ភ្នំពេញៈ ទោះបីការរីករាលដាលជំងឺកូវីដ ១៩ បានធ្វើឲ្យប៉ះពាល់យ៉ាងខ្លាំងដល់វិស័យអាកាសចរណ៍ក្តី ក៏ផែនការនៃការសាងសង់ព្រលានយន្តហោះអន្តរជាតិសៀមរាបមិនបានផ្លាស់ប្តូរនោះទេ ដោយវានឹងត្រូវបញ្ចប់តាមពេលវេលាកំណត់ត្រឹមឆ្នាំ ២០២៣។
លោក Lu Wei ប្រធានក្រុមប្រឹក្សាក្រុមហ៊ុនវិនិយោគព្រលានយន្តហោះអន្តរជាតិអង្គរ (AI AI) បានថ្លែងក្នុងជំនួបជាមួយនឹងលោក ម៉ៅ ហាវណ្ណាល់ រដ្ឋលេខាធិការអាកាសចរស៊ីវិល (SSCA) កាលពីថ្ងៃចន្ទថា ដោយមានទំនាក់ទំនងដ៏ជិតស្និទ្ធរវាងមេដឹកនាំប្រទេសទាំង ២ ជាពិសេសក្នុងអំឡុងពេលប្រយុទ្ធប្រឆាំងនឹងជំងឺកូវីដ ១៩ ក្រុមហ៊ុននៅតែទទួលបានការគាំទ្រពី SSCA ដើម្បីបង្កើនល្បឿនការសាងសង់ព្រលានយន្តហោះនេះ។
លោកថ្លែងថា៖ «ក្រុមហ៊ុននេះបានចាប់ផ្ដើមការសាងសង់ព្រលានយន្តហោះអន្តរជាតិសៀមរាបថ្មីចាប់តាំងពីថ្ងៃទី ១៥ ខែមីនា មក។ ការសាងសង់នឹងត្រូវការរយៈពេល ៣៦ ខែ ហើយវានឹងត្រូវបញ្ចប់ទាំងស្រុងនៅថ្ងៃទី ១៤ ខែមីនា ឆ្នាំ ២០២៣»។ លោកបន្ថែមថា បច្ចុប្បន្នក្រុមហ៊ុនកំពុងធ្វើការយ៉ាងជិតស្និទ្ធជាមួយក្រុមអ្នកបច្ចេកទេសរបស់ SSCA ដែលភាគច្រើនផ្ដោតការយកចិត្តទុកដាក់លើការដំឡើងឧបករណ៍បច្ចេកទេស និងការរចនាព្រលានយន្តហោះថ្មីនេះ។
លោក ស៊ិន ចាន់សេរីវុត្ថា អ្នកនាំពាក្យ SSCA បានប្រាប់ភ្នំពេញប៉ុស្ដិ៍ថា ទោះបីការរីករាលដាលជំងឺកូវីដកំពុងប៉ះពាល់ដល់ឧស្សាហកម្មអាកាសចរណ៍ក៏ដោយ ក៏ក្រុមហ៊ុន AIAI បានប្ដេជ្ញាចិត្តរួចហើយសម្រាប់ការសង់ព្រលានយន្តហោះថ្មីនេះ ដើម្បីសម្រេចបានតាមពេលវេលាគ្រោងទុក។
លោកថ្លែងថា៖ «ពិតហើយ ការរីករាលដាលនេះកំពុងប៉ះពាល់ដល់ឧស្សាហកម្មនេះ ប៉ុន្តែវាមិនបណ្ដាលឲ្យមានការពន្យារពេលការសាងសង់ទេ។ តាមពិតមានការពន្យារពេលការធ្វើដំណើរសម្រាប់អ្នកជំនាញខ្លះ ដោយសារការហាមឃាត់ការធ្វើដំណើរ ប៉ុន្តែក្រុមហ៊ុននេះមិនមានបញ្ហាណាមួយជាមួយនឹងហិរញ្ញវត្ថុទេ។ នៅពេលនេះពួកគេបានដាក់កម្មករកាន់តែច្រើនសម្រាប់ការសាងសង់»។
ព្រលានយន្តហោះថ្មីដែលគ្រោងចំណាយប្រាក់ ៨៨០ លានដុល្លារនេះត្រូវបានសាងសង់លើផ្ទៃដី ៧៥០ ហិកតានៅស្រុកសូទ្រនិគម ជាយក្រុងសៀមរាប។ គម្រោងនេះនឹងត្រូវបានសាងសង់ ៣ ដំណាក់កាល។
ក្រុមហ៊ុននឹងវិនិយោគជាង ៥០០ លានដុល្លារ សម្រាប់ដំណាក់កាលទី ១ និង ២ ដែលនឹងអាចឲ្យយន្តហោះដឹកអ្នកដំណើរទំហំមធ្យម និងចម្ងាយឆ្ងាយដូចជាយន្តហោះ Boeing 737 និងយន្តហោះ Airbus A320 ចុះចតបាន។ ទឹកប្រាក់ ៣០០ លានដុល្លារផ្សេងទៀតនឹងត្រូវបម្រុងទុកសម្រាប់ដំណាក់កាលទី ៣។
កាលពីខែតុលាឆ្នាំ ២០១៧ កិច្ចព្រមព្រៀងដើម្បីសាងសង់ព្រលានយន្តហោះថ្មីនេះត្រូវបានចុះហត្ថលេខាដោយរដ្ឋាភិបាលកម្ពុជា និង Yunnan Investment Holdings, Ltd ជាក្រុមហ៊ុនរដ្ឋរបស់ប្រទេសចិន។ កិច្ចព្រមព្រៀងនេះបានផ្ដល់ដល់ក្រុមហ៊ុនចិននូវសិទ្ធិផ្ដាច់មុខក្នុងការដំណើរការ និងការគ្រប់គ្រងសម្បទានព្រលានយន្តហោះនេះក្នុងរយៈពេល ៥៥ ឆ្នាំស្ថិតក្រោមផែនការសាងសង់ ប្រតិបត្តិការ ផ្ទេរ (BOT)។
យោងតាមលោក សេរីវុត្ថា តាមរយៈការសិក្សាព្រលានយន្តហោះអន្តរជាតិថ្មីនេះអាចទទួលអ្នកដំណើរបាន ១០ លាននាក់ ក្នុងឆ្នាំ ២០៣០ និង ២០ លាននាក់ត្រឹមឆ្នាំ ២០៥០។
លោកបានបន្ថែមថា៖ «យើងសង្ឃឹមថា ក្រោយពីបញ្ចប់ការសាងសង់ ព្រលានយន្តហោះនេះនឹងដាក់ឲ្យដំណើរការយ៉ាងល្អ ខណៈការរីករាលដាលជំងឺកូវីដនឹងត្រូវបញ្ចប់»៕ LA