The Phnom Penh Post Search

Search form




Logo of Phnom Penh Post newspaper Phnom Penh Post - ភ្ញៀវ​ទៅ​លេង​តំបន់​ទេសចរណ៍​កើន​ឡើង​ក្នុង​ពិធី​បុណ្យ​ចូល​ឆ្នាំ

ភ្ញៀវ​ទៅ​លេង​តំបន់​ទេសចរណ៍​កើន​ឡើង​ក្នុង​ពិធី​បុណ្យ​ចូល​ឆ្នាំ

ភ្ញៀវ​ទៅ​លេង​តំបន់​ទេសចរណ៍​កើន​ឡើង​ក្នុង​ពិធី​បុណ្យ​ចូល​ឆ្នាំ

ភ្នំពេញៈ ភ្ញៀវ​ទេសចរ​ជាតិ និង​អន្តរជាតិ​ទៅ​ទស្សនា​រមណីយដ្ឋាន​តាម​បណ្តា​ខេត្ត​សំខាន់ៗ​របស់ កម្ពុជា ក្នុង​អំឡុង​ពេល​នៃ​ពិធី​បុណ្យ​ចូល​ឆ្នាំ​ថ្មី​ប្រពៃណី​ជាតិ មាន​ការ​កើន​ឡើង​គួរ​ឲ្យ​កត់​សម្គាល់។

លោក ឆឺយ ឆន អនុ​ប្រធាន​មន្ទីរ​ទេសចរណ៍ ខេត្ត​សៀមរាប បាន​ឲ្យ​ដឹង​ថា ក្នុង​រយៈ​ពេល​បី​ថ្ងៃ​បុណ្យ​ចូល​ឆ្នាំ ខេត្ត​សៀមរាប ទទួល​បាន​ភ្ញៀវ​ទេសចរ​ជាតិ​និង​អន្តរជាតិ ២៥៨ ០០០ នាក់​កើន ៤៤ ភាគរយ​ធៀប​នឹង​ពេល​ដូច​គ្នា​កាល​ពី​ឆ្នាំ​មុន។ ក្នុង​នោះ​ភ្ញៀវ​ជាតិ​សរុប​មាន ២៤០ ០០០ នាក់​កើន ៤៦ ភាគរយ​ខណៈ​ភ្ញៀវ​អន្តរជាតិ​សរុប​មាន ១៨ ០០០ នាក់​កើន ១៧ ភាគរយ។

លោក​បន្ត​ថា ភ្ញៀវ​កើន​ឡើង​ខ្លាំង​ដោយ​សារ​ព្រឹត្តិការណ៍ អង្គរ​សង្ក្រាន្ត ដែល​ត្រូវ​បាន​រៀបចំ​ឡើង រយៈ​ពេល ៣​ថ្ងៃ នៅ​ប្រាសាទ អង្គរ​វត្ត ប្រាសាទ​បាយ័ន និង​ទីលាន​ជល់​ដំរី ដែល​ក្នុង​នោះ​រួម​មាន ការ​ប្រគំ​តន្ត្រី ការ​តាំង​ពិព័រណ៍ របាំ​ប្រពៃណី​និង​ល្បែង​ប្រជាប្រិយ​ជាដើម។

លោក​ថ្លែង​ថា៖ «ឆ្នាំ​នេះ យើង​ឃើញ​ភ្ញៀវ​ជាតិ​ច្រើន ភាគ​ច្រើន​គាត់​មក​ពី​ខេត្ត​ផ្សេងៗ​គាត់​ចង់​មក​ចូល​រួម អង្គរ​សង្ក្រាន្ត និង​មក​មើល​អន្សម​យក្ស​ដែល​មាន​ទម្ងន់ ២ តោន​តាំង​នៅ​មុខ អង្គរ»។

លោក​បន្ត​ថា បន្ទប់​សណ្ឋាគារ និង​ផ្ទះ​សំណាក់​ត្រូវ​បាន​កក់​ពេញ ហើយ​ភោជនីយដ្ឋាន​មាន​ភាព​មមាញឹក​ជាង​ធម្មតា បើ​ទោះ​បី​ជា​តម្លៃ​ម្ហូប និង​សេវា​ស្នាក់នៅ​មាន​ការ​កើន​ឡើង​បន្តិច​ក៏​ដោយ។

លោក ថោង ខុន រដ្ឋ​មន្ត្រី​ក្រសួង ទេសចរណ៍ ថ្លែង​ក្នុង​ពិធី​បិទ​ព្រឹត្តិការណ៍ អង្គរ​សង្ក្រាន្ត ថា ព្រឹត្តិការណ៍​វប្បធម៌​មួយ​នេះ​បាន​នាំ​ចំណូល​ប្រមាណ ២៨ លាន​ដុល្លារ​ចាក់​ចូល​ក្នុង​សេដ្ឋកិច្ច ខេត្ត​សៀមរាប។

ខេត្ត​ព្រះ​សីហនុ នៅ​តែ​រក្សា​កំណើន​ភ្ញៀវ​ទេសចរ។ លោក សុខ សីហា មន្ត្រី​មន្ទីរ​ទេសចរណ៍ ខេត្ត​ព្រះសីហនុ បាន​ឲ្យ​ដឹង​ថា ភ្ញៀវ​សរុប​មាន​ចំនួន ៥៣ ០០០ នាក់​កើន ៥ ភាគរយ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ ក្នុង​នោះ​ភ្ញៀវ​ជាតិ​មាន ៤៨ ៨៧១ នាក់​កើន ៤ ភាគរយ ខណៈ​ភ្ញៀវ​អន្តរជាតិ​សរុប​បាន ៤ ២៤៩ នាក់​កើន ២០ ភាគរយ។

លោក​បន្ត​ថា ឆ្នេរ​ស្អាត សេវា​ម្ហូប​អាហារ និង​ស្នាក់​នៅ​គ្រប់​គ្រាន់ រួម​ទាំង​មាន​គោលដៅ​ទេសចរណ៍​ក្រៅ​ពី​ឆ្នេរ​នៅ​ក្នុង​ខេត្ត ជា​មូលហេតុ​ដែល​ភ្ញៀវ​តែង​តែ​ចង់​មក​កម្សាន្ត​នៅ ខេត្ត​ព្រះ​សីហនុ។ លោក​បញ្ជាក់​ថា សណ្ឋាគារ និង​ផ្ទះ​សំណាក់​ត្រូវ​បាន​ភ្ញៀវ​កក់​ពេញ​ក្នុង​រយៈ​ពេល ៣​ថ្ងៃ ហើយ​តម្លៃ​មាន​ការ​កើន​ឡើង​តិច​តួច។

ខេត្ត​កែប ត្រូវ​បាន​រាយការណ៍​ថា ទទួល​បាន​ភ្ញៀវ ៨៣ ០០០ នាក់​កើន ១២ ភាគរយ​ក្នុង​នោះ​ភ្ញៀវ​ជាតិ​មាន​ចំនួន ៨២ ០០០ នាក់​កើន ១០ ភាគរយ ហើយ​ភ្ញៀវ​អន្តរជាតិ​សរុប​មាន ១ ៣០០ នាក់​កើន ១១២ ភាគរយ។

លោក សោម ចិន្តា ប្រធាន​មន្ទីរ​ទេសចរណ៍​ខេត្ត​និយាយ​ថា ភ្ញៀវ​ទេសចរ​ដ៏​លើស​លប់​នៅ ខេត្ត​សៀមរាប និង​ខេត្ត​ព្រះ​សីហនុ បាន​រុញ​ច្រាន​ភ្ញៀវ​ភាគ​ច្រើន​ឲ្យ​មក​ទស្សនា ខេត្ត​កែប។ លោក​បន្ថែម​ថា ឆ្នេរ​ខ្សាច់​ស និង​ផ្លូវ​តម្រង់​មក ខេត្ត​កែប ដែល​មាន​ភាព​ប្រសើរ​ជាង​មុន​ក៏​ជា​កត្តា​ដែល​ធ្វើ​ឲ្យ​មាន​កំណើន​ភ្ញៀវ​ផង​ដែរ។

ដោយ​ឡែក ខេត្ត​កំពត ក្នុង​រយៈ​ពេល ៣ ថ្ងៃ​នេះ​ទទួល​បាន​ភ្ញៀវ​ទេសចរ​សរុប ៧៤ ០០០ នាក់។ លោក សយ ស៊ីណុល ប្រធាន​មន្ទីរ​ខេត្ត​ឲ្យ​ដឹង​ថា រមណីយដ្ឋាន ភ្នំ​បូកគោ និង​ទឹក​ឈូ នៅ​តែ​ជា​តំបន់​ទាក់​ទាញ​ខ្លាំង​ក្នុង​ចំណោម​តំបន់​ទេសចរណ៍​ទាំង ១៣ ក្នុង​ខេត្ត។ ក្នុង​នោះ រូង​ភ្នំ កំពង់ត្រាច កំពុង​ទាក់​ទាញ​ភ្ញៀវ​អន្តរជាតិ​ច្រើន។

ខេត្ត​កោះកុង ឯ​ណោះ​វិញ ទទួល​បាន​ភ្ញៀវ​ប្រមាណ ១២ ០០០ នាក់។ លោក យួន ទាន អនុ​ប្រធាន​មន្ទីរ​ទេសចរណ៍​ខេត្ត​និយាយ​ថា ភ្ញៀវ​ច្រើន​តែ​ទៅ​ទស្សនា​សហគមន៍​អេកូ​ទេសចរណ៍។

លោក​បន្ត​ថា សហគមន៍​អេកូ​ទេសចរណ៍​ទាំង​នោះ​រួម​មាន តាតៃ ជីផាត់ បាងកាយ៉ាក និង ត្រពាំងរូង។ លោក​ថ្លែង​ថា ខេត្ត​កំពុង​បង្កើន​សោភណភាព សួនច្បារ និង​ឆ្នេរ​ដើម្បី​ទាក់​ទាញ​ភ្ញៀវ​ទេសចរ​ឲ្យ​កាន់​តែ​ច្រើន៕

អត្ថបទគួរចាប់អារម្មណ៍