.jpg)
កម្មការិនីកំពុងធ្វើការនៅក្នុងរោងចក្រកាត់ដេរមួយក្នុងរាជធានីភ្នំពេញ។ រូបថត ភ្នំពេញ ប៉ុស្តិ៍
ភ្នំពេញ៖ ទំហំពាណិជ្ជកម្មទ្វេភាគីកម្ពុជា-អាមេរិក រយៈពេល ២ ខែដើមឆ្នាំ ២០២១ បានបន្តសញ្ញាវិជ្ជមាន ដោយមានតម្លៃជិត ១,២ ពាន់លានដុល្លារ កើនជាង ៤ ភាគរយធៀបនឹងរយៈពេលដូចគ្នាឆ្នាំ ២០២០។
ទិន្នន័យពីការិយាល័យពាណិជ្ជកម្មអាមេរិក នាពេលថ្មីៗនេះឱ្យដឹងថា ក្នុងខែមករា និងកុម្ភៈ ឆ្នាំ ២០២១ ការផ្លាស់ប្តូរទំនិញរវាងកម្ពុជា និងអាមេរិក មានទឹកប្រាក់សរុប ១ ១៨៧,១ លានដុល្លារ កើន ៤,៤៤ ភាគរយ ធៀបនឹងទឹកប្រាក់ ១ ១៣៦,៦ លានដុល្លារ កាលពីរយៈពេល ២ ខែដើមឆ្នាំមុន។
នៅក្នុងទឹកប្រាក់ខាងលើ ការនាំចេញទំនិញពីកម្ពុជាទៅអាមេរិកមានតម្លៃ ១ ១២០ លានដុល្លារ កើនឡើង ៣,៣៨ ភាគរយពីចំនួន ១ ០៨៣,៣ លានដុល្លារ និងការនាំទំនិញពីអាមេរិកមកកម្ពុជាមានតម្លៃ ៦៧,១ លានដុល្លារ កើនឡើង ២៦,៣៦ ភាគរយពីចំនួន ៥៣,១ លានដុល្លារ។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ បានប្រាប់ ភ្នំពេញ ប៉ុស្តិ៍ កាលពីថ្ងៃទី ១២ ខែមេសាថា អាមេរិក គឺជាទីផ្សារមានសក្តានុពលធំបំផុតសម្រាប់ផលិតផលវាយនភណ្ឌកម្ពុជា ដោយរាប់ចាប់តាំងពីសម្លៀកបំពាក់ ស្បែកជើង ផលិតផលធ្វើដំណើរ គ្រឿងបង្គុំអគ្គិសនី ព្រមទាំងកង់ផងដែរ។
លោកបន្ថែមថា កំណើនទំហំពាណិជ្ជកម្ម ពិសេសការនាំចេញនៅពេលនេះ គឺពិតជាមានសារៈសំខាន់ណាស់សម្រាប់សេដ្ឋកិច្ចកម្ពុជាក្នុងបរិបទដែលវិបត្តិកូវីដ ១៩ បានធ្វើឱ្យការធ្វើពាណិជ្ជកម្មជាលក្ខណៈអន្តរជាតិភាគច្រើនត្រូវជួបបញ្ហា។
លោកនិយាយថា៖ «កំណើននៃការនាំចេញ និងការដាក់ចេញនូវយុទ្ធសាស្រ្តជាបន្តបន្ទាប់របស់រដ្ឋាភិបាលនឹងធ្វើឱ្យកម្ពុជាមានផលិតផលកាន់តែច្រើនសម្រាប់នាំចេញទៅកាន់ទីផ្សារអន្តរជាតិ ពិសេសទីផ្សារអាមេរិក»។
លោកលើកឡើងទៀតថា បច្ចុប្បន្ននេះកម្ពុជាក៏បាន និងកំពុងធ្វើពិពិធកម្មសេដ្ឋកិច្ច និងកំណែទម្រង់លើគ្រប់វិស័យផងដែរ។
បើយោងតាមក្រសួងពាណិជ្ជកម្មកម្ពុជា ក្នុងឆ្នាំ ២០២០ អាមេរិក គឺជាទីផ្សារនាំចេញទំនិញធំបំផុតរបស់កម្ពុជា ដែលតាមពីក្រោយដោយប្រទេសចិន ជប៉ុន ចក្រភពអង់គ្លេស កាណាដា និងប្រទេសកូរ៉េ។
កាលពីឆ្នាំ ២០២០ ទំហំពាណិជ្ជកម្មសរុបរវាងប្រទេសទាំង ២ មានតម្លៃ ៦ ៩២១,៣ លានដុល្លារ កើនឡើង ១៧,៨៩ ភាគរយ ធៀបនឹងឆ្នាំ ២០១៩។ ក្នុងនោះការនាំចេញរបស់កម្ពុជាមានតម្លៃ ៦ ៥៧៧,៧ លានដុល្លារ កើន ២២,៧៩ ភាគរយ ចំណែកការនាំពីអាមេរិកមកកម្ពុជាមានតម្លៃ ៣៤៣,៦ លានដុល្លារ ធ្លាក់ ៣៣,១៥ ភាគរយ ពីចំនួន ៥១៤ លានដុល្លារ។ នេះបើតាមការិយាល័យពាណិជ្ជកម្មអាមេរិក៕
