ទីក្រុងហុងកុងៈ តម្លៃភាគហ៊ុនរបស់ក្រុមហ៊ុនអាកាសចរណ៍អាស៊ីបានហក់ឡើងនៅថ្ងៃអង្គារដែលរុញច្រានដោយព័ត៌មានដែលថា វត្តមានវ៉ាក់សាំងថ្មីមានប្រសិទ្ធភាពប្រឆាំងនឹងវីរុសកូរ៉ូណា ដែលជាក្តីសង្ឃឹមដែលថា ពិភពលោកនឹងចាប់ផ្តើមងាកទៅរកភាពប្រក្រតីឡើងវិញឆាប់ៗ។
ទោះបីជាយ៉ាងណា ទីផ្សារភាគហ៊ុនធំៗនៅអាស៊ីខិតខំប្រឹងប្រែងដើម្បីប្រើប្រាស់ការកើនឡើងរបស់ផ្សារហ៊ុន Wall Street ជាមូលដ្ឋានគ្រឹះ ដោយសារតែអ្នកវិនិយោគជាច្រើនងាកទៅរកក្រុមហ៊ុនបច្ចេកវិទ្យា និងអ្នកផ្សេងទៀតដែលទទួលបានផលប្រយោជន៍អំឡុងពេលនៃការរីករាលដាលវីរុសកូរ៉ូណា។
ករណីឆ្លងវីរុសកំពុងមានសម្ទុះកើនឡើងទូទាំងសហរដ្ឋអាមេរិក និងអឺរ៉ុប និងក្តីបារម្ភដែលថា សមាជិកសភាអាមេរិកទាំងឡាយនៅទីក្រុងវ៉ាស៊ីនតោន ទំនងជាមិនយល់ព្រមអនុម័តនូវកញ្ចប់ជំរុញសេដ្ឋកិច្ចណាមួយ មុនដំណាច់ឆ្នាំនេះដែលបង្កឱ្យមានក្តីព្រួយបារម្ភដល់ទីផ្សារជួញដូរ។
អារម្មណ៍ក្នុងចំណោមពាណិជ្ជករមានសម្ទុះឡើងវិញនៅខែនេះ បន្ទាប់ពីការឈ្នះឆ្នោតរបស់ Joe Biden បានត្រួសត្រាយផ្លូវសម្រាប់ភាពប្រាកដប្រជាបន្ថែមទៀតនៅលើពិភពលោកហើយក្រុមហ៊ុនឱសថយក្ស Pfizer និង BioNTech បានប្រកាសថាវ៉ាក់សាំងប្រឆាំងវីរុសរបស់ពួកគេមានប្រសិទ្ធភាពជាង ៩០ ភាគរយ។
ព័ត៌មាននេះនាំឱ្យមានក្តីសង្ឃឹមចំពោះសេដ្ឋកិច្ចពិភពលោកអាចចាប់ផ្តើមងាកទៅភាពប្រក្រតីវិញឆាប់ៗ។
កាលពីថ្ងៃចន្ទដែលទស្សនវិស័យសេដ្ឋកិច្ចត្រូវបានគេធ្វើបច្ចុប្បន្នភាពជាថ្មី ពេលដែលក្រុមហ៊ុនបច្ចេកវិទ្យាជីវសាស្ត្រអាមេរិក Moderna អះអាងថា លទ្ធផលធ្វើតេស្តបង្ហាញថា វ៉ាក់សាំងរបស់ខ្លួនមានប្រសិទ្ធភាពរហូតដល់ទៅ ៩៤,៥ ភាគរយឯណោះ។
អ្នកវិទ្យាសាស្ត្រផ្នែកជំងឺឆ្លងកំពូលរបស់សហរដ្ឋអាមេរិកលោក Anthony Fauci បានសាទរចំពោះការប្រកាសនេះថាជា៖ «គួរឱ្យចាប់អារម្មណ៍ណាស់ ហើយវាពិតជាលទ្ធផលដ៏វិសេសវិសាលណាស់»។
សន្ទស្សន៍ភាគហ៊ុនរបស់ក្រុមហ៊ុនធំៗទាំង ៣ នៅ Wall Street បានកើនឡើងខ្ពស់ ដោយភាគហ៊ុន Dow និង S&P 500 បានកើនឡើងដល់កម្រិតខ្ពស់បំផុតនៃកំណត់ត្រាថ្មី។
ទោះបីជាយ៉ាងណា អាស៊ីមិនអាចរក្សាសម្ទុះខ្លាំងពីថ្ងៃមុនបានទេដោយផ្សារហ៊ុនទីក្រុងតូក្យូមានភាពថេរ និងផ្សារហ៊ុននៅទីក្រុង Shanghai របស់ចិន ទីក្រុងសេអ៊ូលរបស់កូរ៉េខាងត្បូង និងទីក្រុង Wellington របស់ប្រទេសនូវែលសេឡង់ស្ថិតនៅលើបន្ទាត់ក្រហម ខណៈពេលដែលផ្សារភាគហ៊ុនទីក្រុង ហុងកុង ទីក្រុងស៊ីដនី ប្រទេសសិង្ហបុរី ទីក្រុងតៃប៉ិ និងហ្សាការតាកើនឡើងក្នុងអំឡុងពេលនេះ៕