ក្រុងប៉េកាំងៈ ទំហំពាណិជ្ជកម្មទំនិញរវាងប្រទេស ចិន និងបណ្តាប្រទេសដែលស្ថិតនៅតាមបណ្តោយគម្រោងខ្សែក្រវាត់ និងផ្លូវ (B&R) របស់ចិន បានកើនឡើងខ្ពស់ជាង ៦ ពាន់ពាន់លានដុល្លារចាប់ពីឆ្នាំ ២០១៣ ដល់ ២០១៨។ នេះបើយោងតាមការប្រកាសរបស់គណៈកម្មការអភិវឌ្ឍន៍ និងកំណែទម្រង់ជាតិ (NDRC) របស់ប្រទេស ចិន កាលពីចុងសប្តាហ៍មុន។
ដោយតម្កល់គោលការណ៍នៃការប្រឹក្សាដ៏ហ្មត់ចត់ និងការចូលរួមចំណែក និងអត្ថប្រយោជន៍រួមគ្នា ប្រទេស ចិន សម្រេចបានវឌ្ឍនភាពដ៏គួរឲ្យកត់សម្គាល់ក្នុងការលើកកម្ពស់ការសាងសង់ក្នុងគម្រោង B&R ក្នុងរយៈពេលជាង ៦ ឆ្នាំចុងក្រោយនេះ។
គិតរហូតមកដល់ពេលនេះ ចិនបានចុះហត្ថលេខាលើឯកសារកិច្ចសហប្រតិបត្តិការជាង ១៧០ ជាមួយស្ថាប័នអន្តរជាតិ និងប្រទេសជាង ១៥០ រួមទាំងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ផងដែរ។
ក្រុមហ៊ុន និងស្ថាប័នហិរញ្ញវត្ថុជាច្រើនមកពីប្រទេសអភិវឌ្ឍន៍ ក៏បានធ្វើជាដៃគូជាមួយប្រទេស ចិន ផងដែរក្នុងការរុករកទីផ្សារភាគីទី៣។
ការតភ្ជាប់ហេដ្ឋារចនាសម្ព័ន្ធ គឺជាចំណុចផ្តោតនៃការសាងសង់របស់គម្រោង B&R។ គម្រោងនានារួមទាំងផ្លូវដែកចិន-ឡាវ ផ្លូវដែកចិន-ថៃ ផ្លូវរថភ្លើងល្បឿនលឿនក្រុងហ្សាការតា-បានឌុងនៅប្រទេស ឥណ្ឌូនេស៊ី ផ្លូវដែកប្រទេស ហុងគ្រី-ប្រទេស ស៊ែប កំពង់ផែ Gwadar ក្នុងប្រទេស ប៉ាគីស្ថាន កំពង់ផែ Hambantota នៅស្រីលង្កា និងកំពង់ផែ Khalifa ក្នុងទីក្រុងអាប៊ុយដាប៊ីរបស់ប្រទេស អេមីរ៉ាតអារ៉ាប់រួម កំពុងដំណើរការទៅមុខដោយរលូន។
គិតត្រឹមដំណាច់ខែមីនា រថភ្លើងដឹកទំនិញចិន-អឺរ៉ុប ដែលតភ្ជាប់ចិនជាមួយទីក្រុង ៥០ ក្នុងប្រទេសចំនួន ១៥ បានធ្វើដំណើរចំនួន ១៤ ០០០ ដង។
គម្រោងតភ្ជាប់ពាណិជ្ជកម្មជាច្រើន រួមមានទាំងសួនឧស្សាហកម្មប្រទេស ចិន-បេឡារុស និងតំបន់កិច្ចសហប្រតិបត្តិការពាណិជ្ជកម្ម និងសេដ្ឋកិច្ចស៊ុយអេរវាងប្រទេស ចិន និងប្រទេស អេហ្ស៊ីប កំពុងមើលឃើញភាពរីកចម្រើនជាលំដាប់។
ទាក់ទងនឹងការតភ្ជាប់ផ្នែកហិរញ្ញវត្ថុ ប្រទេស ចិន បានចុះហត្ថលេខាលើកិច្ចព្រមព្រៀងដោះដូររូបិយប័ណ្ណជាមួយប្រទេសជាង ២០ ដែលស្ថិតនៅតាមបណ្តោយផ្លូវរបស់គម្រោង B&R ដែលបង្កើតបានជាកិច្ចព្រមព្រៀងទូទាត់ប្រាក់យន់ជាមួយប្រទេសចំនួន ៧ និងបានបង្កើតមជ្ឈមណ្ឌលអភិវឌ្ឍន៍សមត្ថភាពមួយជាមួយមូលនិធិរូបិយវត្ថុអន្តរជាតិ (IMF)។
លើសពីនេះទៀត សមិទ្ធផលជាច្រើនត្រូវសម្រេចបានក្នុងការដោះដូរវិទ្យាសាស្រ្ត និងបច្ចេកវិទ្យា កិច្ចសហប្រតិបត្តិការអប់រំ វិស័យវប្បធម៌ ការអភិវឌ្ឍបៃតង និងជំនួយបរទេស ដែលជួយពង្រឹងចំណងមិត្តភាពរវាងប្រជាជននិងប្រជាជន៕ People''s Daily/KC