ភ្នំពេញៈ មន្ដ្រីជាន់ខ្ពស់នៃរដ្ឋលេខាធិការដ្ឋានអាកាសចរស៊ីវិល (SSCA) បានឱ្យដឹងថា ទោះបីជា ការរីករាលដាលដោយសារតែព្រឹត្តិការណ៍សហគមន៍ ២០ កុម្ភៈ ដែលបានបណ្ដាលឱ្យមានការរឹតបន្តឹងការធ្វើដំណើរទៅតំបន់ដែលពេញនិយមមួយចំនួនដូចជាតំបន់ឆ្នេរសមុទ្រជាដើម ក៏ព្រលានយន្តហោះអន្តរជាតិតារាសាគរនៅក្នុងខេត្តកោះកុងមិនបានដាក់លិខិតណាមួយ ដើម្បីស្នើសុំពន្យារពេលវេលាដែលត្រូវបានកំណត់ក្នុងការដាក់ឱ្យប្រតិបត្តិការដោយគ្រោងទុកនៅពាក់កណ្ដាលឆ្នាំ ២០២១ នេះទេ។
លោក ស៊ិន ចាន់សេរីវុត្ថា អ្នកនាំពាក្យ SSCA បានប្រាប់ ភ្នំពេញ ប៉ុស្ដិ៍ កាលពីថ្ងៃទី ១៥ ខែមីនាថា បច្ចុប្បន្នក្រុមហ៊ុននេះនៅតែប្រកាន់ខ្ជាប់ការកំណត់ពេលវេលារបស់ពួកគេក្នុងការចាប់ផ្ដើមប្រតិបត្តិការនៅពាក់កណ្ដាលឆ្នាំ ២០២១ បន្ទាប់ពីការសាងសង់ផ្លូវរត់ និងអគារទទួលអ្នកដំណើរត្រូវបានបញ្ចប់ចាប់តាំងពីចុងឆ្នាំ ២០២០។ ក្រុមហ៊ុននេះកំពុងដំណើរការសាកល្បង និងការដំឡើងគ្រឿងបរិក្ខារផ្សេងៗ និងរៀបចំស្នើសុំវិញ្ញាបនបត្រព្រលានយន្តហោះដែលត្រូវការពេលវេលាយ៉ាងហោចណាស់ពី ៦ ទៅ ៧ ខែ។
លោកថ្លែងថា៖ «តាមការគ្រោងទុក ពួកគេនឹងចាប់ផ្ដើមប្រតិបត្តិការរបស់ខ្លួននៅពាក់កណ្ដាលឆ្នាំ ២០២១។ បើទោះបីជាមានការរីករាលដាលជំងឺ ដោយសារតែព្រឹត្តិការណ៍ ២០ កុម្ភៈ ក៏ដោយ ក៏ក្រុមហ៊ុនមិនបានដាក់ពាក្យសុំពន្យារពេលវេលាណាមួយនោះទេ»។
លោកបន្ត៖ «នៅពេលនេះ ក្រុមហ៊ុនកំពុងស្ថិតក្នុងការរៀបចំសម្រាប់ការដាក់ឯកសារដែលជាប់ទាក់ទងនឹងការទទួលបានវិញ្ញាបនបត្រព្រលានយន្តហោះសម្រាប់ប្រតិបត្តិការ។ ខ្ញុំគិតថា នៅដំណាក់កាលដំបូង ពួកគេគ្រាន់តែដំណើរការសាកល្បងនូវគ្រឿងបរិក្ខារដែលបំពាក់រួច និងមានជើងហោះហើរជាលក្ខណៈជួល មិនមែនលក្ខណៈទៀងទាត់នោះទេ ដោយសារវាអាស្រ័យលើភាពធូរស្រាលនៃជំងឺកូវីដ ១៩ និងទំនុកចិត្តរបស់អ្នកដំណើរតែប៉ុណ្ណោះ»។
ព្រលានយន្តហោះអន្តរជាតិតារាសាគរមានតម្លៃ ៣៥០ លានដុល្លារនៅស្រុកបទុមសាគរកំពុងអភិវឌ្ឍដោយក្រុមហ៊ុនចិន Tianjin Union Development Group (UDG)។ ព្រលានយន្តហោះមួយនេះមានសមត្ថភាពអាចទទួលយន្តហោះចម្ងាយឆ្ងាយ ចុះចត រួមមានយន្តហោះប្រភេទ Boeing 777 និង ប្រភេទយន្តហោះ Airbus A340។
ការសាងសង់ព្រលានយន្តហោះអន្តរជាតិនៅខេត្តកោះកុងមានដើមទុនវិនិយោគ ៤០ លានដុល្លារ ដែលជាការវិនិយោគរួមគ្នារវាងក្រុមហ៊ុនរបស់លោក លី យ៉ុងផាត់ និងក្រុមហ៊ុន Bangkok Airways Plc ត្រូវបានផ្អាកដំណើរការរហូតដល់ស្ថានការណ៍ជំងឺកូវីដធូរស្រាលឡើងវិញ។
លោក ចាន់សេរីវុត្ថា បានឱ្យដឹងថា ទោះបីជាមានការចាក់វ៉ាក់សាំងប្រឆាំងនឹងជំងឺកូវីដ ១៩ ក៏ដោយ ក៏អ្នកដំណើរនឹងនៅតែប្រុងប្រយ័ត្ន និងបារម្ភក្នុងការជិះយន្តហោះដែរ។
លោកបន្តថា៖ «វិស័យអាកាសចរណ៍ មិនទាន់កើនឡើងវិញនោះទេ ដោយសារមានការបារម្ភជុំវិញការឆ្លងបណ្តាលមកពីការរីករាលដាលជំងឺកូវីដ ១៩។ ដូច្នេះវានៅតែមានភាពមិនច្បាស់លាស់ ហើយយើងសង្ឃឹមថា ប្រសិនបើការចាប់ផ្ដើមការចាក់វ៉ាក់សាំងប្រឆាំងជំងឺកូវីដ ១៩ មានប្រសិទ្ធភាពច្រើននឹងមានការកើនឡើងវិញរបស់ឧស្សាហកម្មមួយនេះជាក់ជាមិនខាន»។
ចរាចរណ៍នៃអ្នកដំណើរទាំងជាតិ និងអន្តរជាតិតាមព្រលានយន្តហោះអន្តរជាតិទាំង ៣ របស់ប្រទេសកម្ពុជារួមមាន ព្រលានយន្តហោះអន្តរជាតិភ្នំពេញ ខេត្តសៀមរាប និង ខេត្តព្រះសីហនុបានធ្លាក់ចុះ ៨១,៣ ភាគរយកាលពីឆ្នាំមុន ធៀបនឹងឆ្នាំ ២០១៩ ខណៈដែលចរាចរណ៍ទំនិញក៏បានធ្លាក់ចុះ ២៩,៩ ភាគរយ ដោយសារតែការអាក់ខានដែលបានបណ្ដាលមកពីការរីករាលដាលជំងឺកូវីដ ១៩។ នេះបើយោងតាមអ្នកនៅក្នុងឧស្សាហកម្មនេះ។
ក្រុមហ៊ុន Cambodia Airports បានរាយការណ៍ថា ព្រលានយន្តហោះអន្តរជាតិទាំង ៣ នៅក្នុងប្រទេសកម្ពុជាបានស្វាគមន៍អ្នកដំណើរ ១១,៦ លាននាក់ កាលពីឆ្នាំ ២០១៩ ដែលបង្ហាញការកើនឡើង ១០,២ ភាគរយ ធៀបនឹងឆ្នាំ ២០១៨។
ក្រុមហ៊ុននេះបានឱ្យដឹងថា ព្រលានយន្តហោះទាំង ៣ ខាងលើបានបម្រើទិសដៅរួមគ្នាជាង ៥៥ និងស្វាគមន៍ជើងហោះហើរលក្ខណៈទៀងទាត់ ៧០០ ជើង ក្នុង ១ សប្ដាហ៍៕LA