.jpg)
កំពង់ផែក្រុងព្រះសីហនុ។ ពាណិជ្ជកម្មទ្វេភាគីកម្ពុជា និងជប៉ុន មានតម្លៃជាង ១,៧ ពាន់លានដុល្លារ ធ្លាក់ចុះ ៨,០៦ ភាគរយ បណ្តាលមកពីការរីករាលដាលកូវីដ ១៩ និងឥទ្ធិពលនៃសង្គ្រាមពាណិជ្ជកម្មប្រទេសមហាអំណាចទាំង ២។ ហេង ជីវ័ន
ភ្នំពេញៈ ពាណិជ្ជកម្មទ្វេភាគីរវាងកម្ពុជា និងជប៉ុនរយៈពេល ១០ ខែ ឆ្នាំ ២០២០ មានតម្លៃប្រមាណ ១ ៧៤៨,៤ លានដុល្លារ ធ្លាក់ចុះ ៨,០៦ ភាគរយពីចំនួន ១ ៩០១,៨ លានដុល្លារកាលពីរយៈពេល ១០ ខែ ឆ្នាំ ២០១៩ ដោយធុរជនក្នុងស្រុក និងអ្នកស្រាវជ្រាវជឿថា បណ្តាលមកពីការរីករាលដាលកូវីដ១៩ និងឥទ្ធិពលនៃសង្គ្រាមពាណិជ្ជកម្មប្រទេសមហាអំណាចទាំង ២។
ទិន្នន័យពីអង្គការពាណិជ្ជកម្មក្រៅប្រទេសជប៉ុន (Jetro) បង្ហាញថា ក្នុងរយៈពេល ១០ ខែដំបូងឆ្នាំ ២០២០ ការនាំទំនិញពីកម្ពុជាទៅជប៉ុនមានតម្លៃ ១៣៥៨,២ លានដុល្លារធ្លាក់ចុះ ៦,៨ ភាគរយធៀបនឹងរយៈពេល ១០ ខែ ឆ្នាំ ២០១៩ និងការនាំចូលពីប្រទេសជប៉ុនមានតម្លៃ ៣៩០,២៦ លានដុល្លារធ្លាក់ចុះ ១២,៣ ភាគរយ។
សម្រាប់ខែតុលា ឆ្នាំ ២០២០ ការនាំទំនិញពីកម្ពុជាទៅជប៉ុនមានតម្លៃ ១៤៧,៥៣ លានដុល្លារធ្លាក់ចុះ ១៦ ភាគរយ និងការនាំចូលពីជប៉ុនមានតម្លៃ ៥៩,៩២ លានដុល្លារកើនឡើង ៩,៣ ភាគរយ។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃចន្ទថា ក្រៅពីកត្តាចម្បងបណ្តាលមកពីការរីករាលដាលជំងឺកូវីដ-១៩ ឥទ្ធិពលនៃជម្លោះពាណិជ្ជកម្មរវាងចិន និងអាមេរិកក៏បានជះឥទ្ធិពលដល់ការនាំចេញពីកម្ពុជាខ្លះៗដែរ។ លោកបន្ថែមថា ទន្ទឹមនឹងការធ្លាក់ចុះទំហំពាណិជ្ជកម្មអន្តរជាតិនេះគេក៏ត្រូវដឹងថា ការផលិតដើម្បីផ្គត់ផ្គង់តម្រូវការក្នុងប្រទេសនីមួយៗ ពិសេសផលិតផលកសិកម្មបានកើនឡើងជាលំដាប់។
លោកថ្លែងថា៖ «នេះជាលទ្ធផលដែលកើតនៅគ្រប់ប្រទេសលើពិភពលោក ដោយគ្រប់គ្នាសុទ្ធតែមិនចង់ចំណាយ ហេតុនេះការនាំចេញ នាំចូលផលិតផលពីក្រៅប្រទេសក៏ធ្លាក់ចុះទៅតាមនោះដែរ»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ថា ការផ្ទុះឡើងកូវីដ ១៩ បានធ្វើឱ្យសេដ្ឋកិច្ចក៏ដូចជាសកម្មភាពនៃការដោះដូរទំនិញជាលក្ខណៈអន្តរជាតិត្រូវធ្លាក់ចុះនៅគ្រប់ប្រទេស។ លោកបន្តថា ទោះយ៉ាងណាការប្រកាសចាប់ផ្តើមចាក់វ៉ាក់សាំងឱ្យប្រជាជនរបស់ប្រទេសជាច្រើនកំពុងរួមចំណែកធ្វើឱ្យសកម្មភាពពាណិជ្ជកម្មពិភពលោកចាប់ផ្តើមមានសម្ទុះឡើងវិញហើយនៅពេលនេះ។
លោកបន្ថែមថា៖ «សម្រាប់ពាណិជ្ជកម្មជាមួយជប៉ុន ខ្ញុំគិតថានឹងកើនឡើងវិញនៅពេលដែលជើងហោះហើរផ្ទាល់រវាងប្រទេសទាំង ២ បើកដំណើរការ។ ជប៉ុននៅតែជាទីផ្សារដ៏មានសក្តានុពលសម្រាប់ផលិតផលកម្ពុជា»។
យោងតាមលោក លឹម ហេង ផលិតផលដែលកម្ពុជានាំចេញទៅកាន់ប្រទេសជប៉ុនមានដូចជា សម្លៀកបំពាក់ គ្រឿងបង្គុំអគ្គិសនី និងគ្រឿងបង្គុំអេឡិចត្រូនិក ជាដើម។
យោងតាមរបាយការណ៍ស្តីពី «វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ ២០២០ និងទស្សនវិស័យឆ្នាំ ២០២១» របស់ធនាគារជាតិនៃកម្ពុជាកាលពីសប្តាហ៍មុនឱ្យដឹងថា តាមការព្យាករកំណើនសេដ្ឋកិច្ចកម្ពុជានឹងអាចងើបឡើងវិញក្នុងរង្វង់ ៤ ភាគរយក្នុងឆ្នាំ ២០២១ នេះប្រសិនបើថ្នាំបង្ការមានប្រសិទ្ធភាពអាចទប់ស្កាត់ការរីករាលដាលជំងឺកូវីដ ១៩។ ការធ្វើពិពិធកម្មមូលដ្ឋានសេដ្ឋកិច្ច និងការអនុវត្តយុទ្ធសាស្ត្រអភិវឌ្ឍន៍វិស័យឧស្សាហកម្មនឹងក្លាយជាផ្នែកមួយដ៏សំខាន់ក្នុងការជួយឱ្យសេដ្ឋកិច្ចកម្ពុជាងើបឡើងវិញកាន់តែឆាប់រហ័សពីវិបត្តិនាពេលបច្ចុប្បន្ន៕ LA
