The Phnom Penh Post Search

Search form

Logo of Phnom Penh Post newspaper Phnom Penh Post - ព្រលាន​យន្តហោះ​អន្តរជាតិ​ថ្មី នៅ​ដំណើរ​ការ​នៅ​ឡើយ




ព្រលាន​យន្តហោះ​អន្តរជាតិ​ថ្មី នៅ​ដំណើរ​ការ​នៅ​ឡើយ

ព្រលាន​យន្តហោះ​អន្តរជាតិ​ថ្មី នៅ​ដំណើរ​ការ​នៅ​ឡើយ

ភ្នំពេញៈ មន្ត្រី​ជាន់​ខ្ពស់​របស់​រដ្ឋាភិបាល បាន​ឲ្យ​ដឹង​ថា គម្រោង​សាង​សង់​ព្រលាន​យន្ត​ហោះ​អន្តរជាតិ​សៀមរាប​ថ្មី(NSRIA) ដែល​វិនិយោគ​ក្នុង​ទឹក​ប្រាក់​១​ពាន់​លាន​ដុល្លារ​អាមេរិក នៅ​តែ​ស្ថិត​ក្នុង​ដំណើរ​ដ៏​ល្អ​នៅ​ឡើយ។

ព្រលាន​យន្តហោះ​នេះ វិនិយោគ​ដោយ​ក្រុមហ៊ុន​កូរ៉េ​ពីរ គឺ​ក្រុមហ៊ុន Camco Airport Co., Ltd និង​ក្រុមហ៊ុន Lees A&A ដែល​ក្រុមហ៊ុន​ទាំង​ពីរ​កាន់​កាប់​ភាគ​ហ៊ុន ៥០​ភាគ​រយ​ម្នាក់ ហើយ​ទទួល​បាន​ការ​អនុញ្ញាត​ពី​រដ្ឋាភិបាល​កម្ពុជា កាល​ពី​ចុង​ឆ្នាំ​២០១០ ដើម្បី​សាង​សង់​ព្រលាន​យន្ត​ហោះ​ស្តង់ដារ​អន្តរជាតិ​ដែល​អាច​ផ្ទុក​អ្នក​ដំណើរ​បាន​ពី១០ ទៅ១៥​លាន​នាក់ ក្នុង​មួយ​ឆ្នាំ។

លោក តឹក រ៉េត​សំរេច ប្រធាន​គណៈ​កម្មាធិការ​អចិន្រៃ្តយ៍​ទទួល​បន្ទុក​ដឹក​នាំ​ការ​សាង​សង់​ព្រលាន​យន្ត​ហោះ​អន្តរជាតិ​សៀមរាប​ថ្មី​នេះ បាន​ឲ្យ​ដឹង​ថា ថ្មីៗ​នេះ ក្រុមហ៊ុន​ទាំង​ពីរ បាន​ដាក់​ជូន​លិខិត​ស្តី​ពី​ការ​សិក្សា​ជំហាន​ដំបូង​មក​រូប​លោក ទាក់​ទង​នឹង​ព័ត៌មាន​ថ្មីៗ​អំពី​គម្រោង​នេះ។

លោក​បាន​មាន​ប្រសាសន៍​ថា៖ «តំណាង​ក្រុមហ៊ុន​នេះ បាន​ជួប​យើង​កាល​ពី​សប្តាហ៍​មុន​ដើម្បី​ជូន​ដំណឹង​អំពី​ការងារ​យឺត​យ៉ាវ និង​បញ្ហា​ដែល​ពួក​គេ​ប្រឈម ប៉ុន្តែ​ពួក​គេ​បាន​ដោះស្រាយ​បញ្ហា​ទាំង​នោះ​រួច​រាល់​ហើយ។ ឥឡូវ ពួក​គេ បាន​ត្រៀម​រៀប​ចំ​ការ​គ្រប់​គ្រង​ហិរញ្ញវត្ថុ​ថ្មី​សម្រាប់​គម្រោង​នេះ​រួច​ហើយ»។

លោក​បាន​បន្ថែម​ថា៖ «ជា​ការ​ពិត​យើង​បាន​យល់​ស្រប​ថា ការងារ​របស់​ពួក​គេ មាន​ភាព​យឺត​យ៉ាវ​បន្តិច ចាប់​ពី​ពួក​គេ​បាន​ចុះ​ហត្ថលេខា​ជាមួយ​យើង​ដើម្បី​វិនិយោគ​គម្រោង​នេះ កាល​ពី​ឆ្នាំ​២០១០។ ឥឡូវ ២០១៣ ហេតុ​អ្វី​បាន​ជា​គ្មាន​អ្វី​កើត​ឡើង​សោះ។ ប៉ុន្តែ ប្រសិន​បើ​យើង​សម្លឹង​មើល​លើ​ការ​វិនិយោគ​ដើម​ទុន​វិញ ឃើញ​ថា វា​មាន​ចំនួន​ច្រើន​ណាស់ ដូច្នេះ​ខ្ញុំ​គិត​ថា ពួក​គេ​ត្រូវ​ការ​ពេល​វេលា​ដើម្បី​ស្វែង​រក​ព័ត៌មាន​លម្អិត​ទាក់​ទង​នឹង​គម្រោង​នេះ»។

កាសែត​ភ្នំពេញ ប៉ុស្តិ៍ បាន​រាយការណ៍​កាល​ពី​ខែ​មីនា ឆ្នាំ​មុន​ថា លោក Lee Tae-hwan​អគ្គ​នាយក​ព្រលាន​យន្តហោះ​ថ្មី​នេះ ត្រូវ​បាន​កាត់​ទោស​ដាក់​ពន្ធនាគារ​៧ឆ្នាំ ពាក់​ព័ន្ធ​នឹង​កម្ចី​ឆបោក នៅ​ធនាគារ Busan Savings។ ទ្រព្យ​សកម្ម​របស់​ធនាគារ Busan Savings Bank ដែល​បាន​ផ្តល់​សម្រាប់​ការ​ទ្រទ្រង់​គម្រោង​សាង​សង់​ព្រលាន​យន្ត​ហោះ​នេះ និង​គម្រោង​អចលនវត្ថុ​នៅ​ទីក្រុង​ខេមកូ​ស៊ីធី ត្រូវ​បាន​ផ្ទេរ​ទៅ​ឲ្យ​ក្រុមហ៊ុន Korea Deposit Insurance Corporation របស់​រដ្ឋាភិបាល​កូរ៉េ។

លោក តឹក រ៉េត​សំរេច បាន​ឲ្យ​ដឹង​ថា គម្រោង​នេះ​គឺជា​គម្រោង​ល្អ ដែល​ទទួល​បាន​ការ​គាំទ្រ​ពី​ធនាគារ​ជា​ច្រើន។ លោក​បាន​បន្ត​ថា៖ «​បើ​ធនាគារ​មួយ​ក្ស័យ​ធន ពួក​គេ​នៅ​មាន​ធនាគារ​ជា​ច្រើន​ទៀត​គាំទ្រ​គម្រោង​នេះ ដោយ​សារ​គម្រោង​នេះ​ល្អ ហើយ​នរណាៗ​ក៏​ចង់​បាន​វា​ដែរ»។ លោក​បន្ថែម​ថា៖ «ឥឡូវ​ពួក​គេ​នៅ​តែ​បន្ត​ការ​ងារ​វិស្វកម្ម​ដដែល។ ខ្ញុំ​មិន​ព្រួយ​បារម្ភ​អំពី​គម្រោង​នេះ​ឡើយ ដោយ​សារ​ពួក​គេ​តែង​តែ​ជូន​ដំណឹង​ដល់​យើង។ ខ្ញុំ​គិត​ថា ពួក​គេ​នឹង​ចាប់​ផ្តើម​បើក​ការដ្ឋាន​សាង​សង់​ក្នុង​ពេល​ឆាប់ៗ​នេះ»៕ CS

អត្ថបទគួរចាប់អារម្មណ៍