ភ្នំពេញៈ ក្រុមហ៊ុនភ្នាក់ងាររៀបចំសេវាសម្រាប់អ្នកលេងល្បែងថ្នាក់ VIP ពីទីក្រុងម៉ាកាវ បានចាត់ទុកកម្ពុជាជាទីផ្សារថ្មីមួយដែលនឹងជំរុញឲ្យអាជីវកម្មពួកគេកើនឡើងខ្លាំង។ នេះបើយោងតាមអ្នកវិភាគពីក្រុមហ៊ុនប្រឹក្សាផ្នែកហិរញ្ញវត្ថុ Morgan Stanley Asia Ltd។
ប្រទេស ហ្វីលីពីន និងវៀតណាម ក៏ត្រូវបានប្រតិបត្តិករភ្នាក់ងាររៀបចំសេវាជូនអ្នកលេងល្បែងមានលុយច្រើន (Junket Operators) ទាំងនោះលើកឡើងពីសក្តានុពល ហើយបញ្ជាក់ថា ជាប្រភពកំណើនថ្មីរបស់ពួកគេស្របពេលអាជីវកម្មនៅម៉ាកាវចាប់ផ្តើមថមថយ។
លោក Praveen Choudhary និងលោក Jeremy An មកពីក្រុមហ៊ុន Morgan Stanley Asia Ltdកាលពីខែមុន បានជួបសម្ភាសជាមួយក្រុមហ៊ុន Junket Operators ជាច្រើននៅម៉ាកាវ ហើយបានបង្ហាញក្នុងសេចក្តីរាយការណ៍មួយថា ក្រុមហ៊ុន Junket Operators ទាំងនោះលើកឡើងថា ទីផ្សារក្រៅប្រទេសមានដំណើរការល្អ និងមានកំណើនខ្លាំងជាងអត្រាកំណើននៅម៉ាកាវទៅទៀត។
អ្នកវិភាគទាំង ២ ត្រូវបានសារព័ត៌មានផ្នែកអាជីវកម្មល្បែងនៅ ម៉ាកាវ GGR-Asia ស្រង់សម្តីថា៖ «កំណើនរបស់យើង គឺបានរួមចំណែកយ៉ាងសំខាន់ពីប្រតិបត្តិការនៅហ្វីលីពីន វៀតណាម និងកម្ពុជាស្របពេលដែលអាជីវកម្មរបស់យើងនៅកូរ៉េខាងត្បូង និងអូស្រ្តាលី មិនមានដំណើរការល្អទេ»។
ក្រុមហ៊ុនកាស៊ីណូ NagaCorp ដែលចុះបញ្ជីនៅផ្សារហ៊ុនហុងកុង និងជាក្រុមហ៊ុនមេរបស់ NagaWorld នៅកម្ពុជា បានឲ្យដឹងនៅក្នុងរបាយការណ៍ឆ្នាំ ២០១៨ របស់ខ្លួនថា ខ្លួនរំពឹងថា Junket Operators ធំៗ ៤ របស់ម៉ាកាវនឹងធ្វើប្រតិបត្តិការនៅ Naga2 ត្រឹមឆ្នាំ ២០១៩ នេះ។ ក្រុមហ៊ុន NagaCorp មិនបានបញ្ជាក់ពីឈ្មោះក្រុមហ៊ុនទាំងនោះទេ ប៉ុន្តែបានឲ្យដឹងថា ក្រុមហ៊ុន Junket Operators ទាំង ៤ បានរួមចំណែក ៧០ ភាគរយនៃការភ្នាល់សរុបក្នុងចំណោមភ្ញៀវវីអាយភីនៅម៉ាកាវ។
កាស៊ីណូ NagaCorp បានឲ្យដឹងនៅក្នុងរបាយការណ៍របស់ខ្លួនថា៖ «សេវាភ្នាល់លំដាប់វីអាយភី ដែលកំពុងកើនឡើង ប្រកបដោយភាពប្រកួតប្រជែង កំពុងទាក់ទាញកំណើនប្រតិបត្តិករ Junket Operators ហើយយើងរំពឹងថា នឹងមានការបើកដំណើរការបន្ទប់សម្រាប់ភ្នាក់ងាររៀបចំសេវាជូនអ្នកលេងល្បែងលំដាប់ VIP បន្ថែមទៀតក្នុងឆ្នាំ ២០១៩ នេះ»។
ចំនួនកាស៊ីណូនៅកម្ពុជាបានកើនឡើងយ៉ាងគំហុកកាលពីឆ្នាំមុន ដោយអាជ្ញាប័ណ្ណអាជីវកម្មកាស៊ីណូដែលផ្តល់ដោយរដ្ឋាភិបាលបានកើនដល់ចំនួនសរុប ១៥០ គិតត្រឹមដំណាច់ឆ្នាំ ២០១៨ ដែលភាគច្រើនជាអាជ្ញាប័ណ្ណសម្រាប់ធ្វើប្រតិបត្តិការនៅខេត្តព្រះសីហនុ។
យោងតាមរបាយការណ៍ពីខាងអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ ដែលជានិយតករអាជីវកម្មកាស៊ីណូ ចំនួនអាជ្ញាប័ណ្ណអាជីវកម្មកាស៊ីណូសរុបគិតត្រឹមដំណាច់ឆ្នាំ ២០១៨ មានកំណើនរហូតដល់ទៅ ៥៣ ភាគរយធៀបនឹងដំណាច់ឆ្នាំ ២០១៧ ដែលកាលនោះចំនួនអាជ្ញាប័ណ្ណសរុបមានត្រឹមតែ ៩៨ ប៉ុណ្ណោះ។ ក្នុងចំណោមកាស៊ីណូដែលមានអាជ្ញាប័ណ្ណចំនួន ១៥០ នៅដំណាច់ឆ្នាំ ២០១៨ នេះ គ្រាន់តែខេត្តព្រះសីហនុតែ ១ មានទីតាំងកាស៊ីណូ ៨៨ ទីតាំងទៅហើយ។
តំណាងមកពីអគ្គនាយកដ្ឋានឧស្សាហកម្មហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ មិនអាចទាក់ទងសុំការអត្ថាធិប្បាយបានទេកាលពីម្សិលមិញ។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បានឲ្យដឹងកាលពីម្សិលមិញថា កំណើនចំនួនកាស៊ីណូ អាចរួមចំណែកបង្កើនប្រាក់ចំណូលពន្ធ និងបង្កើតឱកាសការងារកាន់តែច្រើន ប៉ុន្តែលោកបានបញ្ជាក់ផងដែរថា វាក៏បានបង្កបញ្ហាដែល ត្រូវបារម្ភផងដែរ។
លោកបន្ថែមថា ការចូលមកយ៉ាងគំហុករបស់ភ្ញៀវទេសចរអ្នកលេងល្បែង និងវិនិយោគិនក្នុងវិស័យនេះ បាននាំមកនូវផលប៉ះពាល់អវិជ្ជមានជាច្រើនមិនខាន ប្រសិនបើការអនុវត្តច្បាប់មិនខ្លាំងគ្រប់គ្រាន់។
លោកថ្លែងថា៖ «ហានិភ័យធំជាងគេ ទាក់ទងនឹងកំណើនលំហូរចូលអាជីវកម្មកាស៊ីណូ គឺជាបញ្ហាការលាងលុយកខ្វក់»។
លោកបានបន្តថា អង្គការឃ្លាំមើល ការលាងលុយពិភពលោក Financial Action Task Force (FATF) ទើបបានដាក់ប្រទេស កម្ពុជា នៅក្នុងបញ្ជីឃ្លាំមើលរបស់ពួកគេកាលពីពេលថ្មីៗនេះ។
លោក ព្រាប កុល បានថ្លែងទៀតថា៖ «កំណើនអាជីវកម្មកាស៊ីណូ ក៏អាចធ្វើឲ្យយើងប្រឈមនឹងភាពងាយទទួលរងគ្រោះ ដោយសារតែការជួញដូរគ្រឿងញៀន អស្ថិរភាពសង្គម និងបញ្ហាផ្សេងទៀតជាច្រើនផងដែរ»៕LA