The Phnom Penh Post Search

Search form




Logo of Phnom Penh Post newspaper Phnom Penh Post - ពាណិជ្ជកម្ម-ទេសចរ​ច្រក​ព្រំដែន​កម្ពុជា​ថៃ កាន់តែ​ស្ទុះ​ដោយសារ​ការ​បន្ថែម​ម៉ោង

ពាណិជ្ជកម្ម-ទេសចរ​ច្រក​ព្រំដែន​កម្ពុជា​ថៃ កាន់តែ​ស្ទុះ​ដោយសារ​ការ​បន្ថែម​ម៉ោង

ពាណិជ្ជកម្ម-ទេសចរ​ច្រក​ព្រំដែន​កម្ពុជា​ថៃ កាន់តែ​ស្ទុះ​ដោយសារ​ការ​បន្ថែម​ម៉ោង

20140319_11
អ្នករត់ម៉ូតូឌុបកំពុងអង្គុយរង់ចាំអ្នកជិះនៅមុខខ្លោងទ្វារច្រកអន្តរជាតិដូង ក្នុងខេត្តបាត់ដំបងនាពេលកន្លងមក ហេង ជីវ័ន

ភ្នំពេញៈ បន្ទាប់ពី​កម្ពុជា និង​ថៃ​បាន​បន្ថែម​ម៉ោង​ចរាចរណ៍​តាម​ច្រក​ព្រំដែន​រវាង​ប្រទេស​ទាំង ពីរ​រយៈពេល​ជាង​ពីរ​ខែ​កន្លង​មក​នេះ​ធ្វើឲ្យ​ការ​ចរាចរណ៍​ទំនិញ និង​ភ្ញៀវទេសចរ​កាន់តែ​មាន​សកម្មភាព​។

រដ្ឋាភិបាល​ទាំង​ពីរ​ប្រទេស អនុម័ត​ឲ្យ​បន្ថែម​ម៉ោង​នៃ​ការ​បើក​ច្រក​ទ្វារ​ព្រំដែន​ពី​ម៉ោង​៦​ព្រឹក ដល់​ម៉ោង​១០​យប់​តាំងពី​ពាក់កណ្តាល​ខែ​មករា​មក​។

បើ​តាម​ការ​ឲ្យ ដឹង​ពី​មន្ត្រី​ប្រចាំ​ខេត្ត​ជាប់​ពំ្រដែន ការ​បន្ថែម​ម៉ោង​នៃ​ការ​បើក​ច្រក​ទ្វារ​ព្រំដែន​នេះ​បាន​កំពុង​សម្រួល​ដល់ ការ​ចេញ​ចូល​របស់​ភ្ញៀវទេសចរ ក៏​ដូចជា​ការ​ធ្វើ​ពាណិជ្ជកម្ម​របស់​អាជីវករ​កម្ពុជា​ផង​ដែរ​។

ច្រក ទ្វារ​ទាំង​៥​ដែល​អនុវត្ត​ការ​បន្ថែម​ម៉ោង​នេះ​រួមមាន ច្រក​ព្រំដែន​អន្តរជាតិ​អូរស្មាច់​នៃ​ខេត្ត​ឧត្តរមានជ័យ ច្រក​ទ្វារ​អន្តរជាតិ​ប៉ោយប៉ែត​នៃ​ខេត្ត​បន្ទាយមានជ័យ ច្រក​ទ្វារ​ព្រំដែន​អន្តរជាតិ​ដូង​ក្នុង​ខេត្ត​បាត់ដំបង ច្រក​ទ្វារ​ព្រំដែន​អន្តរជាតិ​ព្រំដែន​នៅ​ខេត្ត​ប៉ៃលិន និង ច្រក​ទ្វារ​ព្រំដែន​អន្តរជាតិ​ចាំយាម​ក្នុង​ខេត្ត​កោះកុង។

លោក គោស៊ុំ សារឿត អភិបាល​ខេត្ត​បន្ទាយមានជ័យ​បាន​ប្រាប់​មក​ភ្នំពេញ ប៉ុស្តិ៍ ម្សិលមិញ​ថា ចាប់​តាំងពី​បើក​ច្រក​ទ្វារ​ចរាចរណ៍​ទំនិញ និង​ភ្ញៀវ​ទេសចរ​មាន​ភាព​ប្រសើរ​ជាង​មុន​។ លោក​បាន​ឲ្យ​ដឹង​ថា ជា​មធ្យម​ភ្ញៀវ​ចេញ​ចូល​តាម​ច្រក​ទ្វារ​នេះ​ជា​រៀងរាល់​ថ្ងៃ​មាន​ចំនួន ពី​១ ៦០០​ទៅ​១ ៧០០​នាក់​។​

លោក​ថ្លែង​ថា​៖ «​ការ​បើក​ដល់​ម៉ោង​១០​យប់​នេះ​បាន​សម្រួល​ដល់​ធុរកិច្ចជន​ទាំងអស់។ ពី​មុន​ការ​លំបាក គឺ​អាជីវករ​ផ្សារ​រុងគ្លឿ​មិន​អាច​លក់ដូរ​បាន​យូរ គាត់​ត្រូវ​ប្រញាប់​ត្រឡប់​មក​វិញ​។ ឥឡូវ​គាត់​លក់​បាន​យូរ​ជាង​មុន»​។ លោក​បន្ត​ថា ការ​បន្ថែម​ម៉ោង​នេះ​ក៏​ជួយ​ដល់​ភ្ញៀវ​ទេសចរ​អន្តរជាតិ​ចេញ​ចូល​បាន ច្រើន និង​ស្រួល​ជាង​មុន​ដែរ​។

ច្រក​ទ្វារ​អន្តរជាតិ​ប៉ោយប៉ែត​ជា​ច្រក​ទ្វារ​សំខាន់​បម្រើ​ដល់​ការ​ផ្លាស់ប្តូរ​ទំនិញ​រវាង​ប្រទេស​ទាំង​ពីរ​នេះ។

ពាក់ព័ន្ធ​នឹង​លំហូរ​ទំនិញ​នេះ​ដែរ​លោក​គោស៊ុំ សារឿត បាន​និយាយ​ថា បើ​ទោះ​បី​ជា​ការ​ដឹកទំនិញ​ពី​កម្ពុជា​ទៅ​ប្រទេស​ថៃ​មាន​ចំនួន​តិចតួច ជាង​ទំនិញ ដែល​ត្រូវ​បាន​ដឹក​ពី​ថៃ​ក៏ដោយ ក៏​លោក​យល់​ថា ប្រជាពលរដ្ឋ​ខ្មែរ​នៅ​តែ​ទទួល​ប្រយោជន៍​ច្រើន​ពី​ការ​បន្ថែម​ម៉ោង នេះ​។

លោក​បាន​បន្ត​ថា​៖ «​អាជីវករ​ខ្មែរ​អាច​ធ្វើការ​រកស៊ី​បាន​ច្រើន​ម៉ោង​ជាង​មុន​ហើយ ភ្ញៀវទេសចរ​ក៏​ចេញ​ចូល​ច្រើន​។ អ្វី​ដែល​យើង​ត្រូវ​គិត​បន្ថែម​គឺ​ការ​រៀបចំ​សម្របសម្រួល ឲ្យ​គាត់​ឲ្យ​កាន់តែ​ល្អ​ប្រសើរ​»។

ចំណែក លោក ប៊ុន ឡឺត អភិបាល​ខេត្ត​កោះកុង​បាន​ឲ្យ​ដឹង​ថា មូលហេតុ​ចម្បង​នៃ​ការ​បន្ថែម​ម៉ោង​បើក​ច្រក​ព្រំដែន​នេះ​គឺ​ដើម្បី សម្រួល​ដល់​ការ​ចេញ​ចូល​របស់​ភ្ញៀវទេសចរ​ចូល​មក​កម្ពុជា​។

លោក​បាន​លើក​ឡើង​ថា​៖ «​វា​ពាក់ព័ន្ធ​ជាមួយ​ភ្ញៀវទេសចរ ដែល​ធ្វើ​ដំណើរ​ពី​ភ្នំពេញ​មក​ដើម្បី​ចេញ​តាម​ច្រក​ហ្នឹង​ពេល​ខ្លះ គាត់​មក​ដល់​យប់​ពេក ច្រក​ទ្វារ​ត្រូវ​បាន​បិទ ហើយ​យើង​មិន​អាច​សម្របសម្រួល​ឲ្យ​បាន​ទាន់​ពេល​»។

លោក​បន្ថែម​ថា កិច្ចព្រមព្រៀង​នេះ​បាន​សម្រួល​ដល់​ការ​ធ្វើ​ដំណើរ​របស់​ភ្ញៀវទេសចរ​ច្រើន​។

លោក​ប៊ុន ឡឺត ថ្លែង​បន្ត​ថា​៖​«​បញ្ហា​ទេសចរ​ចេញ​ចូល​បាន​ច្រើន​ជាង​មុន កាត់​បន្ថយ​គ្រោះថ្នាក់​ចរាចរណ៍ ហើយ​បាន​ត្រួតពិនិត្យ​លិខិត​ស្នាម​បាន​ត្រឹមត្រូវ​និង​ល្អ​ជាង​មុន»។

លោក​ក៏​បាន​បញ្ជាក់​ដែរ​ថា ខេត្ត​កោះកុង​មិន​មាន​ការ​នាំ​ទំនិញ​ចេញ​ទៅ​ប្រទេស​ថៃ​នោះ​ទេ។ ច្រក​ទ្វារ​ព្រំដែន​អន្តរជាតិ​ចាំយាម​ក្នុង​ខេត្ត​កោះកុង​បម្រើ​ដល់ ការ​ធ្វើ​ដំណើរ​របស់​ភ្ញៀវទេសចរ និង​ទទួល​ទំនិញ​នាំ​ចូល​ពី​ប្រទេស​ថៃ​តែ​ប៉ុណ្ណោះ​។

ថៃ​ជា​ដៃគូ​ពាណិជ្ជកម្ម​ក្នុង​តំបន់​ដ៏​ធំ​មួយ​របស់​កម្ពុជា។ របាយការណ៍​បង្ហាញ​ថា ក្នុង​ឆ្នាំ​២០១៣ កម្ពុជា​នាំ​ទំនិញ​ចេញ​ទៅ​ប្រទេស​ថៃ​សរុប​មាន​ទំហំ​ទឹកប្រាក់ ៣៥១​លាន​ដុល្លារ ខណៈ​ការ​នាំ​ចូល​ពី​ថៃ​សរុប​មាន​ចំនួន ៤,១៥ ពាន់​លាន​ដុល្លារ​។ តួលេខ​ពី​ក្រសួង​ទេសចរណ៍​បាន​បង្ហាញ​ថា ទេសចរ​ថៃ​ចូល​មក​កម្ពុជា​ឆ្នាំ​២០១៣ សរុប​មាន​ចំនួន ២២១ ២៥៩ នាក់ កើនឡើង​៩,៨​ភាគរយ​បើ​ធៀប​នឹង​ឆ្នាំ​២០១២​៕

អត្ថបទគួរចាប់អារម្មណ៍