.jpg)
ពោតជាផលិតផលមួយក្នុងចំណោមផលិតផលជាច្រើនទៀត ដែលនាំចេញទៅប្រទេសក្នុងតំបន់អាស៊ាន។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ការផ្លាស់ប្តូរពាណិជ្ជកម្មរវាងកម្ពុជាជាមួយបណ្តារដ្ឋជាសមាជិកអាស៊ានបានកើនឡើងយ៉ាងខ្លាំងដល់ ១១,៣៣០ ពាន់លានដុល្លារកាលពីឆ្នាំមុន ទោះបីជាការរឹតបន្តឹងជើងហោះហើរ និងការធ្វើដំណើរឆ្លងកាត់ព្រំដែនក៏ដោយ។
យោងតាមទិន្នន័យចុងក្រោយបានពីក្រសួងពាណិជ្ជកម្មកម្ពុជាពាណិជ្ជកម្មទ្វេភាគីរវាងប្រទេសកម្ពុជា និងបណ្តាប្រទេសសមាជិកអាស៊ានបានកើនឡើង ២២,៤២ ភាគរយមានចំនួន ១១,៣៣០ ពាន់លានដុល្លារធៀបនឹង ៩,២៥៤ ពាន់លានដុល្លារកាលពីឆ្នាំ ២០១៩។ ការផ្លាស់ប្តូរពាណិជ្ជកម្មភាគច្រើនជាមួយប្រទេសជាប់ព្រំដែនគឺ ថៃ និងវៀតណាម។
លោក លឹម ហេង អនុប្រធានសភាពាណិជ្ជកម្មកម្ពុជាបានកត់សម្គាល់ថា ក្នុងរយៈពេលជាច្រើនឆ្នាំមកនេះ កម្ពុជាកំពុងនាំចេញផលិតផលកសិកម្មច្រើនប្រភេទ ដូចជា ស្រូវ ដំឡូងមី ពោត និងកៅស៊ូ ទៅប្រទេសក្នុងតំបន់អាស៊ាន ជាពិសេស ដូចជាថៃ និងវៀតណាម ខណៈដែលប្រទេសកម្ពុជាបាននាំចូលភាគច្រើន ដូចជា ទំនិញប្រើប្រាស់ អាហារ និងភេសជ្ជៈ និងសម្ភារសំណង់។
លោកថ្លែងថា៖ «ទោះបីជាប្រទេសយើងអាចកែច្នៃទំនិញប្រើប្រាស់មួយចំនួនក៏ដោយ ប៉ុន្តែសមត្ថភាពរបស់យើងនៅមានកម្រិតដែលតម្រូវឱ្យនាំចូលយ៉ាងច្រើនជាពិសេសពីបណ្ដាប្រទេសជិតខាង»។
លោកបន្តថា៖ «យើងជំរុញដល់វិនិយោគិនបរទេសបន្ថែមទៀតឱ្យវិនិយោគលើឧស្សាហកម្មកែច្នៃ ដែលអាចបង្កើនសមត្ថភាពផលិតក្នុងស្រុក និងគុណភាពទំនិញ ដែលអាចប្រកួតប្រជែងជាមួយទំនិញនាំចូល និងជំរុញការនាំចេញ»។
តាមរបាយការណ៍ការនាំចេញសរុបរបស់កម្ពុជាទៅកាន់បណ្តាប្រទេសសមាជិកអាស៊ានទាំងអស់មានតម្លៃ ៣,៧២៣ ពាន់លានដុល្លារបានកើនឡើងយ៉ាងខ្លាំង ១៨៦ ភាគរយ ខណៈដែលការនាំចូលមានតម្លៃ ៧,៦០៧ ពាន់លានដុល្លារ ធ្លាក់ចុះបន្តិច ៤,៣៣ ភាគរយ។
លោក ហ៊ុន ឡាក់ អគ្គនាយកក្រុមហ៊ុន Mekong Oryza Trading Co Ltd បានប្រាប់ភ្នំពេញប៉ុស្ដិ៍ថា ការកើនឡើងការផ្លាស់ប្តូរពាណិជ្ជកម្មជាមួយប្លុកនេះ ឆ្លុះបញ្ចាំងពីការប្ដេជ្ញាចិត្តរបស់មេដឹកនាំរបស់តំបន់នេះក្នុងការលើកកម្ពស់ការផ្លាស់ប្តូរទំនិញ និងពាណិជ្ជកម្មឆ្លងកាត់ព្រំដែន។
លោកថ្លែងថា៖ «វាជាសញ្ញាវិជ្ជមានមួយ សម្រាប់យើងក្នុងការជំរុញការនាំចេញកាន់តែច្រើនទៅកាន់ដៃគូពាណិជ្ជកម្មរបស់យើង។ ទោះយ៉ាងណា អ្វីដែលយើងចង់លើកទឹកចិត្ត យើងគួរតែនាំចេញផលិតផលសម្រេចជាជាងវត្ថុធាតុដើម ខណៈយើងខាតបង់ជាច្រើននៃតម្លៃបន្ថែម និងអត្ថប្រយោជន៍»។
អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា (GDCE) បានឱ្យដឹងកាលពីថ្ងៃទី ២៤ ខែធ្នូថា ក្រុមហ៊ុននាំចូល និងនាំចេញទាំងអស់របស់ប្រទេសកម្ពុជា អាចដាក់ពាក្យសុំផ្លាស់ប្តូរទិន្នន័យប្រតិវេទន៍គយអាស៊ាន (ACDD) ទម្រង់អេឡិចត្រូនិកតាមរយៈប្រព័ន្ធបញ្ជរតែមួយអាស៊ាន (ASW) ឯកសារនេះនឹងត្រូវបានទទួលស្គាល់ដោយអាជ្ញាធររបស់រដ្ឋជាសមាជិកអាស៊ានទាំង ១០ ដែលជួយសម្រួលការត្រួតពិនិត្យពាណិជ្ជកម្ម និងគយនៅក្នុងតំបន់នេះ។
GDCE បានឱ្យដឹងថា ខ្លួននឹងអនុវត្ត «ការផ្លាស់ប្តូរ ACDD និងពាណិជ្ជកម្មអាស៊ាននៅក្នុងកិច្ចព្រមព្រៀងទំនិញ (ATIGA) អេឡិចត្រូនិកទម្រង់ D ដែលត្រូវបានចេញដោយអាជ្ញាធររបស់សមាជិកអាស៊ាន។
លោក លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា គំនិតផ្តួចផ្ដើមប្រព័ន្ធគ្មានក្រដាសស្នាមនេះ បង្ហាញការរីកចម្រើនយ៉ាងខ្លាំងសម្រាប់ការលើកកម្ពស់ពាណិជ្ជកម្មឆ្លងកាត់ព្រំដែន និងការជួយសម្រួលពាណិជ្ជកម្មសម្រាប់វិស័យឯកជន កំពុងអំពាវនាវឱ្យមាន។
លោកអះអាងថា ការប្រើប្រាស់បច្ចេកវិទ្យាបានកាត់បន្ថយទំនាក់ទំនងដោយផ្ទាល់។
លោកបានបញ្ជាក់ទៀតថា៖ «យើងចង់ឃើញប្រព័ន្ធគ្មានក្រដាសស្នាមប្រភេទនេះ ត្រូវបានដាក់ឱ្យប្រើប្រាស់មិនគ្រាន់តែនៅក្នុងចំណោមរដ្ឋជាសមាជិកអាស៊ានប៉ុណ្ណោះទេ ប៉ុន្តែថែមទាំងនៅតាមបណ្ដាប្រទេសផ្សេងៗទៀតផងដែរ»៕LA
