រូប AFP
ក្រុងបាងកកៈ ប្រទេសថៃត្រូវបានព្យាករថានឹងទទួលបានផលប្រយោជន៍ជាជាងការខាតបង់ពីជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន ដោយការនាំចេញត្រូវបានព្យាករថាអាចនឹងមានការកើនឡើងនៅពី ៨,៥៣ ទៅ ២១,៣៤ ពាន់លានបាត (ប្រហែល ៦៧៦ លានដុល្លារ) ឬស្មើនឹងពី ០,០៦ ទៅ ០,១៦ ភាគរយនៃ ផ.ស.ស។
ការសិក្សាចុងក្រោយរបស់សាកលវិទ្យាល័យសភាពាណិជ្ជកម្មថៃ (UTCC) បានរកឃើញថាការនាំចេញរបស់ប្រទេសថៃកាន់តែច្រើនទៅកាន់ប្រទេសទាំង ២ ត្រូវបានរំពឹងថានឹងកើតមានដោយសារការនាំចេញកាន់តែទាបរវាងប្រទេសទាំងពីរនៅពេលមានការដំឡើងពន្ធនាំចូលទ្វេភាគី។
លោក Aat Pisanwanich នាយកមជ្ឈមណ្ឌលសិក្សាពាណិជ្ជកម្មអន្តរជាតិប្រចាំសាកលវិទ្យាល័យ UTCC មានប្រសាសន៍ថា ការប្រឈមមុខដាក់គ្នាផ្នែកពាណិជ្ជកម្មរវាងសហរដ្ឋអាមេរិក និងប្រទេសចិននឹងបង្កើននូវការនាំចេញផលិតផលថៃ ដើម្បីជំនួសឲ្យទំនិញដែលត្រូវរងផលប៉ះពាល់ដោយសារជម្លោះពាណិជ្ជកម្មនេះ។
លោក Aat មានប្រសាសន៍ថាប្រទេសថៃអាចនឹងនាំចេញកាន់តែច្រើននូវគ្រឿងម៉ាស៊ីន ផលិតផលអគ្គិសនី គ្រឿងអេឡិចត្រូនិក ដែកថែប និងផលិតផលដែកថែប ផលិតផលកៅស៊ូ ព្រមទាំងរថយន្ត និងគ្រឿងបន្លាស់រថយន្តទៅសហរដ្ឋអាមេរិក ដោយបានជំនួសឲ្យការនាំចេញកាន់តែទាបចេញពីប្រទេសចិន។ ការនាំចេញកាន់តែខ្ពស់ទៅកាន់ទីផ្សារអាមេរិកអាចនឹងមានទំហំក្នុងចន្លោះពី ៥,១៩ ទៅ ១២,៩៩ ពាន់លានបាត (៤១១ លានដុល្លារ)។
ដូចគ្នានេះដែរប្រទេសថៃត្រូវបានព្យាករថាអាចនឹងនាំចេញផលិតផលកាន់តែច្រើនទៅកាន់ទីផ្សារប្រទេសចិន ជាពិសេសស្រូវសាលី និងពោត រថយន្ត និងគ្រឿងបន្លាស់រថយន្ត ប្លាស្ទិក និងអាលុយមីញ៉ូមដែលមានតម្លៃចន្លោះពី ៣,៣៤ ទៅ ៨,៣៥ ពាន់លានបាត (២៦៤ លានដុល្លារ)។
ប៉ុន្តែការសិក្សានេះបានរកឃើញថាទាក់ទងនឹងខ្សែចង្វាក់ផ្គត់ផ្គង់ ប្រទេសថៃអាចនឹងមើលឃើញនូវការធ្លាក់ចុះការនាំចេញទៅកាន់ប្រទេសចិន និងសហរដ្ឋអាមេរិកដោយមានទំហំសរុបចន្លោះពី ៤៦៦ លានទៅ ១,១៦ ពាន់លានបាត ឬពី ០,០០៣ ទៅ ០,០០៩ ភាគរយនៃ ផ.ស.ស។
ការនាំចូលរបស់អាមេរិកនូវវត្ថុធាតុដើមរបស់ថៃមានទំហំត្រឹមតែ ០,១ ភាគរយនៃទំហំពាណិជ្ជកម្មសរុបរបស់ខ្លួនតែប៉ុណ្ណោះ។ ទន្ទឹមនឹងនោះដែរវត្ថុធាតុដើមរបស់ថៃមានទំហំត្រឹមតែ ០,២ ភាគរយនៃផលិតកម្មសរុបរបស់ចិនដីគោក។
លោក Aat បានឲ្យដឹងថាផលប៉ះពាល់ដោយប្រយោល គឺប្រទេសថៃអាចនឹងក្លាយជាកន្លែងបញ្ចេញផលិតផលរបស់អាមេរិក និងចិនដែលបានរងផលប៉ះពាល់ដោយសារអត្រាពន្ធកាន់តែខ្ពស់នៅក្នុងប្រទេសទាំង ២។ លោកបានបន្ថែមថាតម្លៃផលិតផលទាំងនោះមានចន្លោះពី ៦,០៥ ទៅ ១៥.១២ ពាន់លានបាតរួមមាន គ្រឿងម៉ាស៊ីន សម្ភារអគ្គិសនី គ្រឿងអេឡិចត្រូនិក អាលុយមីញ៉ូម ដែកថែប និងផលិតផលដែកជាដើម។
លោកបានផ្តល់យោបល់ឲ្យប្រទេសថៃបង្កើនខ្សែចង្វាក់ផលិតកម្មរបស់ខ្លួន ជាមួយនឹងសហរដ្ឋអាមេរិក និងប្រទេសចិន។ ទន្ទឹមនឹងនោះដែរក៏បង្កើនកិច្ចសហប្រតិបត្តិការពាណិជ្ជកម្មផងដែរ ជាពិសេសតាមរយៈកិច្ចព្រមព្រៀងពាណិជ្ជកម្មសេរីជាមួយសហរដ្ឋអាមេរិក និងកិច្ចព្រមព្រៀងជាភាពជាដៃគូសេដ្ឋកិច្ចទូលំទូលាយប្រចាំតំបន់ (RCEP)។
កាលពីថ្ងៃទី ៨ ខែមីនាឆ្នាំ ២០១៨ លោកប្រធានាធិបតីអាមេរិក ដូណាល់ ត្រាំ បានចេញសេចក្តីប្រកាសចំនួន ២ ដើម្បីហូតពន្ធលើការនាំចូលផលិតផលដែកថែបក្នុងអត្រា ២៥ ភាគរយ និងអាលុយមីញ៉ូមក្នុងអត្រា ១០ ភាគរយដែលចូលជាធរមាននៅថ្ងៃទី ២៣ ខែមីនា។
ជាការឆ្លើយតបវិញកាលពីថ្ងៃទី ២ ខែមេសារដ្ឋាភិបាលក្រុងប៉េកាំងបានហូតពន្ធរហូតដល់ ២៥ ភាគរយលើផលិតផលរបស់អាមេរិកចំនួន ១២៣ មុខរួមមាន សាច់ជ្រូក ផ្លែឈើ ធញ្ញជាតិ និងស្រាក្រហម។
កាលពីថ្ងៃទី ៤ ខែមេសា ប្រទេសចិនបានប្រកាសពីការហូតពន្ធរហូតដល់ ២៥ ភាគរយលើផលិតផលរបស់អាមេរិកចំនួន ១០៦ មុខរួមទាំងសណ្តែកសៀង រថយន្ត សារធាតុគីមី និងទំនិញផ្សេងទៀតដែលបង្កឲ្យមានការភ័យខ្លាចថា ការប្រឈមមុខដាក់គ្នាអាចកើនឡើងឆ្ពោះទៅរកសង្គ្រាមពាណិជ្ជកម្ម៕ BP
