.jpg)
ភ្នំពេញៈ Phibious Indochina ជាទីភ្នាក់ងារផ្សព្វផ្សាយក្នុងតំបន់ និង Active Communications ជាទីភ្នាក់ងារផ្សព្វផ្សាយក្នុងស្រុកបានប្រកាសច្របាច់បញ្ចូលគ្នា និងដំណើរការនូវគំរូពាណិជ្ជកម្មថ្មីដែលផ្ដល់អាទិភាពដល់អាជីវកម្មឌីជីថល។ នេះបើតាមសេចក្ដីប្រកាសរួមមួយកាលពីថ្ងៃអង្គារ។
ប្រតិបត្តិការរបស់ក្រុមហ៊ុននៅពេលនេះស្ថិតក្រោមឈ្មោះ Phibious Group ជាមួយបុគ្គលិកមួយចំនួនរបស់ក្រុមហ៊ុនរួមជាមួយគ្នាចំនួនជិត ៥០ នាក់។
ការច្របាច់បញ្ចូលគ្នានេះនឹងធ្វើឲ្យអាជីវកម្មរបស់ខ្លួននៅក្នុងទីផ្សារផ្សព្វផ្សាយ និងការរៀបចំព្រឹតិ្តការណ៍នានានៅកម្ពុជាកាន់តែរឹងមាំ។
លោក Mervyn Cheo ស្ថាបនិក និងអគ្គនាយកក្រុមហ៊ុន Phibious Indochina បានឲ្យដឹងថា ប្រជាជនកម្ពុជាមានចំណេះដឹងខាងបច្ចេកវិទ្យាច្រើន ហើយក្រុមហ៊ុនចង់ទាញយកអត្ថប្រយោជន៍ពីបច្ចេកវិទ្យានេះ។ លោកបានថ្លែងថា៖ «ការផ្លាស់ប្តូរនេះជាជំហានមួយផ្សេងទៀតក្នុងការទទួលស្គាល់អ្វីដែលបានផ្លាស់ប្តូរនៅក្នុងសម័យឌីជីថលថ្ងៃនេះ»។
លោក សៀត ស៊ីសុភ័ក្ដ អតីតអគ្គនាយក Active Communications ហើយបច្ចុប្បន្នជានាយកគ្រប់គ្រងប្រតិបត្តិការ Phibious នៅកម្ពុជាថ្លែងថា លោកមានសុទិដ្ឋិនិយមជាមួយដៃគូថ្មី និងគំរូពាណិជ្ជកម្មថ្មី។
លោកបានថ្លែងថា៖ «ខ្ញុំមានទំនុកចិត្តថាជាមួយនឹងការច្របាច់បញ្ចូលគ្នារបស់ក្រុមហ៊ុន Phibious ជាក្រុមហ៊ុនមានសមត្ថភាពខ្ពស់ខាងភាពច្នៃប្រឌិត និងទីផ្សារឌីជីថល យើងនឹងបន្តក្នុងការបង្កើតព្រឹត្តិការណ៍ដ៏សំខាន់សម្រាប់យីហោនៅកម្ពុជា»៕LA
