ភ្ញៀវទេសចរទស្សនាប្រាសាទនាពិធីបុណ្យអុំទូក។ ហ៊ឹន ពិសី
ភ្នំពេញៈ ភ្ញៀវទេសចរដែលបានចូលរួមកម្សាន្តក្នុងពិធីបុណ្យអុំទូកឆ្នាំ ២០១៨ នៅរាជធានីភ្នំពេញ បានកើនឡើងជិត ៥០ ភាគរយ ខណៈដែលភ្ញៀវទេសចរធ្វើដំណើរកម្សាន្តនៅតាមបណ្តាខេត្តបានកើនឡើង ១៥,៦ ភាគរយ។ នេះបើយោងទៅតាមទំព័រហ្វេសប៊ុកផ្លូវការរបស់ក្រសួងទេសចរណ៍។
ទិន្នន័យបង្ហាញថា ក្នុងព្រះរាជពិធីបុណ្យអុំទូករយៈពេល ៣ ថ្ងៃក្នុងរាជធានីភ្នំពេញ មានប្រជាជនក្នុងស្រុក ៤,៥ លាននាក់បានចូលរួមពិធីបុណ្យប្រពៃណីជាតិនេះ ខណៈភ្ញៀវទេសចរបរទេសមានប្រហែល ១២,០០០ នាក់។
ស្របពេលនោះដែរ ភ្ញៀវទេសចរដែលធ្វើដំណើរកម្សាន្តនៅតាមបណ្តាខេត្ត មានប្រមាណ ៩២ ម៉ឺននាក់ ដោយក្នុងនោះប្រជាជនក្នុងស្រុកមាន ៨៤ ម៉ឺននាក់ កើនឡើង ១៥,៣ ភាគរយ ហើយជនបរទេសមាន ៨ ម៉ឺននាក់ កើនឡើង ១៨,៥ ភាគរយ។
លោក ងូវ សេងកាក់ ប្រធានមន្ទីរទេសចរណ៍ខេត្តសៀមរាប បានប្រាប់ថា ចំនួនភ្ញៀវទេសចរដែលទៅកម្សាន្តនៅតាមប្រាសាទ និងតំបន់រមណីយដ្ឋាននានាក្នុងខេត្តសៀមរាបនាឱកាសបុណ្យអុំទូកឆ្នាំនេះមានចំនួនជាង ៣៣ ម៉ឺននាក់ កើនឡើង ១៨,៥៣ ភាគរយបើធៀបនឹងឆ្នាំមុន ដោយក្នុងនោះភ្ញៀវក្នុងស្រុក មានជាង ២៩ ម៉ឺននាក់ កើនឡើង ១៩,៦ ភាគរយ ហើយជនបរទេសមាន ៣២,៨៩៦នាក់ កើន ៣ភាគរយ។
លោកថ្លែងថា៖ «ភ្ញៀវមកកម្សាន្តខេត្តសៀមរាបបានកើនឡើងជាបន្តបន្ទាប់ ខណៈអាជ្ញាធរបានរៀបចំឲ្យមានកម្មវិធីជាច្រើន ពិសេសនៅតាមដងស្ទឹង និងនៅ Pub Street»។
បើតាមលោក សេងកាក់ បច្ចុប្បន្នខេត្តសៀមរាបមានបន្ទប់សណ្ឋាគារ និងផ្ទះ សំណាក់ប្រមាណជាង ២២,០០០។
នៅក្នុងរយៈពេល ១០ ខែដំបូងក្នុងឆ្នាំ ២០១៨ ខេត្តសៀមរាបទទួលបានភ្ញៀវទេសចរ ២,០៩ លាននាក់កើនជាង ៨ ភាគរយដែលនាំមុខដោយភ្ញៀវមកពីប្រទេស ចិន កូរ៉េ ជប៉ុន និងអាមេរិក។ តាមការព្យាករ ក្នុងឆ្នាំ ២០១៨ នេះខេត្តសៀមរាបនឹងទទួលបានភ្ញៀវប្រមាណ ៥,៥ លាននាក់ ក្នុងនោះជនបរទេស ២,៥ លាននាក់។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បាននិយាយថា រយៈពេល ៣ ថ្ងៃ នៃពិធីបុណ្យអុំទូកនេះ ខេត្តកំពតទទួលបានភ្ញៀវទេសចរជិត ១០ ម៉ឺននាក់ កើន ឡើងជិត ១៩ភាគរយ ដែលក្នុងនោះភ្ញៀវក្នុងស្រុកមានជិត ៩០ ភាគរយ។
លោកថ្លែងថា៖ «កំណើនភ្ញៀវទេសចរ ដោយសារខេត្តកំពតមានផលិតផលទេសចរណ៍ជាច្រើន ហើយផលិតផលទាំងនោះមិនមានលក្ខណៈដូចតំបន់ដទៃទេ»។
អ្នកនៅក្នុងឧស្សាហកម្មមួយនេះបានលើកឡើងថា កត្តាហេដ្ឋារចនាសម្ព័ន្ធ កំណើនប្រាក់ចំណូល និងគុណភាពសេវា បានធ្វើឲ្យការធ្វើដំណើរកម្សាន្តក្នុងស្រុកកាន់តែមានភាពទាក់ទាញ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បាននិយាយថា ការលើកកម្ពស់គុណភាពសេវាកម្ម តម្លៃ និងស្ថិរភាពនយោបាយបានដើរតួនាទីយ៉ាងសំខាន់ក្នុងការលើកកម្ពស់វិស័យទេសចរណ៍។
លោកស្រីថ្លែងថា៖ «ភ្ញៀវទៅកម្សាន្តភូមិភាគឦសានបានកើនឡើងច្រើននាអំឡុងបុណ្យអុំទូកឆ្នាំនេះ ដោយសារនៅទីនោះមានផលិតផលសេវាកម្ម និងធម្មជាតិស្រស់ត្រកាលជាច្រើន»។
ទោះយ៉ាងណា លោកស្រី បានអះអាងថា បើទោះជាចំនួនភ្ញៀវទេសចរដែលធ្វើដំណើរកម្សាន្តក្នុងឱកាសបុណ្យអុំទូកបានកើនឡើងនៅគ្រប់ទីកន្លែងក្តី ក៏ខេត្តព្រះសីហនុទទួលរងការធ្លាក់ចុះ។
លោកស្រីបញ្ជាក់ថា៖ «អាចដោយសារតែនៅក្រុងព្រះសីហនុមានចំនួនភ្ញៀវទេសចរជនជាតិចិនច្រើនកំពុងស្នាក់នៅ ដែលធ្វើឲ្យគេពិបាករកកន្លែងស្នាក់នៅ និងម្ហូបអាហារមានតម្លៃខ្ពស់»។
លោក វ៉េង ស៊ីសុវង្ស អនុប្រធានមន្ទីរទេសចរណ៍ខេត្ដព្រះសីហនុបានប្រាប់គេហទំព័រក្នុងស្រុកថា រយៈពេល ៣ ថ្ងៃនៃពិធីបុណ្យអុំទូកឆ្នាំនេះខេត្តព្រះសីហនុ ទទួលភ្ញៀវទេសចរប្រមាណ ៦៣,០០០ នាក់ ថយចុះ ២៥,៨៨ ភាគរយបើធៀបនឹងឆ្នាំមុន។ ក្នុងនោះភ្ញៀវក្នុងស្រុកមានប្រមាណ ៥០,២៣០ នាក់ថយចុះ ៣២,០៧ ភាគរយ។
ទោះជាយ៉ាងណា ប្រធានមន្ទីរទេសចរណ៍ខេត្តកំពត បានបញ្ជាក់ថា ខេត្តកំពតមិនសូវទទួលបានកំណើនពីការធ្លាក់ចុះនៃចំនួនភ្ញៀវទេសចរពីខេត្តព្រះសីហនុទេ ព្រោះខេត្តទាំង ២ មានសក្តានុពលផ្សេងពីគ្នា៕ LA
