.jpg)
ម៉ាស៊ីនកំពុងលើកទូកុងតឺន័រដាក់លើរថយន្តនៅកំពង់ផែក្រុងព្រះសីហនុ។ ហេង ជីវ័ន
ភ្នំពេញៈ ពាណិជ្ជកម្មទ្វេភាគីកម្ពុជាឥណ្ឌាក្នុងឆ្នាំ ២០២០ មានទឹកប្រាក់ជាង ១៩០ លានដុល្លារ ធ្លាក់ចុះជាង ២៥ ភាគរយបើធៀបនឹងឆ្នាំ ២០១៩ ខណៈបច្ចុប្បន្នកម្ពុជាកំពុងធ្វើការសិក្សាវាយតម្លៃពីលទ្ធភាពជាក់ស្តែង (Feasibility Study) ក្នុងការរៀបចំឱ្យមានកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ឥណ្ឌា។
ទិន្នន័យក្រសួងពាណិជ្ជកម្មកម្ពុជាឱ្យដឹងថា ទំនាក់ទំនងពាណិជ្ជកម្មទ្វេភាគីកម្ពុជា និងឥណ្ឌាក្នុងឆ្នាំ ២០២០ មានតម្លៃសរុប ១៩០,១៣ លានដុល្លារ ធ្លាក់ ២៥,៨១ ភាគរយ ពី ២៥៦,២៦ លានដុល្លារ ក្នុងឆ្នាំ ២០១៩។
ក្នុងនោះការនាំចេញទំនិញពីកម្ពុជាទៅឥណ្ឌាមានតម្លៃ ៦១,៣៦ លានដុល្លារ ធ្លាក់ចុះ ៥,១២ ភាគរយពីចំនួន ៦៤,៦៧ លានដុល្លារ និងការនាំទំនិញពីឥណ្ឌាមកកម្ពុជាមានតម្លៃ ១២៨,៧៧ លានដុល្លារ ធ្លាក់ចុះ ៣២,៩៧ ភាគរយពីចំនួន ១៩១,៥៩ លានដុល្លារ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ កាលពីថ្ងៃទី ២៥ ខែកុម្ភៈថា មុនពេលមានវិបត្តិនៃការឆ្លងរាលដាលជំងឺកូវីដ១៩ ការធ្វើពាណិជ្ជកម្មទ្វេភាគីកម្ពុជា និងឥណ្ឌាបានកើនឡើងជាបន្តបន្ទាប់ ដោយឥណ្ឌា គឺជាទីផ្សារដ៏មានសក្ដានុពលមួយសម្រាប់កម្ពុជា ព្រោះឥណ្ឌាជាប្រទេសធំ មានប្រជាជនច្រើន និងមានកម្លាំងទិញសកម្មខ្លាំង ហើយតម្រូវការផលិតផលរបស់ឥណ្ឌាក៏ស្របនឹងអ្វីដែលកម្ពុជាអាចផលិតបានផងដែរ។
លោកបន្តថា ភាគច្រើននៃការដោះដូរពាណិជ្ជកម្មរវាងប្រទេសទាំង ២ គឺជាទំនិញប្រើប្រាស់ ផលិតផលកសិកម្ម ឧស្សាហកម្មធុនស្រាល និងសេវាកម្មបច្ចេកវិទ្យាមួយចំនួន។
លោកបន្ថែមថា ជាមួយសក្តានុពលទាំងអស់នេះបច្ចុប្បន្នកម្ពុជាក៏បាននិងកំពុងធ្វើការសិក្សាវាយតម្លៃលទ្ធភាពជាក់ស្តែងក្នុងការរៀបចំឱ្យមានកិច្ចព្រមព្រៀងពាណិជ្ជកម្មសេរីទ្វេភាគី (FTA) ជាមួយឥណ្ឌាផងដែរ។ កិច្ចការនេះបានរៀបចំធ្វើឡើងដោយមានកិច្ចសហការជាដៃគូជាមួយវិទ្យាស្ថានស្រាវជ្រាវឯករាជ្យ «ERIA»។
លោកថ្លែងថា៖ «ជាក្តីរំពឹងទុក ទំនាក់ទំនងដែលកាន់តែជិតស្និទ្ធនឹងនាំមកនូវប្រយោជន៍ទាំងវិស័យពាណិជ្ជកម្មទំនិញ សេវាកម្ម និងវិនិយោគ រួមទាំងការផ្លាស់ប្តូរផ្នែកបច្ចេកវិទ្យាសម្រាប់ប្រទេសកម្ពុជា»។
យោងតាមក្រសួងការបរទេស និងសហប្រតិបត្តិការអន្តរជាតិ ពាណិជ្ជកម្មទ្វេភាគីកម្ពុជា-ឥណ្ឌាបានកើនពី ២០៥ លានដុល្លារ នៅក្នុងឆ្នាំ ២០១៨ ដល់ចំនួន ២៥៥ លានដុល្លារ ក្នុងឆ្នាំ ២០១៩។
កាលពីថ្ងៃទី ១៨ ខែមករា ក្នុងជំនួបជាមួយលោកស្រី Devyani Uttamkhobragade ឯកអគ្គរដ្ឋទូតថ្មីឥណ្ឌាប្រចាំនៅកម្ពុជា លោក ហ៊ុន សែន នាយករដ្ឋមន្ត្រីកម្ពុជាបានស្នើឱ្យឥណ្ឌាពិនិត្យលទ្ធភាពធ្វើកិច្ចព្រមព្រៀងពាណិជ្ជកម្មសេរីជាមួយនឹងកម្ពុជា ដើម្បីពង្រីកការវិនិយោគ និងពាណិជ្ជកម្មរវាងប្រទេសទាំង ២។
លោកបន្តថា គន្លឹះល្អមួយដែលនាំដល់ទំនាក់ទំនងល្អរវាងប្រទេសទាំង ២ គឺការជំរុញការវិនិយោគ និងពាណិជ្ជកម្មរវាងប្រទេសទាំង ២ ឱ្យកាន់តែធំ តាមរយៈលទ្ធភាពបង្កើតកិច្ចព្រមព្រៀងសហប្រតិបត្តិការពាណិជ្ជកម្មសេរីរវាងប្រទេសទាំង ២ ឱ្យបានឆាប់។
យោងតាមលោក សុវិជាតិ បន្ទាប់ពីទទួលបាន FTA ជាមួយចិនកាលពីឆ្នាំ ២០២០ ក្នុងឆ្នាំ ២០២១ នេះកម្ពុជារំពឹងថានឹងសម្រេចបាន FTA ជាមួយប្រទេសកូរ៉េខាងត្បូង។ ក្រៅពីនោះកម្ពុជាក៏បាននិងកំពុងធ្វើការសិក្សាពីលទ្ធភាពក្នុងការបង្កើតនូវកិច្ចព្រមព្រៀងពាណិជ្ជកម្មសេរីជាមួយប្រទេសមួយចំនួនទៀតដូចជា ឥណ្ឌា អង់គ្លេស អាមេរិក ជប៉ុន និងសហភាពសេដ្ឋកិច្ចអឺរ៉ុប-អាស៊ី (EAEU) ជាដើម។
អនុប្រធានសភាពាណិជ្ជកម្មកម្ពុជាលោក លឹម ហេង កាលពីខែមករាបានប្រាប់ភ្នំពេញប៉ុស្តិ៍ថា ពាណិជ្ជកម្មទ្វេភាគីកម្ពុជា និងឥណ្ឌានៅមិនទាន់ធំទេ ហេតុនេះបើមានកិច្ចព្រមព្រៀងពាណិជ្ជកម្មសេរីទ្វេភាគី វានឹងធ្វើឱ្យកម្ពុជាទទួលបានអត្ថប្រយោជន៍ច្រើន ព្រោះឥណ្ឌាជាប្រទេសធំមានប្រជាជនច្រើន និងមានបច្ចេកវិទ្យារីកចម្រើន។
លោកថ្លែងថា៖ «នៅពេលមាន FTA វានឹងមិនត្រឹមតែអាចធ្វើឱ្យមានលំហូរពាណិជ្ជកម្មរវាងប្រទេសទាំង ២ កើននោះទេ ប៉ុន្តែវាក៏នឹងក្លាយជាឱកាសសម្រាប់កម្ពុជាក្នុងការទាក់ទាញវិនិយោគិនបរទេសឱ្យចូលមកបណ្តាក់ទុននៅកម្ពុជា ដើម្បីផលិតផលិតផលដែលមានតម្រូវការខ្ពស់នៅឥណ្ឌា»។
ការធ្វើពាណិជ្ជកម្មអន្តរជាតិរបស់កម្ពុជាក្នុងឆ្នាំ ២០២០ មានតម្លៃសរុប ៣៥ ៨០៥,៨៥ លានដុល្លារ កើនឡើង ២,៥២ ភាគរយ ធៀបនឹងឆ្នាំ ២០១៩។ នេះបើយោងតាមទិន្នន័យពីក្រសួងពាណិជ្ជកម្ម៕
