ភ្នំពេញៈ ព្រលានយន្តហោះអន្តរជាតិសំខាន់ទាំង ៣ របស់កម្ពុជាបានស្វាគមន៍ អ្នកដំណើរ ១០ លាននាក់កាលពីម្សិលមិញ ដែលជាទំព័រថ្មីមួយសម្រាប់ក្រុមហ៊ុន Cambodia Airport។ នេះបើយោងតាមសេចក្តីប្រកាសព័ត៌មាន ចេញផ្សាយកាលពីម្សិលមិញ ដោយក្រុមហ៊ុន Cambodia Airport។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានបញ្ជាក់ថា ប្រតិបត្តិករអាកាសចរណ៍ចាំបាច់ត្រូវត្រៀមខ្លួនជាមុន ដើម្បីចាប់យកកំណើននៅក្នុងឧស្សាហកម្មនេះ។
សេចក្ដីប្រកាសព័ត៌មាននេះឲ្យដឹងថា ព្រលានយន្តហោះ ៣ របស់ប្រទេស កម្ពុជា បានទទួលបានអ្នកដំណើរឆ្លងកាត់ជាលើកដំបូង ១០ លាននាក់។ តួលេខដែលទទួលបាននេះ គឺរួមបញ្ចូលគ្នានៃការមកដល់ទាំងអ្នកដំណើរអន្តរជាតិ និងក្នុងស្រុកទាំងអស់ ទាំងទៅ និងចេញដំណើរពីព្រលានយន្តហោះអន្តរជាតិភ្នំពេញ សៀមរាប និងក្រុងព្រះសីហនុ។
លោក Eric Delobel ប្រធានប្រតិបត្តិក្រុមហ៊ុន បានឲ្យដឹងថា ការតភ្ជាប់ និងការរួមបញ្ចូលគ្នា រវាងព្រលានយន្តហោះទាំង ៣ បានរួមចំណែកដ៏សំខាន់ក្នុងការនាំយកអ្នកដំណើរកាន់តែច្រើនឡើងៗ មកប្រទេស កម្ពុជា។
លោកថ្លែងថា៖ «ជារួម ការធ្វើចរាចរណ៍ដ៏រឹងមាំនៅព្រលានយន្តហោះទាំងនេះ ឆ្លុះបញ្ចាំងពីកំណើនទេសចរនៅកម្ពុជា ជាពិសេសវាបានជំរុញដោយភាពទាក់ទាញថ្មីៗនៃតំបន់ឆ្នេរសមុទ្ររបស់កម្ពុជា និងលទ្ធផលសេដ្ឋកិច្ចប្រកបដោយជោគជ័យ ដល់ឱកាសពាណិជ្ជកម្ម»។ លោកបន្ថែមថា ចរាចរណ៍អ្នកដំណើរបានកើនឡើង ២ ដងក្នុងរយៈពេល ៥ ឆ្នាំថ្មីៗនេះ។
លោកថ្លែងថា៖ «លើកម្រិតពិភពលោក យើងទទួលបានអត្ថប្រយោជន៍នៃ ផ្នែក ១ នៃបណ្ដាញទូទាំងពិភពលោករបស់ព្រលានយន្តហោះ ដែលគ្រប់គ្រងដោយក្រុមហ៊ុន VINCI Airports ជាក្រុមហ៊ុនមេរបស់យើង។ គំរូពាណិជ្ជកម្មដែលក្រុមហ៊ុន VINCI Airports បានអភិវឌ្ឍសម្រាប់ប្រព័ន្ធព្រលានយន្តហោះរបស់កម្ពុជា បានបង្ហាញការទាក់ទង ហើយខ្ញុំមានទំនុកចិត្តថា វានឹងនាំពួកយើងឲ្យទទួលបានជោគជ័យនៅពេលអនាគត»។
លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានឲ្យដឹងថា ទីផ្សារអាកាសចរណ៍កម្ពុជាបានកើនឡើងយ៉ាងរហ័ស ខណៈវាមិនត្រូវបានរំពឹងថានឹងទទួលបានចំនួនដ៏ច្រើនលឿនដូចនេះទេ។
លោកថ្លែងថា៖ «ចំនួនអ្នកដំណើរបានកើនឡើងដោយមិនបានរំពឹងទុក វាបង្ហាញថា គោលនយោបាយរបស់យើងសម្រាប់ការអភិវឌ្ឍសេដ្ឋកិច្ច កំពុងស្ថិតលើផ្លូវត្រឹមត្រូវ»។ លោកបន្តថា៖ «ប្រតិបត្តិករអាកាសចរណ៍ ចាំបាច់ត្រូវតែរៀបចំឲ្យបានប្រសើរ ដើម្បីទទួលបានកំណើននេះ ព្រមទាំងផែនការយុទ្ធសាស្ដ្រ និងផែនការពាណិជ្ជកម្ម ដើម្បីឆ្លើយតបនឹងអតិថិជនរបស់ពួកគេ»។
លោក ចាន់សិរីវុត្ថា បានឲ្យដឹងថា ជាមធ្យមយ៉ាងហោចណាស់មានក្រុមហ៊ុនអាកាសចរណ៍៤ស្នើចុះបញ្ជីក្នុង១ឆ្នាំៗ ខណៈការធ្វើចរាចរណ៍ដឹកជញ្ជូនទំនិញបានរក្សាកំណើនផងដែរ។
លោក ប៊ុនថៃ ឧត្តម ប្រធានគ្រប់គ្រងទំនិញនៅក្រុមហ៊ុនដឹកជញ្ជូនតាមអាកាស One World Aviation ឲ្យដឹងថា និន្នាការទីផ្សារអាកាសចរណ៍បានកើនឡើង ខណៈអចលនទ្រព្យនៅកម្ពុជា កំពុងមានភាពពេញនិយមសម្រាប់ក្រុមវិនិយោគិនចិន។
លោកថ្លែងថា៖ «ប្រសិនបើយើងសម្លឹងមើលតួលេខ អ្នកដំណើរជនជាតិចិន កំពុងនាំមុខ ខណៈឧស្សាហកម្មអចលនទ្រព្យរបស់យើងកំពុងកើនឡើង និងទាក់-ទាញក្រុមវិនិយោគិនជាច្រើនមកកម្ពុជារបស់យើង ជាពិសេសក្រុមវិនិយោគិនជនជាតិចិន»។ លោកថ្លែងថា៖ «ដូច្នេះពី១ឆ្នាំទៅ១ឆ្នាំទីផ្សារអាកាសចរណ៍ បានរក្សាកំណើន ហើយក្រុមហ៊ុនអាកាសចរណ៍បន្តបង្កើនជើងហោះហើរត្រង់ និងជើងហោះហើរទៀងទាត់ របស់ពួកគេផងដែរ»។
កាលពីឆ្នាំ ២០១៧ ចំនួនអ្នកដំណើរឆ្លងកាត់តាមព្រលានយន្តហោះអន្តរជាតិរបស់កម្ពុជា មានសរុប ៨,៨ លាននាក់ ក្នុងនោះព្រលានយន្តហោះអន្តរជាតិភ្នំពេញមានចំនួន ៤,២ លាននាក់ និងសៀមរាបសរុប ៤,២ លាននាក់។ នេះបើយោងតាមរបាយការណ៍របស់ក្រុមហ៊ុន Cambodia Airports។
របាយការណ៍បង្ហាញថា ដោយចាប់ពីមូលដ្ឋានទាប ព្រលានយនហោះអន្តរជាតិក្រុងព្រះសីហនុ មានកំណើន ៣ ខ្ទង់ ដោយទទួលអ្នកដំណើរ ៣៣៨ ០០០នាក់កាលពីឆ្នាំ ២០១៧៕LA