.jpg)
សិប្បកម្មតម្បាញសូត្រខ្មែរជាលក្ខណៈគ្រួសារ។ ភាគីពាក់ព័ន្ធកំពុងជំរុញផលិតកម្មសូត្រតាមរយៈពិព័រណ៍សូត្រ។ ហេង ជីវ័ន
ភ្នំពេញៈ ពិព័រណ៍សូត្រ និងតម្បាញកម្ពុជាលើកទី ២ នឹងរៀបចំនៅចុងសប្តាហ៍ក្រោយក្នុងខេត្តសៀមរាប ខណៈអ្នកក្នុងវិស័យនេះសង្ឃឹមថាវានឹងក្លាយជាផ្នែកមួយក្នុងការជួយពង្រឹងការអភិវឌ្ឍវិស័យសូត្រ និងតម្បាញនៅកម្ពុជា។
សេចក្តីជូនដំណឹងរបស់ក្រសួងពាណិជ្ជកម្មកាលពីចុងសប្តាហ៍មុនបានឲ្យដឹងថា ក្រសួងពាណិជ្ជកម្មនឹងរៀបចំព្រឹត្តិការណ៍សូត្រ និងតម្បាញកម្ពុជា ដែលនឹងប្រព្រឹត្តទៅចាប់ពីថ្ងៃទី ២១ ដល់ថ្ងៃទី ២៤ ខែវិច្ឆិកា ឆ្នាំ ២០១៩ នៅទីធ្លាសាធារណៈទល់មុខព្រះរាជដំណាក់ខេត្តសៀមរាប។
ព្រឹត្តិការណ៍នេះធ្វើឡើងក្នុងគោលបំណងដើម្បីស្តារ ជំរុញ និងអភិវឌ្ឍវិស័យសូត្រកម្ពុជាដែលជាបេតិកភណ្ឌវប្បធម៌របស់កម្ពុជាតាំងពីយូរយារណាស់មកហើយ ខណៈវិស័យនេះបានចូលរួមចំណែកយ៉ាងសំខាន់នៅក្នុងការផ្តល់និរន្តរភាព ឱកាសការងារ និងប្រាក់ចំណូលសម្រាប់សេដ្ឋកិច្ចជាតិកម្ពុជា។
លោក ម៉ី កល្យាណ ប្រធានក្រុមប្រឹក្សាភិបាលនៃសាកលវិទ្យាល័យភូមិន្ទភ្នំពេញ ដែលជាកន្លែងមានមជ្ឈមណ្ឌលសូត្រខ្មែរកំពុងបើកដំណើរការសិក្សា ស្រាវជ្រាវ និងអភិវឌ្ឍសូត្របានប្រាប់ភ្នំពេញប៉ុស្តិ៍កាលពីម្សិលមិញថា ព្រឹត្តិការណ៍សូត្រ និងតម្បាញកម្ពុជាគឺពិតជាមានសារប្រយោជន៍ក្នុងការជួយផ្សព្វផ្សាយពីផលិតផលសូត្រនៅកម្ពុជា ខណៈវិស័យមួយនេះហាក់មិនទាន់ទទួលបានការចាប់អារម្មណ៍បណ្តាក់ទុនច្រើននោះទេរហូតមកដល់ពេលនេះ។ លោកបន្តថា ទោះបីផលិតផលពីសូត្រមានតម្រូវការកើនឡើងច្រើន ប៉ុន្តែការដាំដុះនៅកម្ពុជាមិនបានកើនឡើងគួរឲ្យកត់សម្គាល់ទេ»។
លោកថ្លែងថា៖ «កង្វះការវិនិយោគបានធ្វើឲ្យកម្ពុជានាំចូលសូត្របានប្រមាណ ៩៩ ភាគរយពីបរទេសសម្រាប់ផ្គត់ផ្គង់ទីផ្សារក្នុងស្រុក ខណៈផលិតផលនេះជាទីផ្សារមានសក្តានុពលខ្ពស់ និងទទួលបានប្រាក់ចំណេញច្រើន»។
យោងតាមរបាយការណ៍យុទ្ធសាស្ត្រសូត្រជាតិ ឆ្នាំ ២០១៦-២០២០ ការផលិតសរសៃសូត្រនៅកម្ពុជាមានបរិមាណត្រឹមតែ ១ ភាគរយប៉ុណ្ណោះ នៃតម្រូវការប្រើប្រាស់សរុបក្នុងស្រុក ខណៈការនាំចូលមានរហូតដល់ ៩៩ ភាគរយដែលស្មើនឹងជាង ៤០០ តោន ក្នុង ១ ឆ្នាំ។ ចិនគឺជាប្រទេសនាំមុខគេ ដែលកម្ពុជាបាននាំចូលសូត្រ។
បើតាមលោក កល្យាណ ដើម្បីបានសូត្រប្រមាណ ៤០០ តោន ក្នុង ១ ឆ្នាំកម្ពុជាត្រូវការផ្ទៃដីដំាដុះជាង ៣០ ០០០ ហិកតា។ លោកលើកឡើងថា ដើម្បីឲ្យវិស័យសូត្រនៅកម្ពុជាអាចទទួលបានជោគជ័យ ការចូលរួមរបស់វិស័យឯកជន និងគ្រួសារប្រជាកសិករអ្នកដាំដុះគឺពិតជាមានភាពចាំបាច់ណាស់ ខណៈបច្ចុប្បន្នកម្ពុជាមានបច្ចេកទេសក្នុងការដាំដើមមន បច្ចេកទេសក្នុងការថែរក្សាដដ្កូវនាង។ លោកបន្តថា កាលពីមុនមកក្នុងចំណោមដង្កូវនាងចិញ្ចឹមចំនួន ១០០ ក្បាល គឺមានដង្កូវនាងងាប់ប្រមាណ ៧០-៨០ ក្បាល ខណៈបច្ចុប្បន្នមានប្រហែល ៥ ក្បាលប៉ុណ្ណោះ។
ជាមួយនឹងវត្តមានមជ្ឈមណ្ឌលសូត្រខ្មែរកំពុងបើកដំណើរការនៅក្នុងសាកលវិទ្យាល័យភូមិន្ទភ្នំពេញលោក កល្យាណ បានអះអាងថា៖ «បច្ចុប្បន្ននេះក្រុមការងារស្រាវជ្រាវសូត្រខ្មែរកំពុងខិតខំធ្វើការងារយ៉ាងច្រើនដើម្បីអភិវឌ្ឍវិស័យសូត្រនៅកម្ពុជា»។
បច្ចុប្បន្នសូត្រមាស (ល្អ) មានតម្លៃក្នុងរង្វង់ ១០០ ដុល្លារ ក្នុង ១ គីឡូក្រាម ចំណែកសូត្រលេខ ២ មានតម្លៃពី ៧០ ដុល្លារ។ នេះបើតាមលោក កល្យាណ។
លោក ឈឹម សុភ័ក្ត្រ ប្រធានការិយាល័យអភិវឌ្ឍន៍ផលិតផលនៃក្រសួងពាណិជ្ជកម្មបាននិយាយថា រហូតមកដល់ពេលនេះមានស្តង់ប្រមាណ ៣០ បានមកចុះឈ្មោះដើម្បីចូលរួម។ លោកបន្តថា ព្រឹត្តិការណ៍ឆ្នាំនេះនឹងមានលក្ខណពិសេសជាងលើកទី ១ ដោយនឹងមានការប្រកួតប្រជែងពីគុណភាពផលិតផលតម្បាញផងដែរ។
លោកថ្លែងថា៖ «យើងរំពឹងថានឹងអាចទាក់ទាញឲ្យភ្ញៀវចូលទស្សនាបានយ៉ាងច្រើន ហើយវានឹងចូលរួមចំណែកក្នុងការពង្រីកទីផ្សារសូត្រនៅកម្ពុជាផងដែរ»។
លោកស្រី ចេន សុភាព ស្ថាបនិក និងជាប្រធានសមាគមកីតម្បាញខ្មែរ ធ្លាប់បានប្រាប់ភ្នំពេញប៉ុស្តិ៍ថ្មីៗនេះថា ខណៈផលិតផលពីសរសៃសូត្រខ្មែរស្ទើរតែត្រូវគេបំភ្លេចចោល បច្ចុប្បន្ននេះតម្រូវការប្រើប្រាស់ផលិតផលពីសូត្រខ្មែរហាក់កំពុងកើនឡើងវិញ៕ LA
