ភ្នំពេញៈ ពាណិជ្ជកម្មទ្វេភាគីរវាងកម្ពុជា និងថៃបានធ្លាក់ចុះ ១៩ ភាគរយ នៅក្នុងរយៈពេល ៩ ខែដំបូងឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន ដែលទទួលរងឥទ្ធិពលដោយសារការរីករាលដាលជំងឺកូវីដ ១៩។ នេះបើយោងតាមទិន្នន័យក្រសួងពាណិជ្ជកម្មថៃ។
តួលេខបានពីក្រសួងពាណិជ្ជកម្មថៃបង្ហាញថា ពាណិជ្ជកម្មទ្វេភាគីរវាងកម្ពុជានិងថៃមានសរុប ៥,៥៦៩ ពាន់លានដុល្លារ ចាប់ពីខែមករាដល់ខែកញ្ញា ដោយតម្លៃនាំចេញរបស់កម្ពុជាមាន ៩៥៨ លានដុល្លារ ធ្លាក់ចុះ ៤៨ ភាគរយ ខណៈតម្លៃនាំចូលមាន ៤, ៦១១ ពាន់លានដុល្លារ ធ្លាក់ចុះ ៩ ភាគរយ។
លោក Panyarak Poolthup ឯកអគ្គរាជទូតថៃប្រចាំកម្ពុជាបានបញ្ជាក់ថា នៅក្នុងស្ថានភាពនៃការរីករាលដាលជំងឺកូវីដ ១៩ ពាណិជ្ជកម្មរវាងប្រទេសទាំង ២ ត្រូវបានរងផលប៉ះពាល់ដោយសារតែការឆ្លងកាត់ព្រំដែនត្រូវបានរឹតបន្តឹងដែលបង្កការពិបាកសម្រាប់លំហូរចូលទំនិញរវាងប្រទេសទាំង ២។ នេះបើយោងតាមទីភ្នាក់ងារព័ត៌មានរដ្ឋ អាកាប៉េ។
ទំហំពាណិជ្ជកម្មសរុបរវាងកម្ពុជា និងថៃ សម្រេចបាន ៩,៤១ ពាន់លានដុល្លារកាលពីឆ្នាំមុន កើនឡើង ១២ ភាគរយធៀបនឹង ៨,៣៨ ពាន់លានដុល្លារកាលពីឆ្នាំ ២០១៨។
ការនាំចេញរបស់ប្រទេសកម្ពុជាទៅប្រទេសថៃមានតម្លៃ ២,២ ពាន់លានដុល្លារកាលពីឆ្នាំមុន កើនឡើង ១៩៥ ភាគរយធៀប ៧៦៨ លានដុល្លារ ខណៈដែលការនាំចូលមានតម្លៃ ៧,១៤ ពាន់លានដុល្លារ ធ្លាក់ចុះ ៦ ភាគរយធៀប ៧,៦១ ពាន់លានដុល្លារ កាលពីឆ្នាំ ២០១៨។
ទោះយ៉ាងណាមន្ត្រីស្ថានទូតកម្ពុជា និងថៃ នៅតែមានសុទិដ្ឋិនិយមចំពោះពាណិជ្ជកម្មនៃប្រទេសទាំង ២ ក្រោយការរីករាលដាលកូវីដ ១៩៕ LA