ក្រុងសានហ្វ្រានស៊ីស្កូៈ កាលពី ១ ទសវត្សរ៍មុន មិត្តភក្តិរួមបន្ទប់ ២ នាក់ក្នុងទីក្រុងសានហ្វ្រានស៊ីស្កូ បានសម្រេចចិត្តរកលុយតាមរយៈការប្រែក្លាយបន្ទប់ស្នាក់នៅរបស់ពួកគេទៅជាបន្ទប់ជួលរយៈពេល ១ យប់នៅពេលមួយដែលមានកង្វះបន្ទប់សណ្ឋាគារដោយសារមានសន្និសីទធំមួយក្នុងទីក្រុងនេះ។
ភាពឆ្លាតវៃនេះបាននាំឲ្យមានការបង្កើតក្រុមហ៊ុន Airbnb ជាក្រុមហ៊ុនមួយបច្ចុប្បន្នមានតម្លៃជាង ៣០ ពាន់លានដុល្លារដែលបានបង្កើតកន្លែងស្នាក់នៅរាប់លានកន្លែងក្នុងប្រទេសចំនួនជាង ១៩១ ដែលមានចាប់តាំងពីអាផាតមិន និងវីឡារហូតដល់អគារធំៗ និង ផ្ទះលើមែកឈើផងដែរ។
ខាងក្រោមនេះជារឿងពិតមួយចំនួនអំពីក្រុមហ៊ុនផ្តល់សកម្មភាពសេវាសេដ្ឋកិច្ចអនឡាញ (sharing-economy) មួយនេះដែលកំពុងរះឡើង និងបង្កភាពភ័យខ្លាចដល់ឧស្សាហកម្មសណ្ឋាគារ៖
ការចាប់ផ្តើមដ៏សាមញ្ញ
‑ នៅចុងឆ្នាំ ២០០៧ នៅពេលបន្ទប់សណ្ឋាគារបានលក់អស់ដោយសារសន្និសីទស្តីពីការរចនាម៉ូដក្នុងទីក្រុងសានហ្វ្រានស៊ីស្កូ លោក Brian Chesky និង លោក Joe Gebbia បានសម្រេចចិត្តរកលុយបន្ថែមតាមរយៈដាក់ជួលបន្ទប់ដែលពួកគាត់កំពុងស្នាក់នៅដោយប្រើពូកខ្យល់សម្រាប់គេង និងបម្រើអាហារពេលព្រឹកមួយពេល (bed-and-breakfast)។
‑ លោក Nathan Blecharczyk ដែលជាមិត្តរួមបន្ទប់ម្នាក់ទៀតបានចូលរួមជាមួយលោក Chesky និងលោក Gebbia ក្នុងការរកស៊ីរួមគ្នាមួយដែលពួកគេហៅថា «Air Bed and Breakfast» ដោយចាប់ផ្តើមបង្កើតគេហទំព័រមួយនៅខែសីហា ឆ្នាំ ២០០៨។
‑ ដើម្បីជំរុញអាជីវកម្មនេះឲ្យងើបឡើង ស្ថាបនិកទាំង ៣ នេះបានបង្កើតភាពភ្ញាក់ផ្អើលមួយនៅសន្និសីទជាតិប្រជាធិបតេយ្យនៅចុងឆ្នាំ ២០០៨ ដោយលក់អាហារប្រអប់មានឈ្មោះ «Obama-O''s» និង «Cap''n McCains» ក្នុងអំឡុងយុទ្ធនាការឃោសនាបោះឆ្នោតនៅអាមេរិករវាងលោក អូបាម៉ា និងលោក ចន ម៉ាក់ខេន ក្នុងតម្លៃ ៤០ ដុល្លារក្នុង ១ ប្រអប់ ហើយប្រមូលប្រាក់បានគ្រប់គ្រាន់ដើម្បីធ្វើឲ្យអាជីវកម្មនេះបន្តទៅមុខ និងទទួលបានប្រជាប្រិយភាពពីសាធារណជនយ៉ាងច្រើន។
‑ ឈ្មោះអាជីវកម្មនេះត្រូវបានផ្លាស់ប្តូរនៅខែមីនា ឆ្នាំ ២០០៩ ទៅជា Airbnb ដោយសារតែក្រុមហ៊ុននេះស្រមៃលើសពីការដេកនៅលើពូកខ្យល់។
‑ នៅខែមេសា ឆ្នាំ ២០០៩ ក្រុមហ៊ុន Airbnb ទទួលបានប្រាក់វិនិយោគចំនួន ៦០០- ០០០ ដុល្លារពីក្រុមហ៊ុន Sequoia Capital បន្ទាប់ពីមានការចាក់បញ្ចូលទឹកប្រាក់វិនិយោគពីក្រុមហ៊ុនជាច្រើនទៀត។
ការរំខានដល់ឧស្សាហកម្មសណ្ឋាគារ
‑ ក្នុងឆ្នាំ ២០១១ ក្រុមហ៊ុន Airbnb បានអួតថា មានវត្តមានក្នុងប្រទេសចំនួន ៨៩ និងមានការកក់បន្ទប់ស្នាក់នៅចំនួនជាងមួយលានយប់។ ក្រុមហ៊ុននេះបានក្លាយជាក្រុមហ៊ុនល្បីមួយដែលមានតម្លៃរហូតដល់រាប់ពាន់លានដុល្លារដោយមានមូលដ្ឋានលើប្រាក់ប្រមាណ ១១២ លានដុល្លារដែលទទួលបានពីវិនិយោគិននានា។
‑ នៅខែមិថុនាឆ្នាំ ២០១២ ក្រុមហ៊ុន Airbnb ប្រកាសថាការស្នាក់នៅចំនួនជាង ១០ លានយប់ត្រូវបានកក់តាមរយៈសេវារបស់ខ្លួនដែលប្រហែល ៣ ភាគ ៤ បានមកពីខាងក្រៅសហរដ្ឋអាមេរិក។
‑ នៅឆ្នាំ ២០១២ ក្រុមហ៊ុន Airbnb បានទទួលរងបញ្ហាដោយភ្ញៀវមួយចំនួនបានចាកចេញពីផ្ទះដោយបន្សល់នូវស្ថានភាពអាក្រក់ដោយសារពិធីជប់លៀងឬ សកម្មភាពមិនល្អដទៃៗទៀត។ អាជីវកម្មនេះបានដាក់ចេញនូវគោលនយោបាយឈ្មោះ «ការធានាសម្រាប់ម្ចាស់ផ្ទះ (Host Guarantee)» ដែលមានទឹកប្រាក់ ១ លានដុល្លារសម្រាប់គ្របដណ្តប់លើការខូចខាត។
‑ នៅខែកញ្ញា ឆ្នាំ ២០១៦ ក្រុមហ៊ុន Airbnb បានប្រមូលថវិកាម្តងទៀតដែលបានធ្វើឲ្យក្រុមហ៊ុននេះមានតម្លៃប្រមាណ ៣០ ពាន់លានដុល្លារ។
‑ ក្នុងខែវិច្ឆិកា ឆ្នាំ ២០១៦ ក្រុមហ៊ុន Airbnb បានដាក់ដំណើការកម្មវិធី Trips ជាឧបករណ៍មួយដែលភ្ញៀវទេសចរអាចប្រើប្រាស់ដើម្បីកក់សេវាក្នុងស្រុក ឬសេវាផ្សេងៗទៀត។
‑ ក្រុមហ៊ុន Airbnb ចាប់ផ្តើមប្រឈមបញ្ហា ខណៈទីក្រុងនានាបើកការបង្ក្រាបទៅលើ «ម្ចាស់ផ្ទះ» ជាពិសេសម្ចាស់ផ្ទះដែលប្រែក្លាយផ្ទះទៅជាសណ្ឋាគារ។
‑ នៅចុងឆ្នាំ ២០១៦ ក្រុមហ៊ុន Airbnb អនុវត្តគោលនយោបាយផ្សេងៗក្នុងគោលបំណងទប់ស្កាត់ការរើសអើងពូជសាសន៍ពីសំណាក់ម្ចាស់ផ្ទះ និងបង្កើតក្រុមអចិន្រៃ្តយ៍មួយដែលមានគោលបំណងប្រយុទ្ធប្រឆាំងនឹងភាពលម្អៀង បន្ទាប់ពីមានបណ្តឹងកាន់តែច្រើនឡើងពីអតិថិជន។
- នៅដើមឆ្នាំ ២០១៧ ក្រុមហ៊ុន Airbnb គ្រោងបង្កើនការវិនិយោគរបស់ខ្លួនទ្វេដងក្នុងប្រទេសចិន ដោយបង្កើនកម្លាំងពលកម្មរបស់ក្រុមហ៊ុននេះរហូតដល់ ៣ ដងនៅទីនោះ ហើយប្តូរឈ្មោះរបស់ក្រុមហ៊ុនទៅជា «Aibiying» ជាភាសាចិន។
‑ នៅខែកញ្ញា ឆ្នាំ ២០១៧ ក្រុមហ៊ុន Airbnb សហការជាមួយក្រុមហ៊ុន Resy ដែលបានក្លាយជាម្ចាស់ភាគហ៊ុនភាគតិចក្នុងក្រុមហ៊ុនបណ្តាក់ទុនរួមគ្នាថ្មីនេះ ដើម្បីផ្តល់សេវាកក់តុអាហារនៅភោជនីយដ្ឋាន ៧០០ នៅក្នុងទីក្រុងចំនួន ១៦ ក្នុងសហរដ្ឋអាមេរិក។
‑ ក្រុមហ៊ុន Airbnb ត្រូវបានរាយការណ៍ថាទទួលបានប្រាក់ចំណេញ ៩៣ លានដុល្លារលើចំណូលចំនួន ២,៦ ពាន់លានដុល្លារក្នុងឆ្នាំ ២០១៧។
‑ ក្នុងឆ្នាំ ២០១៨ ដោយសារការវាយប្រហារជាលក្ខណៈសកលលោកចំពោះ «សកម្មភាពសេវាសេដ្ឋកិច្ចអនឡាញ» ដែលរំខានដល់ឧស្សាហកម្មប្រពៃណី ក្រុមហ៊ុន Airbnb បានបង្ខំឲ្យលុបចោលការកក់កន្លែងស្នាក់នៅរាប់ពាន់នៅជប៉ុន ដើម្បីគោរពទៅតាមច្បាប់ថ្មីដែលដាក់បញ្ញត្តិទៅលើការជួលរយៈពេលខ្លី៕