ភ្នំពេញៈ ទំហំពាណិជ្ជកម្មទ្វេភាគីរវាងប្រទេស កម្ពុជា និងអាមេរិក នៅឆ្នាំ ២០១៨ បានកើនឡើង ២៧ ភាគរយរហូតដល់ជាង ៣ ពាន់លានដុល្លារ។ នេះបើយោងតាមរដ្ឋមន្ត្រីក្រសួងពាណិជ្ជកម្មកម្ពុជាបានឲ្យដឹងកាលពីថ្ងៃចន្ទ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានឲ្យដឹងថា ពាណិជ្ជកម្មទ្វេភាគីរវាង កម្ពុជា និងអាមេរិក កាលពីឆ្នាំ ២០១៨ បានកើនឡើងចំនួនប្រមាណ ៧០០ លានដុល្លារដល់ ៣,៣១ ពាន់លានដុល្លារ បើធៀបនឹងជាង ២,៦១ ពាន់លានដុល្លារកាលពីឆ្នាំ ២០១៧។
លោក ប៉ាន សូរស័ក្តិ បានឲ្យដឹងក្នុងកិច្ចប្រជុំក្រុមប្រឹក្សាចម្រុះលើកទី ៥ ស្តីពីកិច្ចព្រមព្រៀងក្របខ័ណ្ឌវិនិយោគនិងពាណិជ្ជកម្ម រវាងរដ្ឋាភិបាលកម្ពុជា និងរដ្ឋាភិបាលអាមេរិក កាលពីថ្ងៃទី ២៨ ខែមករា ថា អាមេរិកគឺជាទីផ្សារធំទី ២ របស់កម្ពុជា ដោយកាលពីឆ្នាំ ២០១៨ នៅក្នុងទំហំពាណិជ្ជកម្មទ្វេភាគីនេះ ការនាំចេញរបស់កម្ពុជាទៅអាមេរិកមានតម្លៃ ២,៨៨ ពាន់លានដុល្លារ ខណៈការនាំចូលរបស់កម្ពុជាពីអាមេរិកមានតម្លៃ ៤២៦ លានដុល្លារ។
លោកបន្តថា ការទទួលបានប្រព័ន្ធអនុគ្រោះ GSP ពីអាមេរិកសម្រាប់ទំនិញទាក់ទងនឹងការធ្វើដំណើរបានចូលរួមចំណែកយ៉ាងច្រើននៅក្នុងការជួយឲ្យទំហំវិនិយោគរវាងប្រទេសទាំង ២ កើនឡើងជាលំដាប់។
យោងតាមក្រសួងពាណិជ្ជកម្ម កាលពីឆ្នាំ ២០១៨ ការនាំចេញសរុបរបស់កម្ពុជាទៅទីផ្សារអន្តរជាតិមានទឹកប្រាក់ជាង ១២,១ ពាន់លានដុល្លារកើនឡើង ១០ ភាគរយបើធៀបនឹងឆ្នាំ ២០១៧។ ក្រសួងនេះព្យាករថា ការនាំចេញរបស់កម្ពុជាអាចនឹងកើនឡើងដល់ ១៣ ពាន់លានដុល្លារក្នុងឆ្នាំ ២០១៩ នេះ។ ទោះបីយ៉ាងនេះក្តីតាមរបាយការណ៍របស់ធនាគារជាតិនៃកម្ពុជា កម្ពុជាបាននាំចេញសរុបបានជាង ១៣ ពាន់លានដុល្លាររួចទៅហើយកាលពីឆ្នាំ ២០១៨៕ LA