.jpg)
អ្នកទស្សនាកំពុងដើរចូលក្នុងកន្លែងពិព័រណ៍កាលម្សិលមិញ។ ហេង ជីវ័ន
ភ្នំពេញៈ ពិព័រណ៍ពាណិជ្ជកម្មអឺរ៉ុប (Eurofair) លើកដំបូងរយៈពេល ៣ ថ្ងៃនៅកម្ពុជាត្រូវបានបញ្ចប់កាលពីម្សិលមិញនៅកោះពេជ្រដោយមានក្រុមហ៊ុនតាំងពិព័រណ៍ជាង ៤០ ភាគច្រើនជាក្រុមហ៊ុនអឺរ៉ុប។
ពិព័រណ៍ Eurofair ត្រូវបានរៀបចំឡើងកាលពីថ្ងៃសុក្រ និងបានបិទបញ្ចប់កាលពីល្ងាចថ្ងៃអាទិត្យម្សិលមិញ។
លោក Blaise Killian នាយកប្រតិបត្តិសភាពាណិជ្ជកម្មអឺរ៉ុប EuroCham ថ្លែងថា វាជាការតាំងពិព័រណ៍មួយគួរឲ្យរំភើបក្នុងការបង្ហាញភាពល្អបំផុតរបស់អឺរ៉ុប នៅក្នុងប្រទេសកម្ពុជាក្នុងអំឡុងព្រឹត្តិការណ៍ដ៏ពិសេសរយៈពេល ៣ ថ្ងៃនេះ។
ផលិតផលភាគច្រើនមកពីក្រុមហ៊ុនអឺរ៉ុបដូចជាក្រុមហ៊ុនផលិតរថយន្ត Porsche ក្រុមហ៊ុនផលិតរថយន្ត BMW ក្រុមហ៊ុនផលិតរថយន្ត Mercedes Benz និងក្រុមហ៊ុនគ្រឿងសង្ហារិម និងការរចនាផ្ដាច់មុខមកពីប្រទេសអ៊ីតាលី គ្រឿងសម្អាងបារាំង សម្លៀកបំពាក់ យីហោគ្រឿងយន្ត និងឧបករណ៍ Bosch និង Wurth ឬ Daas សារធាតុគីមីព្រមទាំងអាហារអឺរ៉ុបមកពីក្រុមហ៊ុន Thalias ក្រុមហ៊ុន Hops ក្រុមហ៊ុន good France និងក្រុមហ៊ុនផ្សេងៗទៀតផងដែរ។
លោកថ្លែងថា៖ «យើងបានធ្វើការងារឆ្ពោះទៅកាន់ព្រឹត្តិការណ៍នេះជាលើកដំបូងអស់រយៈពេលយូរ ហើយខ្ញុំសង្ឃឹមថាអ្នកទស្សនា ជាពិសេសអតិថិជន និង ក្រុមហ៊ុនកម្ពុជានឹងសប្បាយរីករាយជាមួយផលិតផល អាហារ និងសកម្មភាពជុំវិញកន្លែងតាំងពិព័រណ៍នេះ»។
លោកបន្ថែមថា ទិសដៅការតាំងពិព័រណ៍នេះនឹងផ្ដល់ជំនាញជាមួយនឹងជម្រើសឱកាសរវាងអាជីវកម្ម និងអាជីវកម្ម និងសាធារណជនទូទៅជាមួយឱកាសស្គាល់យីហោអឺរ៉ុប ផលិតផល និងសេវាសំខាន់ៗ។
លោក Arnaud Darc ប្រធានសភាពាណិជ្ជកម្មអឺរ៉ុបថ្លែងថា៖ «ពិព័រណ៍អឺរ៉ុបលើកដំបូងនេះនឹងធ្វើឲ្យមានការចូលរួមកាន់តែច្រើននៅឆ្នាំក្រោយ»។
លោកបន្ថែមថា ផ្នែកមួយនៃបេសកកម្មនេះ ក្រៅពីការលើកកម្ពស់ពាណិជ្ជកម្មរវាងកម្ពុជា និងអឺរ៉ុបនឹងបង្កើនភាពមើលឃើញពាណិជ្ជកម្មអឺរ៉ុបនៅកម្ពុជាផងដែរ»៕ LA
