ភ្នំពេញៈ ពិព័រណ៍ CAMBUILD ដែលនឹងបង្ហាញពីគម្រោងអភិវឌ្ឍន៍ក្នុងវិស័យសំណង់ និង សម្ភារសាងសង់ផ្សេងៗ នឹងធ្វើឡើងនៅ កោះពេជ្រ ពីថ្ងៃទី១០ ដល់ ១២ ខែកញ្ញាខាងមុខដើម្បីបង្ហាញពីសក្តានុពលក្នុងការអភិវឌ្ឍវិស័យនេះនៅកម្ពុជា។
នេះ ជាពិព័រណ៍លើកទី៣ហើយនៅកម្ពុជា ហើយនឹងត្រូវចូលរួមតាំងបង្ហាញដោយមានក្រុមហ៊ុនប្រមាណ ៣០០ ក្រុមហ៊ុន ដែលភាគច្រើនជាក្រុមហ៊ុនអន្តរជាតិ។
លោក នួន វាសនា មន្ត្រីអភិវឌ្ឍន៍ផលិតផលក្រុមហ៊ុន AMB Event Group ដែលជាអ្នករៀបចំការតាំងពិព័រណ៍នេះបានឲ្យដឹងថា៖ «យើងបង្កើតព្រឹតិ្តការណ៍នេះដើម្បីភ្ជាប់ការទាក់ទងរវាងពាណិជ្ជករ (ក្នុងវិស័យនេះ) និងពាណិជ្ជករ។ ក្រុមហ៊ុនអន្តរជាតិដែលចាប់អារម្មណ៍ឱកាសវិនិយោគនៅកម្ពុជា អាចស្វែងយល់កាន់តែច្បាស់ពីកម្ពុជា និងអាចស្វែងរកដៃគូរវិនិយោគនៅក្នុងព្រឹត្តិការណ៍នេះផងដែរ»។
តាមការគ្រោងទុក ការតាំងពិព័រណ៍ CAMBUILD នឹងមានការចូលរួមដោយក្រុមហ៊ុនអន្តរជាតិជាច្រើនដែលមានតំណាងប្រមាណ ៦០ ភាគរយនៃអ្នកចូលរួមសរុប។ តម្លៃតូបជួលមួយក្នុងរយៈពេលបីថ្ងៃនៃការតាំងពិព័រណ៍មាន តម្លៃ ២ ៣០០ ដុល្លារ ដែលខ្ពស់ជាងពីតម្លៃជួលតូបក្នុងការចូលរួមពិព័រណ៍ផ្សេងៗដែល ជាមធ្យមមានក្នុងរង្វង់ ៣០០ ដុល្លារក្នុងមួយតូប។ នេះបើយោងតាមការបញ្ជាក់របស់លោក វាសនា។
រហូតមកដល់ពេលនេះមានក្រុមហ៊ុនប្រមាណជាង ១០០ ក្រុមហ៊ុនហើយដែលបានចុះឈ្មោះចូលរួមក្នុងពិព័រណ៍នេះ។
លោក Richard Yew នាយកក្រុមហ៊ុន AMB Group ប្រចាំតំបន់អាស៊ីឲ្យដឹងថា៖ «ការរៀបចំតាំងបង្ហាញជាលក្ខណៈអន្តរជាតិនេះជាកត្តារួមចំណែកដ៏សំខាន់ក្នុងការអភិវឌ្ឍវិស័យសំណង់នៅកម្ពុជា»។
ពិព័រណ៍នេះមានការជួយជ្រោមជ្រែងដោយក្រសួងពាក់ព័ន្ធ និង តំណាងស្ថាប័នឯកជនជាច្រើនក្នុងវិស័យសំណង់៕
