ភ្នំពេញៈ ពាណិជ្ជកម្មទ្វេភាគីរវាងកម្ពុជា និងថៃ នៅតែទទួលបានកំណើនវិជ្ជមាននៅឆមាសទី ១ ឆ្នាំនេះ ដោយមានកំណើនជាង ២ ភាគរយ ទោះបីជាការរីករាលដាលជំងឺកូវីដ ១៩ បង្កផលប៉ះពាល់ដល់សេដ្ឋកិច្ចពិភពលោក និងតំបន់ក៏ដោយ។
តួលេខនាយកដ្ឋានពាណិជ្ជកម្មបរទេសរបស់ប្រទេសថៃ ដែលបានរាយការណ៍ដោយកាសែតបាងកកប៉ុស្ដិ៍បានបង្ហាញថា ដោយសារតែការរីករាលដាលជំងឺកូវីដ ១៩ ពាណិជ្ជកម្មឆ្លងព្រំដែនរបស់ប្រទេសថៃជាមួយបណ្តាប្រទេសផ្សេងៗបានធ្លាក់ចុះ ៩,១៨ ភាគរយ ធៀបនឹងរយៈពេលដូចគ្នាកាលពីឆ្នាំមុននៅឆមាសទី ១ ដោយសារតែវិធានការបិទប្រទេស និងការថមថយសេដ្ឋកិច្ចរបស់បណ្ដាប្រទេសជិតខាង។
ទោះជាយ៉ាងណា ពាណិជ្ជកម្មទ្វេភាគីរវាងថៃ និងកម្ពុជា បានកើនឡើងបន្តិច ២,២៧ ភាគរយ ខណៈដែលពាណិជ្ជកម្មទ្វេភាគីរវាងប្រទេសថៃ និងម៉ាឡេស៊ី ធ្លាក់ចុះ ២៦,៨ ភាគរយ ប្រទេសឡាវ ធ្លាក់ចុះ ៧,០៩ ភាគរយ និងជាមួយប្រទេសមីយ៉ាន់ម៉ា ធ្លាក់ ១៣,៧ ភាគរយ។
លោក Keerati Rushchano អគ្គនាយកនាយកដ្ឋានពាណិជ្ជកម្មបរទេសបានឲ្យដឹងថា ជំងឺកូវីដ ១៩ និងការដាក់វិធានការបិទប្រទេសដើម្បីទប់ស្កាត់ការរីករាលដាលបានប៉ះពាល់ដល់ពាណិជ្ជកម្ម និងទេសចរណ៍ ព្រមទាំងសេដ្ឋកិច្ចជារួមផងដែរ ទាំងនៅក្នុងប្រទេសថៃ និងបណ្ដាប្រទេសជិតខាង។
លោក លឹម ហេង អនុប្រធានសភាពាណិជ្ជកម្មកម្ពុជាបានបញ្ជាក់ថា ទោះបីជាមេដឹកនាំរបស់ប្រទេសទាំង ២ បានរឹតបន្តឹងលើការធ្វើដំណើរទៅវិញទៅមករវាងប្រទេសទាំង ២ ក៏ដោយ ក៏ការផ្លាស់ប្តូរទំនិញនៅតែបើកចំហ។
លោកបន្តថា៖ «យើងមិនមានបញ្ហាណាមួយលើការនាំចេញ និងនាំចូលទំនិញរវាងប្រទេសយើងទាំង ២ ទេ។ រដ្ឋាភិបាលរឹតបន្តឹងតែទៅលើការធ្វើដំណើររបស់ប្រជាជនដែលជាកិច្ចខិតខំប្រឹងប្រែងក្នុងការប្រយុទ្ធប្រឆាំងការរីករាលដាលរបស់វីរុសនេះតែប៉ុណ្ណោះ»។
លោក វ៉ា ស៊ឹមសូរិយា អនុរដ្ឋលេខាធិការក្រសួងសាធារណការ និងដឹកជញ្ជូន បានប្រាប់ភ្នំពេញប៉ុស្ដិ៍ក្នុងពេលថ្មីៗនេះថា ថៃនឹងផ្ដល់ដែកសម្រាប់ផ្លូវរថភ្លើងប្រវែង ១៤០ គីឡូម៉ែត្រនៅខែសីហា នេះ ដើម្បីកែលម្អមធ្យោបាយការដឹកជញ្ជូនទំនិញនៃប្រទេសទាំង ២។
លោកបន្ថែមថា បន្ទាប់ពីផ្លូវដែកភាគខាងជើងត្រូវបានកែលម្អ វានឹងអាចដឹកជញ្ជូនបានទម្ងន់ ២០ តោន និងបង្កើនល្បឿនបានរហូតដល់ ៧០ គីឡូម៉ែត្រក្នុង ១ ម៉ោង ធៀបនឹងល្បឿនបច្ចុប្បន្នត្រឹមតែ ៣០ គីឡូម៉ែត្រក្នុង ១ ម៉ោង។
ទំហំពាណិជ្ជកម្មសរុបរវាងកម្ពុជា និងថៃបានកើនឡើងដល់ ៩,៤១ ពាន់លានដុល្លារ កាលពីឆ្នាំ ២០១៩ កើនឡើង ១២ ភាគរយធៀបនឹង ៨,៣៨ ពាន់លានដុល្លារ កាលពីឆ្នាំ ២០១៨។
ភាគច្រើននៃទំនិញនាំចេញរបស់កម្ពុជាទៅកាន់ប្រទេសថៃ គឺត្បូងមានតម្លៃ គ្រឿងអលង្ការ ផលិតផលវត្ថុធាតុដើមកសិកម្ម និងអាលុយមីញ៉ូម៕ LA