ភ្នំពេញៈ DaraPay ជាភ្នាក់ងារទូទាត់ឌីជីថល និងផ្ញើប្រាក់បានប្រកាសភាពជាដៃគូជាមួយកម្មវិធីទូទាត់ Alipay របស់ក្រុមហ៊ុន Alibaba ដែលនឹងអនុញ្ញាតឲ្យអ្នកប្រើប្រាស់ Alipay អាចទូទាត់នៅលើកម្មវិធី DaraPay នៅក្នុងប្រទេសកម្ពុជា។ នេះបើយោងតាមសេចក្ដីប្រកាសព័ត៌មានដែលភ្នំពេញប៉ុស្ដិ៍ទទួលបានកាលពីថ្ងៃព្រហស្បតិ៍។
សេចក្ដីប្រកាសព័ត៌មាន ចេញផ្សាយកាលពីថ្ងៃទី ១៧ ខែវិច្ឆិកា បានឲ្យដឹងថា ភាពជាដៃគូនេះអាចឲ្យភ្ញៀវទេសចរចិនអាចប្រើប្រាស់ Alipay ដើម្បីទូទាត់នៅតាមបញ្ជទូទាត់ DaraPay ទាំងអស់ដែលមានជាង ៣ ០០០ កន្លែងនៅទីក្រុងភ្នំពេញ ខេត្តកណ្ដាល កំពង់ចាម សៀមរាប និងបាត់ដំបង។
លោក ភុគ រដ្ឋា អ្នកគ្រប់គ្រងទូទៅរបស់ DaraPay បានឲ្យដឹងថា ជាមួយនឹងប្រព័ន្ធដែលដាក់ឲ្យដំណើរការ ពេលនេះអ្នកប្រើប្រាស់កម្មវិធី Alipay លែងត្រូវការដកសាច់ប្រាក់សម្រាប់ការទូទាត់នៅកម្ពុជាទេ។ ពួកគេអាចបញ្ចប់ដោយងាយស្រួលក្នុងការទិញរបស់ពួកគេតាមរយៈការស្កេន QR code ពិសេសដែលអាចរកបាននៅតាមហាងដែលមានការទូទាត់របស់ DaraPay។
លោកថ្លែងថា៖ «យើងរីករាយក្នុងការធ្វើការងារ ជាមួយ Alipay តាមរយៈការសហការនេះ អ្នកប្រើប្រាស់ Alipay នៅពេលនេះអាចទទួលបានអត្ថប្រយោជន៍ពីភាពងាយស្រួល និងសុវត្ថិភាពប្រព័ន្ធបញ្ចូលគ្នារបស់យើង និងតាមហាងជាដៃគូ ខណៈពួកគេនឹងរីករាយវិស្សមកាលរបស់ពួកគេនៅកម្ពុជា»។
លោកបន្ថែមថា Alipay មានអ្នកប្រើប្រាស់ជាង ១,២ ពាន់លាននាក់រួមគ្នាជាមួយនឹងដៃគូក្នុងតំបន់របស់ខ្លួន ហើយជារបៀបនៃទូទាត់ដ៏ពេញចិត្តជាងគេរបស់ភ្ញៀវទេសចរចិន។
ជាមួយនឹងហាងជាដៃគូជាង ៣ ០០០ របស់ DaraPay ដែលទទួលយកការទូទាត់ឌីជីថល វាគួរតែគ្មានបញ្ហានោះទេ មិនថាប្រតិបត្តិការនៅក្នុងភោជនីយដា្ឋន ហាងកាហ្វេ និងផ្សារទំនើប ឬការទូទាត់សម្រាប់សេវាដូចជា ការហៅតាក់ស៊ីជិះ សណ្ឋាគារ និងការកម្សាន្ត ក៏ភ្ញៀវទេសចរចិនអាចទទួលបានអត្ថប្រយោជន៍ពិតប្រាកដតាមរយៈការជ្រើសរើសសេវានៃហាងជាដៃគូរបស់ DaraPay ដែរ។
អតិថិជនរបស់ Alipay ដែលចូលចិត្តទិញអីវ៉ាន់ សម្លៀកបំពាក់ ឬស្វែងរកអាហារឆ្ងាញ់អាចរីករាយជាមួយនឹងផ្សារទំនើបជាទីពេញនិយមបំផុតរបស់ភ្ញៀវទេសចរចិន ដូចជាផ្សារទំនើបសូរិយា ឬ Olympia Mall ដែលមានទីតាំងនៅកណ្ដាលទីក្រុងភ្នំពេញ។
លោក រដ្ឋា បន្តថា៖ «ភាពជាដៃគូជាមួយ Alipay គឺជាជំហានដ៏សំខាន់មួយដែលទទួលយក DaraPay កម្រិតបន្ទាប់នៃការអភិវឌ្ឍអាជីវកម្មរបស់យើង។ យើងមិនគ្រាន់តែសហការជាមួយក្រុមហ៊ុនក្នុងស្រុកប៉ុណ្ណោះទេ ប៉ុន្តែថែមទាំងយើងកំពុងធ្វើការងារយ៉ាងសកម្មជាមួយនឹងដៃគូអន្តរជាតិ ជាផ្នែកមួយនៃផែនទីយុទ្ធសាស្ដ្រថ្មីរបស់យើងក្នុងការចូលក្នុងអនាគតថ្មីមួយ»៕LA