ភ្នំពេញៈ រដ្ឋមន្រ្តីក្រសួងទេសចរណ៍កម្ពុជាបានឲ្យដឹងថា មិនមានការធ្លាក់ចុះចំនួនភ្ញៀវកូរ៉េ ឬមានការលុបជើងហោះហើរមកកាន់កម្ពុជាក្នុងរយៈពេលមានភាពតានតឹងនៅឧបទ្វីបកូរ៉េនោះទេ។
ភាពតានតឹងរវាងកូរ៉េទាំងពីរចាប់ផ្ដើមឡើងកម្តៅនៅក្នុងរយៈប៉ុន្មានខែនេះរហូតដល់មានការដាក់ប្រទេសក្នុងស្ថានភាពសង្គ្រាម។
លោកថោង ខុន រដ្ឋមន្រ្តីក្រសួងទេសចរណ៍លើកឡើងថាមិនឃើញមានការលុបចោលជើងយន្តហោះឬក៏ការពន្យារជើងហោះហើរណាមួយក៏ដូចជាការធ្លាក់ចុះចំនួនអ្នកទេសចរកូរ៉េមកកម្ពុជានោះទេ។លោកថ្លែងថា៖ «មិនមានរបាយការណ៍ផ្ញើមកខ្ញុំដែលនិយាយថា ភាពតានតឹងនេះមានឥទ្ធិពលលើឧស្សាហកម្មទេសចរណ៍របស់យើងទេ។ ប៉ុន្តែជាធម្មតាអំឡុងពេលរដូវក្ដៅចំនួនអ្នកទេសចរមានការធ្លាក់ចុះតិចតួច»។
លោក បន្ថែមថាតាមទិន្នន័យភ្ញៀវពីកូរ៉េខាងត្បូងឈរលេខមួយក្នុងរយៈពេលពីរខែដំបូងនៅឆ្នាំនេះដោយកើនឡើង៨ភាគរយដល់១២០ ០០០នាក់។
លោក ឆឺយ ឆន ប្រធានមន្ទីរទេសចរណ៍ខេត្តសៀមរាបបាននិយាយថាមិនមានការធ្លាក់ចុះភ្ញៀវទេសចរកូរ៉េទេនៅខេត្តរបស់លោកក្នុងពេលនេះ។
លោក ខែក នរិន្ទដា ប្រធានទំនាក់ផ្នែកសាធារណៈនៅព្រលានអន្តរជាតិភ្នំពេញបានអះអាងថាមិនមានការលុបចោលជើងហោះហើរនិងការពន្យារពេលពីកូរ៉េនោះទេ។
ប៉ុន្តែតំណាងវិស័យឯកជនមានការព្រួយបារម្ភចំពោះបញ្ហានេះ។
លោក ហូ វណ្ឌី បានឲ្យដឹងថា៖ «វាជាបញ្ហាប្រឈមដ៏ធំសម្រាប់យើងទាំងអស់គ្នាដោយសារតែទេសចរកូរ៉េមានសក្ដានុពលសម្រាប់យើង។ បើស្ថានភាពកាន់តែធ្ងន់ធ្ងរឡើងៗនឹងមានផលប៉ះពាល់ដ៏ធំចំពោះឧស្សាហកម្មទេសចរណ៍របស់យើងដូចជាយើងប្រឈមនឹងទេសចរជប៉ុនដែលធ្លាប់តែឈរលំដាប់ទីមួយមុនពួកគេត្រូវបានរងឥទ្ធិពលដោយរលក យក្សស៊ូណាមិ»។
ទិន្នន័យផ្លូវការពីក្រសួងទេសចរណ៍បានបង្ហាញថាកម្ពុជាទទួលបានអ្នកទេសចរកូរ៉េ ៤១១ ៤៩១ នាក់ក្នុងឆ្នាំ២០១២ធៀបនឹងឆ្នាំ២០១១ មានចំនួន ៣៤២ ៨១០នាក់៕ PB
