The Phnom Penh Post Search

Search form




Logo of Phnom Penh Post newspaper Phnom Penh Post - ភាព​មិនប្រាកដប្រជា​ចំពោះ​វិស័យ​កាត់ដេរ​ឆ្នាំ​នេះ?

ភាព​មិនប្រាកដប្រជា​ចំពោះ​វិស័យ​កាត់ដេរ​ឆ្នាំ​នេះ?

ភាព​មិនប្រាកដប្រជា​ចំពោះ​វិស័យ​កាត់ដេរ​ឆ្នាំ​នេះ?

140129_11
កម្មការិនីកំពុងរៀចំសម្លៀកបំពាក់នៅក្នុងរោងចក្រ Grand Twins កាលពីសប្តាហ៍មុន ម៉ៃ វីរៈ

ភ្នំពេញ: ទោះ​បីជា​ប្រទេស​មាន​ការ​បោះឆ្នោត​សកល ការ​ជាប់គាំង​នយោបាយ និង​ការ​ធ្វើ​បាតុកម្ម​កើតឡើង​នៅក្នុង​ឧស្សាហកម្ម​កាត់ដេរ​អំពី ប្រាក់ឈ្នួល​អប្បបរមា កាលពី​ឆ្នាំ​មុន​ក៏ដោយ ក៏​តួលេខ​នាំ​ចេញ​សម្លៀកបំពាក់ និង​វាយនភ័ណ្ឌ​បាន​បង្ហាញ​ថា វា​បាន​កើនឡើង​ខ្ពស់ កាលពី​ឆ្នាំ​២០១៣។ ប៉ុន្តែ អ្នក​វិភាគ​និង​ក្រុម​មន្រ្តី​ប្រមាន​ថា បញ្ហា​ទាំង​អម្បាលមាណ​នេះ​នឹង​ជះ​ឥទ្ធិពល​ជា​អវិជ្ជមាន​សម្រាប់ ឧស្សាហកម្ម​កាត់ដេរ​ក្នុង​ឆ្នាំ​២០១៤​នេះ ប្រសិន​បើ​បញ្ហា​ទាំងនោះ នៅ​តែ​អូសបន្លាយ​យូរ និង​គ្មាន​ចំណាត់ការ​ច្បាស់លាស់។

ការ​ធ្វើ បាតុកម្ម​ដោយ​កម្មករ​ដែល​ចាប់ផ្ដើម​ចាប់​តាំង​ខែ​ធ្នូ​រហូត​ដល់​ដើម​ខែ មករា ដើម្បី​ទាមទារ​បង្កើន​ប្រាក់ឈ្នួល​អប្បបរមា​ដល់​១៦០​ដុល្លារអាមេរិក ក្នុង​មួយ​ខែ​បាន​ធ្វើឲ្យ​ឧស្សាហកម្ម​នេះ​ខាតបង់​ប្រហែល​២០០​លាន ដុល្លារអាមេរិក​។ ភ្នំពេញ ប៉ុស្ដិ៍​បាន​រាយការណ៍​ថា កម្មករ​ជាច្រើន​បាន​រងរបួស ខណៈ​កម្មករ​៤​នាក់​ផ្សេង​ទៀត​បាន​ស្លាប់​ក្នុង​អំឡុង​ពេល​ធ្វើ​បាតុកម្ម​។ ប៉ុន្មាន​ថ្ងៃ​បន្ទាប់ពី​ឧបទ្វហេតុ​នោះ អ្នក​បញ្ជា​ទិញ​ធំៗ​ដូចជា H&M, Adidas, GAP, Levis, បាន​ផ្ញើ​លិខិត​មក​រដ្ឋាភិបាល​ដើម្បី​រក​វិធី​ដោះស្រាយ។

វិស័យ​កាត់ដេរ​វាយនភ័ណ្ឌ​កាត់ដេរ និង​ស្បែកជើង​គឺជា​វិស័យ​ស្នូល​មួយ​ក្នុង​ចំណោម​វិស័យ​ធំៗ​ទាំង​បួន ក្នុង​ការ​ចូលរួម​ចំណែក​កំណើន​សេដ្ឋិច្ច​កម្ពុជា​។ វិស័យ​នេះ​បាន​រួម​ចំណែក​កំណើន​ជាង​២៧​ភាគរយ​នៃ​ផល ទុន សរុប​ក្នុង​ស្រុក​(GDP)។

ទិន្នន័យ​ផ្លូវការ​បាន​ពី​ក្រសួង​ពាណិជ្ជកម្ម​បាន​បង្ហាញ​ថា ទំហំ​សរុប​នៃ​ការ​នាំ​ចេញ​សម្លៀកបំពាក់​និង​វាយនភ័ណ្ឌ​សម្រេច​បាន ៥,៥​ពាន់​លាន​ដុល្លារអាមេរិក​កាលពី​ឆ្នាំ​២០១៣​ធៀប​នឹង​៤,៦១​ពាន់​លាន ដុល្លារអាមេរិក​កាលពី​ឆ្នាំ​២០១២ ដែល​កើនឡើង​ប្រហែល​២០​ភាគរយ​។

អ្នកនាំពាក្យ​របស់​ក្រសួង​ពាណិជ្ជកម្ម​បាន​ប្រាប់​ភ្នំពេញប៉ុស្ដិ៍​កាលពី ថ្ងៃ​អង្គារ​ថា តួលេខ​កំណើន​នេះ​កំពុង​ឆ្លុះបញ្ចាំង​ពី​ផលប៉ះពាល់​តិចតួច​ដែល​បណ្ដាល​មកពី​ការ​ធ្វើ​បាតុកម្ម និង​ការ​បោះឆ្នោត​របស់​ប្រទេស​នេះ​កាលពី​ឆ្នាំ​មុន​។

លោក លើក​ឡើង​ថា​៖ «​ការពិត​ហើយ យើង​មាន​ក្តីបារម្ភ​បន្តិចបន្តួច​ទាក់ទង​នឹង​បញ្ហា​នេះ​កាលពី ឆ្នាំ​មុន ដែល​អ្នក​ទិញ​នៅ​តែ​រក្សា​ការ​បញ្ជា​ទិញ ទោះ​បី​ជា​យើង​ជាប់​បោះឆ្នោត​កាលពី​ឆ្នាំ​មុន​ក៏ដោយ​។ វិនិយោគិន​មាន​ការ​យល់ដឹង​ច្រើន ពួកគេ​មិន​សម្លឹង​មើល​បញ្ហ​តែ​មួយ​នោះ​ទេ ពួកគេ​នឹង​សម្លឹង​មើល​ទៅលើ​ស្ថិរភាព​ម៉ាក្រូសេដ្ឋកិច្ច បរិយាកាស​វិនិយោគ ការ​លើក​ទឹកចិត្ត​ផ្សេងៗ​ទៀត ហេដ្ឋារចនាសម្ព័ន្ធ អីចឹង​ហើយ​យើង​នៅតែ​មើល​ឃើញ​វិនិយោគិន​ជាច្រើន​នៅ​តែ​នៅ​ទី​នេះ ពួកគេ​មិន​ផ្លាស់ប្តូរ​ទៅ​ប្រទេស​ផ្សេង​ទៀត​ទេ​»។

មន្ត្រី​ដដែល​បាន​និយាយ​ថា បញ្ហា​ការ​ធ្វើ​បាតុកម្ម និង​បញ្ហា​នយោបាយ​បាន​កើតឡើង​ក្នុង​អំឡុង​ពេល​ចុងក្រោយ​នេះ​គឺ​វា ច្បាស់ណាស់​មិន​រង​ផលប៉ះពាល់​ដល់​ការ​នាំ​ចេញ ច្រើន​នោះ​ទេ​សម្រាប់​ឆ្នាំ​២០១៣ ដោយសារ​តែ​ការ​ធ្វើ​បាតុកម្ម និង​ភាព​តានតឹង​ផ្នែក​នយោបាយ​គ្រាន់តែ​បាន​កើតឡើង​ក្នុង​អំឡុង​ពេល ប៉ុន្មាន​ខែ​កាលពី​ឆ្នាំ​មុន​ជាពិសេស​នៅ​ខែ​ធ្នូ និង​ដើម​ខែ​មករា​នេះ។

លោក វ៉ាន់ ស៊ូអៀង ប្រធាន​សមាគម​រោងចក្រ​កាត់ដេរ​កម្ពុជា​(GMAC) បាន​ថ្លែង​ថា អត្រា​កំណើន​ស្ថិត​នៅ​ក្នុង​ល្បឿន​ធម្មតា «​វា​គឺជា​កំណើន​ធម្មតា ដោយសារ​តែ​យើង​តែងតែ​ទទួល​បាន​ការ​កើនឡើង​នៅ​ចន្លោះ​ពី​២០​ដល់​៣០​ភាគរយ​ក្នុង​មួយ​ឆ្នាំៗ​»។ ប៉ុន្តែ​លោក​មិន​បាន​និយាយ​ឲ្យ​បាន​លម្អិត​ពីរ​ការ​វិវត្ត​របស់ ឧស្សាហកម្ម​នេះ កាលពី​ឆ្នាំ​មុន និង​ដំណើរការ​សម្រាប់​ឆ្នាំ​នេះ​នោះ​ទេ​។

យោងតាម​ទិន្នន័យ​នេះ ការ​នាំ​ចេញ​ទៅ​កាន់​អាមេរិក​ដែល​ជា​ទីផ្សារ​សំខាន់​បាន​កើនឡើង​ពី​៧,៦១ ភាគរយ​ដល់​២,១២​ពាន់​លាន​ដុល្លារអាមេរិក អឺរ៉ុប បាន​កើនឡើង​២៨​ភាគរយ ដែល​កើនឡើង​២៨​ភាគរយ ខណៈ​នៅ​សល់​នាំ​ចេញ​ទៅ​ប្រទេស​មួយ​ចំនួន​ផ្សេងទៀត​នៅក្នុង​តំបន់ និង​នៅ​ប្រទេស​ផ្សេង​ទៀត​ក្នុង​ពិភពលោក​បាន​កើនឡើង​ប្រមាណ​៣១,៧៧​ភាគរយ​។

លោក ស៊ុន ចាន់ថុល រដ្ឋមន្ដ្រី​ក្រសួង​ពាណិជ្ជកម្ម​ទើប​នឹង​តែងតាំង​ថ្មី​បាន​លើកឡើង​ពី ការ​បារម្ភ​ក្នុង​អំឡុង​ពេល​ធ្វើ​បទសម្ភាស​ដោយឡែក​កាលពី​សប្ដាហ៍​មុន អំពី​ការ​ផ្ទុះ​ឡើង​ក្នុង​ការ​ទាមទារ​ប្រាក់ឈ្នួល​ខ្ពស់​របស់​កម្មករ កម្មការិនី​។​

លោក​បញ្ជាក់​ថា​៖ «​ខ្ញុំ​មាន​ការ​បារម្ភ​ថា ប្រសិន​បើ​​យើង​ត្រូវ​បាន​បង្ខំ​ដំឡើង​ប្រាក់ខែ​ខ្ពស់​ដូច​នោះ ពួកគេ​នឹង​ផ្លាស់ចេញ​ពី​ប្រទេស​កម្ពុជា​។ តើ​យើង​នឹង​ធ្វើ​យ៉ាងណា​ជាមួយ​កម្មករ​៦០​ម៉ឺន​នាក់​នៅ​កម្ពុជា​? កម្មករ​ម្នាក់ៗ​ចិញ្ចឹម​សមាជិក​គ្រួសារ​ពី​៤​ទៅ​៥​នាក់​នៅក្នុង គ្រួសារ​របស់​ពួកគេ​។ លោក​មើលឃើញ​ពី​ផលប៉ះពាល់​នេះ​»។

លោក Hiroshi SUZUKI អគ្គនាយក និង​ជា​ប្រធាន​សេដ្ឋវិទូ​នៅ​វិទ្យាស្ថាន​ស្រាវជ្រាវ​ពាណិជ្ជកម្ម​សម្រាប់​កម្ពុជា​(BRIC) ​បាន​ថ្លែង​ថា ការ​ធ្វើ​កូដកម្ម​អាច​នឹង​បណ្ដាល​ឲ្យ​ឧស្សាហកម្ម​កាត់ដេរ​មាន កំណើន​យឺត​សម្រាប់​ឆ្នាំ​នេះ «​ការ​ធ្វើ​បាតុកម្ម​បាន​ចាប់ផ្ដើម​ឡើង​កាលពី​ពាក់កណ្ដាល​ខែ​ធ្នូ​។ ស្ថិតិ​បញ្ជាក់​ពី​ផលប៉ះពាល់​កាលពី​ពាក់កណ្តាល​ខែ​ធ្នូ​។ ប៉ុន្តែ​ទំហំ​នៃ​ផលប៉ះពាល់​ដល់​សេដ្ឋកិច្ច​ទាំង​មូល​អាច​ត្រូវ​បាន កំណត់​»។

លោក​លើក​ឡើង​ថា​៖ «​វិស័យ​កាត់ដេរ​គឺជា​ក្បាលម៉ាស៊ីន​ដ៏សំខាន់​បំផុត​របស់​សេដ្ឋកិច្ច កម្ពុជា​។ អត្រាកំណើន​ខ្ពស់​បាន​ផ្ដល់​លទ្ធផល​ល្អ​ដល់​សេដ្ឋកិច្ច​ទាំង​មូល ហើយ​នៅពេល​ខ្លះ​វា​បង្ហាញ​ពី​ភាព​ខ្លាំង​ដ៏​មាន​សក្ដានុពល​របស់​សេដ្ឋកិច្ច​កម្ពុជា​»។

ប៉ុន្តែ​លោក​បាន​និយាយ​ថា ការ​ស្ទុះ​ងើប​ឡើង​វិញ​នៃ​ស្ថានការណ៍​សេដ្ឋកិច្ច​ក្នុង​ទិសដៅ​នាំចេញ​សំខាន់ៗ​ដូចជា​គឺ​អាមេរិក​និង​អឺរ៉ុប នៅ​តែ​ត្រូវការ ខណៈ​ប្រទេស​ផ្សេង​ទៀត​មាន​ដូចជា​ប្រទេស​ជប៉ុន​ក៏​បាន​រំពឹង​ថា នឹង​កើន​ផង​ដែរ​។

លោក​Hiroshi បញ្ជាក់ថា​៖ «​ផលប៉ះពាល់​មួយ​ចំនួន ចំពោះ​វិស័យ​កាត់ដេរ​គឺ​មិន​អាច​គេច​ផុត​បាន​ទេ។ ប៉ុន្តែ​ទំហំ​នៃ​ផលប៉ះពាល់​អាច​ត្រូវ​បាន​កម្រិត​ព្រោះ​តែ​តម្រូវការ​ដ៏​ខ្លាំង​នៅ​ប្រទេស​ទិសដៅ​នាំចេញ ស្ថានការណ៍​គ្មាន​ស្ថិរភាព​នៅក្នុង​ប្រទេស​គូរប្រជែង​មាន​ដូចជា ប្រទេស​ថៃ និង​បង់ក្លាដេស និង​ភាព​ចុះ​ខ្សោយ​ចំពោះ​ការ​ធ្វើ​បាតុកម្ម និង​កូដកម្ម​ក្នុង​រយៈពេល​យូរ​»។

លោក កាន រដ្ឋា មាន​សុទិដ្ឋិនិយម​ថា ឧស្សាហកម្ម​នេះ​នឹង​រក្សា​ការ​កើនឡើង បញ្ហារ​បស់​កម្មករ​នឹង​ត្រូវ​បាន​ដោះស្រាយ​នៅ​ឆ្នាំ​នេះ «​ខ្ញុំ​គិតថា រដ្ឋាភិបាល​មាន​មធ្យោបាយ​ជាច្រើន​ក្នុង​ការ​ដោះស្រាយ​បញ្ហា​បាតុកម្ម​នេះ​។ ពិត​ហើយ​ប្រសិន​បើ​ពួកគេ​បន្ត​ធ្វើ​បាតុកម្ម ទោះបី​ជា​ចង់ ឬ​មិនចង់​គឺ​វា​ពិតជា​ប៉ះពាល់​ដល់​ការ​នាំ​ចេញ​នៅ​ឆ្នាំ​នេះ​ជាក់​ជា​មិនខាន​ឡើយ​។ ប៉ុន្តែ ខ្ញុំ​ពិតជា​ជឿជាក់​ថា រដ្ឋាភិបាល​ពិតជា​មាន​យន្តការ​ដើម្បី​ដោះស្រាយ​បញ្ហា​នេះ ហើយ​នឹង​មិន​អនុញ្ញាត​ឲ្យ​វា​នៅ​ជាប់​គាំង​នោះ​ទេ​៕

អត្ថបទគួរចាប់អារម្មណ៍