The Phnom Penh Post Search

Search form

Logo of Phnom Penh Post newspaper Phnom Penh Post - ពិព័រណ៍​ទេសចរណ៍​អន្តរជាតិ ឆ្នាំ​២០១៤ ត្រូវ​បាន​ធ្វើ​ឡើង​នៅ​កម្ពុជា




ពិព័រណ៍​ទេសចរណ៍​អន្តរជាតិ ឆ្នាំ​២០១៤ ត្រូវ​បាន​ធ្វើ​ឡើង​នៅ​កម្ពុជា

ពិព័រណ៍​ទេសចរណ៍​អន្តរជាតិ ឆ្នាំ​២០១៤ ត្រូវ​បាន​ធ្វើ​ឡើង​នៅ​កម្ពុជា

ភ្នំពេញៈ កម្ពុជា​បាន​បើក​ដំណើរ​ការ​ព្រឹត្តិ​ការណ៍​ពិព័រណ៍​ទេសចរណ៍​អន្តរជាតិ PATA Travel Mart ២០១៤ ហើយ កាល​ពី​ម្សិល​មិញ​នៅ​មជ្ឈមណ្ឌល​ពិព័រណ៍​កោះពេជ្រ​ក្នុង​រាជធានី​ភ្នំពេញ។

ព្រឹត្តិ​ការណ៍​ពិព័រណ៍​ទេសចរណ៍​អន្តរជាតិ​ដែល​ប្រារព្ធ​ឡើង​ជា​រៀង​រាល់​ឆ្នាំ​ក្នុង​បំណង​ប្រមូល​ផ្ដុំ​អ្នក​ពាក់​ព័ន្ធ​ក្នុង​វិស័យ​នេះ​ដើម្បី​ផ្លាស់​ប្តូរ​ពាណិជ្ជកម្ម និង​មាន​ការ​ពិភាក្សា​អំពី​បច្ចុប្បន្ន​ភាព​នៃ​វិស័យ​ទេសចរណ៍​នេះ មាន​ការ​ចូល​រួម​ពី​គណៈប្រតិភូ​ប្រហែល ១ ០០០ នាក់​មក​ពី ៥៨ ប្រទេស។ នេះ​បើ​តាម​ការ​ឲ្យ​ដឹង​ពី​លោក ថោង ខុន រដ្ឋ​មន្រ្ដី​ក្រសួង​ទេសចរណ៍។

លោក​បន្ត​ថា៖ «នេះ​នឹង​មិន​គ្រាន់​តែ​ជា​ព្រឹត្តិ​ការណ៍​ដ៏​សំខាន់​សម្រាប់​ឧស្សាហកម្ម​ទេសចរណ៍​នៅ​ក្នុង ប្រទេស​កម្ពុជា និង​ជា​ជំហាន​មួយ​ដើម្បី​លើក​កម្ពស់​ចំណាត់​ថ្នាក់​កម្ពុជា​ជា​ទិសដៅ​ទេសចរណ៍​ពិភពលោក​ប៉ុណ្ណោះ​ទេ ប៉ុន្តែ​ថែម​ទាំង​បង្ហាញ​ពី​សន្ដិភាព និង​ស្ថិរភាព​នយោបាយ​របស់ ប្រទេស​កម្ពុជា ស្រប​ជាមួយ​នឹង​សេវា និង​ហេដ្ឋា​រចនា​សម្ព័ន្ធ​ទេសចរណ៍​កម្រិត​ស្ដង់ដារ​របស់​ខ្លួន​ផង​ដែរ»។

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា ដែល​សហការ​រៀបចំ​ព្រឹត្តិការណ៍​នេះ​ប្រាប់ ភ្នំពេញ ប៉ុស្ដិ៍ កាល​ពី ខែ​សីហា ថា ព្រឹត្តិការណ៍​នេះ ត្រូវ​បាន​រំពឹង​ថា នឹង​ចំណាយ​អស់​ជាង ១ លាន​ដុល្លារ។

លោក ស៊ីណាន កាល​ពី​ម្សិល​មិញ​ថ្លែង​ថា ព្រឹត្តិ​ការណ៍​នេះ​នឹង​ជួយ​ផ្សព្វ​ផ្សាយ​ទេសចរណ៍​ដ៏​មាន​សក្តានុពល​របស់​កម្ពុជា​ដល់​ពិភពលោក និង​ជួយ​ទាក់​ទាញ​ការ​វិនិយោគ​បន្ថែម​សម្រាប់​វិស័យ​ទេសចរណ៍​កម្ពុជា។

លោក​ថា៖ «ក្នុង​ពិភពលោក​គេ​ស្គាល់ ប្រទេស​កម្ពុជា។ ប៉ុន្តែ​យើង​មិន​ត្រឹម​តែ​ចង់​ឲ្យ​គេ​ស្គាល់​ប៉ុណ្ណោះ​ទេ យើង​ចង់​ឲ្យ​គេ​មក​ទស្សនា​កម្ពុជា»។

លោក​បន្ត​ថា៖ «ក្រៅ​ពី​ការ​បង្ហាញ​ពី​ទិសដៅ​ទេសចរណ៍​ដ៏​មាន​សក្ដានុពល យើង​អាច​បង្ហាញ​ពួក​គេ​ពី​វប្បធម៌​របស់​យើង​និង​ឱកាស​វិនិយោគ​ក្នុង​វិស័យ​ទេសចរណ៍​របស់​យើង»។

ពិព័រណ៍​នេះ​ធ្វើ​ឡើង​ចាប់​ពី​ថ្ងៃ ទី១៧ រហូត​ដល់ ១៩ កញ្ញា។

តាម PATA កាល​ពី​ឆ្នាំ​មុន​ព្រឹត្តិការណ៍ PTM ត្រូវ​បាន​ធ្វើ​ឡើង​នៅ ទីក្រុង​Chengdu ប្រទេស​ចិន៕

អត្ថបទគួរចាប់អារម្មណ៍