The Phnom Penh Post Search

Search form




Logo of Phnom Penh Post newspaper Phnom Penh Post - ព្រលាន​យន្តហោះ​អន្តរជាតិ​សៀម​រាប​ថ្មី​នឹង​ចាប់ផ្តើម​ដើម ២០១៤

ព្រលាន​យន្តហោះ​អន្តរជាតិ​សៀម​រាប​ថ្មី​នឹង​ចាប់ផ្តើម​ដើម ២០១៤

ព្រលាន​យន្តហោះ​អន្តរជាតិ​សៀម​រាប​ថ្មី​នឹង​ចាប់ផ្តើម​ដើម ២០១៤

ភ្នំពេញៈ អាកាសយានដ្ឋាន​អន្តរជាតិ​ខេត្ត សៀមរាប ថ្មី (NSRIA) នឹង​ចាប់​ផ្តើម​បុក​គ្រឹះ​ដំណើរការ​សាង​សង់​នៅ​ដើម​ឆ្នាំ ២០១៤។ នេះ​បើ​តាម​ការ​ឲ្យ​ដឹង​ពី​លោក តឹក រ៉េតសំរេច ប្រធាន​គណៈ​កម្មាធិការ នាយក​ព្រលាន​យន្តហោះ។

អាកាសយានដ្ឋាន​អន្តរជាតិ​ខេត្ត សៀមរាប ថ្មី នេះ​ត្រូវ​បាន​គេ​រំពឹង​ទុក​ម្តង​ហើយ​ថា នឹង​អាច​ចាប់​ផ្តើម​ដំណើរ​ការ​បុក​គ្រឹះ​កាល​ពី​ខែ ឧសភា ឆ្នាំ​នេះ ប៉ុន្តែ​បាន​ខក​ខាន​ទៅ​វិញ។

លោក តឹក រ៉េតសំរេច ប្រាប់​ថា គម្រោង​វិនិយោគ​ដែល​មាន​តម្លៃ​ប្រមាណ ១ ពាន់​លាន​ដុល្លារ​នេះ​កំពុង​ដំណើរ​ធម្មតា។ លោក រ៉េតសំរេច ថ្លែង​ថា៖ «ក្រុម​ការងារ​គេ​កំពុង​សិក្សា​វាយតម្លៃ និង​រៀបចំ​គម្រោង​សាង​សង់​នេះ។ គេ​ធ្វើ​ដំណើរ​ចុះ​ឡើងៗ ដើម្បី​ធ្វើ​ការងារ​នេះ។ គេ​នឹង​ត្រូវ​ប្រគល់​ប្លង់​លម្អិត​ក្នុង​ពេល​ឆាប់ៗ​នេះ​ហើយ​។ យូរ ឬ ឆាប់​គឺ​អាស្រ័យ​ខាង​យើង​អនុម័ត​លើ​ប្លង់​លម្អិត​បាន​លឿន​ប៉ុនណា។ ប្រហែល​ដើម​ឆ្នាំ ២០១៤ គេ​អាច​ចាប់​បុកគ្រឹះ​ហើយ»។ ពាក់​ព័ន្ធ​នឹង​ពន្យារ​ពេល​បុកគ្រឹះ​លោក តឹក រ៉េតសំរេច ពន្យល់​ថា ដោយ​សារ​ធនាគារ​នៅ​កូរ៉េ​ដែល​ជា​អ្នក​គាំទ្រ គម្រោង​សាង​សង់​ព្រលាន​យន្តហោះ​ថ្មី​នេះ​ជួប​វិបត្តិ​ថវិកា​កាល​ពី ឆ្នាំ ២០១២ ដែល​តម្រូវ​ឲ្យ​ក្រុមហ៊ុន​វិនិយោគ​ត្រូវ​រៀបចំ​គម្រោង​ថវិកា​ឡើង​វិញ តែ​បាន​បន្ថែម​ថា ក្រុមហ៊ុន​វិនិយោគ​ទាំង​ពីរ​កំពុង​ពន្លឿន​ការងារ​ក្នុង​គម្រោង​នៅ​ឆ្នាំ ២០១៣ នេះ។

កាល​ពី​ខែ មីនា ២០១២ លោក Lee Tae-hwan ប្រធាន​នាយក​ប្រតិបត្តិ NSRIA ត្រូវ​កាត់​ទោស​ឲ្យ​ជាប់​គុក ៧ឆ្នាំ ពាក់​ព័ន្ធ​នឹង​ការ​បោក​បន្លំ​កម្ចី​នៅ​ធនាគារ Busan។ ទ្រព្យ​សម្បត្តិ​ដែល​មាន​តម្កល់​នៅ​ក្នុង​ធនាគារ​នេះ​សម្រាប់​ទ្រទ្រង់ គម្រោង​សាង​សង់​ព្រលាន​យន្តហោះ រួម​ជាមួយ​នឹង​គម្រោង​អចលនទ្រព្យ Camko City ត្រូវ​បាន​ប្រគល់​ទៅ​ឲ្យ​សាជីវកម្ម​ធានា​រ៉ាប់រង​ដែល​គ្រប់​គ្រង​ដោយ​រដ្ឋាភិបាល​កូរ៉េ​នៅ​ឆ្នាំ ២០១១។ នេះ​បើ​តាម​លោក Ernst Lee អ្នក​នាំ​ពាក្យ​គណៈកម្មាការ​សេវាកម្ម​ហរិញ្ញវត្ថុ​របស់​កូរ៉េ។

លោក តឹក រ៉េតសំរេច និយាយ​ថា ដំណើរការ​គម្រោង​នេះ​មិន​មាន​ភាព​យឺត​យ៉ាវ​នោះ​ទេ៖ «បើ​គិត​ទៅ​យើង​ទើប​តែ​អនុញ្ញាត​ចំពោះ​ការ​ស្នើ​សុំ​គម្រោង​នេះ​នៅ​ឆ្នាំ ២០១០។ ដល់​ពេល​នេះ​ទើប​តែ​មាន​រយៈ​ពេល​បី​ឆ្នាំ​ប៉ុណ្ណោះ។

សម្រាប់​គម្រោង​ធំ​បែប​នេះ​ខ្ញុំ​ថា​វា​មិន​យឺត​យ៉ាវ​នោះ​ទេ»។

កាល​ពី ២០១០ រដ្ឋាភិបាល​សម្រេច​ប្រគល់​សិទ្ធិ​ទៅ​ឲ្យ​ក្រុមហ៊ុន​កូរ៉េ​ពីរ Camco Airport Co., Ltd និង Lees A&A ដែល​មាន​ភាគ​ហ៊ុន​ម្នាក់ ៥០ ភាគរយ ដើម្បី​សាង​សង់​អាកាសយានដ្ឋាន​អន្តរជាតិ​ខេត្ត សៀមរាប ថ្មី ដែល​អាច​ទទួល​អ្នក​ដំណើរ​បាន​ចន្លោះ​ពី ១០ លាន​ទៅ ១៥ លាន​នាក់​ក្នុង​មួយ​ឆ្នាំៗ។ គម្រោង​អភិវឌ្ឍន៍​នេះ​គ្រោង​នឹង​ធ្វើ​ឡើង​នៅ​ស្រុក​ចំនួន​ពីរ គឺ​ស្រុក ជីក្រែង និង សូទ្រនិគម ដែល​មាន​ចម្ងាយ ៦០ គីឡូម៉ែត្រ​ពី​ទីរួម​ខេត្ត សៀមរាប។ ក្រុមហ៊ុន​វិនិយោគ​ទាំង​ពីរ​ចំណាយ​ទុន ២០០ លាន​ដុល្លារ​រួច​ហើយ​ដើម្បី​ទិញ​ដី​សម្រាប់​សាងសង់៕

អត្ថបទគួរចាប់អារម្មណ៍