The Phnom Penh Post Search

Search form




Logo of Phnom Penh Post newspaper Phnom Penh Post - ពិព័រណ៍​ម្ហូប​អាហារ​ទាក់​ទាញ​វិនិយោគិន

ពិព័រណ៍​ម្ហូប​អាហារ​ទាក់​ទាញ​វិនិយោគិន

អ្នកទស្សនាដើរមើលការតាំង​ពិព័រណ៍​ម្ហូប​អាហារ តាម​ស្តង់​កាល​ពី​ម្សិល​មិញ។​
អ្នកទស្សនាដើរមើលការតាំង​ពិព័រណ៍​ម្ហូប​អាហារ តាម​ស្តង់​កាល​ពី​ម្សិល​មិញ។​ ផា លីណា

ពិព័រណ៍​ម្ហូប​អាហារ​ទាក់​ទាញ​វិនិយោគិន

ភ្នំពេញៈ ក្រុម​ហ៊ុន​ផ្គត់​ផ្គង់​ស្បៀង និង​ភេសជ្ជៈ​មក​ពី​ជុំវិញ​ពិភពលោក​បាន​បង្ហាញ​វត្តមាន​នៅ ទីក្រុង​ភ្នំពេញ កាល​ពី​ម្សិល​មិញ​ដែល​ក្រុម​ហ៊ុន​ទាំង​នោះ​កំពុង​ស្រាវជ្រាវ​រក​ក្រុម​ហ៊ុន​ចែក​ចាយ​ក្នុង​ស្រុក​ដើម្បី​ជួយ​ពង្រីក​យីហោ​របស់​ពួក​គេ​នៅ​ក្នុង​ឧស្សាហ​កម្ម​ស្បៀង និង​បដិសណ្ឋារ​កិច្ច​របស់​កម្ពុជា។

នៅ​ថ្ងៃ​ដំបូង​នៃ​ពិព័រណ៍​របស់​ក្រុម​ហ៊ុន ម្ហូប​អាហារ និង​សណ្ឋាគារ កាល​ពី​ម្សិល​មិញ​នៅ​មជ្ឈមណ្ឌល​សាល​សន្និបាត​កោះ​ពេជ្រ មាន​ក្រុម​ហ៊ុន​ជាង ៣០០ ដែល​រួម​មាន ក្រុម​ហ៊ុន​ផ្គត់​ផ្គង់​សាច់ ក្រុម​ហ៊ុន​កាហ្វេ ក្រុម​ហ៊ុន​ស្រា​ជាដើម។

កាល​ពី​ម្សិល​មិញ​លោក លូ ម៉េង សមាជិក​ស្ថាបនិក​នៃ​សហព័ន្ធ​ទេសចរណ៍​កម្ពុជា បាន​ថ្លែង​ខណៈ​កំពុង​វិនិច្ឆ័យ​ការ​ប្រកួត​ប្រជែង​ធ្វើ​ម្ហូប​ជាតិ​កម្ពុជា​ថា៖ «នេះ​ជា​ព្រឹត្តិ​ការណ៍​ជំនាញ​វិជ្ជាជីវៈ ទល់​ជំនាញ​វិជ្ជាជីវៈ​និង​មិន​មាន​ច្រើន​ជា​សាធារណៈ​ទេ»។

លោក​លើក​ឡើង​ថា៖ «ថ្ងៃ​នេះ​និយាយ​អំពី​ការ​នាំ​យក​គុណភាព​មក​កាន់ ប្រទេស​កម្ពុជា ជា​លើក​ដំបូង។ គុណភាព​ដំបូង​មាន​ន័យ​ថា អ្វីៗ​គ្រប់​យ៉ាង និង​គ្រប់ៗ​គ្នា​កំពុង​ឆ្ពោះ​ទៅ​រក​គោល​ដៅ​មួយ​ក្នុង​ចំណោម​ស្ដង់ដារ​កំពុង​កែ​លម្អ​នៅ​ទូទាំង​ឧស្សាហ​កម្ម​បដិសណ្ឋារ​កិច្ច និង​ឧស្សាហ​កម្ម​ស្បៀង និង​ភេសជ្ជៈ​រួម​គ្នា»។

លោក Jim Cromzigt អគ្គ​នាយក​ក្រុម​ហ៊ុន Coffee Group Asia មាន​មូលដ្ឋាន​នៅ ប្រទេស​ថៃ គឺជា​ក្រុម​ហ៊ុន​មួយ​ក្នុង​ចំណោម​ក្រុម​ហ៊ុន​ជាច្រើន​កំពុង​ប្រកួត​ប្រជែង​រក​ឱកាស​ក្នុង​ការ​ពង្រីក​នៅ​ក្នុង​ទីផ្សារ​ក្នុង​ស្រុក​នេះ។

លោក​លើក​ឡើង​ថា៖ «ពិត​ហើយ​ខ្ញុំ​កំពុង​ព្យាយាម​នៅ​ទី​នេះ​ដើម្បី​ស្វែង​រក​ក្រុម​ហ៊ុន​ចែក​ចាយ​បន្ត»។

លោក​បន្ត​ថា៖ «ខ្ញុំ​សង្ឃឹម​ថា យ៉ាង​ហោច​ណាស់​ក៏​អាច​ស្វែង​រក​បាន​ក្រុម​ហ៊ុន​ចែក​ចាយ​ដ៏​មាន​សក្ដានុពល​មួយ​ដែរ។ បន្ទាប់​មក​ចាប់​ផ្ដើម​ភាព​ជា​ដៃគូ និង​អាច​ពិចារណា​ក្នុង​ការ​ពង្រីក​ពាណិជ្ជ​កម្ម​នៅ​កម្ពុជា។

យោង​តាម​លោក Andrew Siow ប្រធាន​ក្រុម​ហ៊ុន AMB Events Group ជា​អ្នក​រៀបចំ​ព្រឹត្តិ​ការណ៍​មាន​មូលដ្ឋាន​នៅ​សិង្ហបុរី ការ​តាំង​ពិព័រណ៍ ម្ហូប​អាហារ និង​សណ្ឋាគារ ត្រូវ​បាន​ចាប់​ផ្ដើម​ឡើង​កាល​ពី ឆ្នាំ​២០១០ ជាមួយ​នឹង​អ្នក​ដាក់​ស្ដង់​លក់​អីវ៉ាន់​ចំនួន ៦០។ ចំនួន​នេះ​កើន​ឡើង​ពី​ជាង ៩០ កាល​ពី ឆ្នាំ​២០១២ រហូត​ដល់ ១៧០ ស្ដង់​នៅ​ក្នុង​ឆ្នាំ​នេះ។

ក្នុង​អំឡុង​ការ​តាំង​ពិព័រណ៍​កាល​ពី ឆ្នាំ​២០១២ លោក Siow ប៉ាន់​ប្រមាណ​ថា ក្រុម​ហ៊ុន​តាំង​ពិព័រណ៍​ទទួល​បាន​ទឹក​ប្រាក់​បាន​ពី​ការ​លក់​ជាង ៦៧០ ០០០ ដុល្លារ​ហើយ​ក្រោយ​មក​កើន​ឡើង​ដល់ ២ លាន​ដុល្លារ​នៃ​កិច្ច​ព្រម​ព្រៀង និង​ភាព​ជា​ដៃ​គូ​មុន​ព្រឹត្តិ​ការណ៍​នេះ។

លោក​បាន​បញ្ជាក់​ថា៖ «សណ្ឋាគារ និង​ភោជនីយដ្ឋាន​គឺ​ថ្មី​បើ​មើល​ត្រឡប់​ទៅ​ពី ២០១០ ហើយ​យើង​ជា​អ្នក​ធ្វើ​អាជីវកម្ម​ដែល​បង្ហាញ​ដល់​ប្រតិបត្តិករ​ដែល​កំពុង​សម្លឹង​មើល​នៅ​ក្នុង​ប្រទេស​នេះ។ ប៉ុន្តែ​ពេល​នេះ យើង​មើល​ឃើញ​កំណើន​ដ៏​មាន​ទំនុក​ចិត្ត​របស់​ម្ចាស់​តាំង​ពិព័រណ៍ និង​អ្នក​ចូល​រួម។ អំណាច​ទិញ​របស់​កម្ពុជា កំពុង​កើន​ក្នុង​ដំណើរ​ការ​យឺត​ដែល​ជំរុញ​ឲ្យ​មាន​កំណើន​មួយ​ចំនួន​ក្នុង​ឧស្សាហកម្ម​សិទ្ធិ​ពាណិជ្ជកម្ម និង​កំពុង​ជំរុញ​ឲ្យ​អ្នក​ចូល​រួម​ពិព័រណ៍​កាន់​តែ​ច្រើន»៕

អត្ថបទគួរចាប់អារម្មណ៍