ភ្នំពេញៈ មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម (ម.ជ.ម.) ក្នុងឆ្នាំ ២០២១ នេះបានធ្វើវិសោធនកម្មលើវិធានស្តីពីមជ្ឈត្តការ ឆ្នាំ ២០១៤ ក្នុងគោលបំណងដើម្បីធ្វើការអភិវឌ្ឍនានាក្នុងវិស័យមជ្ឈត្តការពាណិជ្ជកម្ម និងដើម្បីផ្តល់សេវារបស់ខ្លួនទៅកាន់អ្នកប្រើប្រាស់ឱ្យកាន់តែប្រសើរថែមទៀត។
វិធានស្តីពីមជ្ឈត្តការថ្មីនេះ ត្រូវបានអនុម័តនៅថ្ងៃទី ២៨ ខែ មីនា ឆ្នាំ ២០២១ និងត្រូវបានកំណត់ឱ្យចូលជាធរមានចាប់ពីថ្ងៃទី ២៨ ខែ មិថុនា ឆ្នាំ ២០២១។ វិធានស្តីពីមជ្ឈត្តការថ្មីនេះ គឺជាលទ្ធផលនៃការចំណាយពេលជាច្រើនរបស់ ម.ជ.ម. លើការស្រាវជ្រាវ ការវិភាគ ការកែតម្រូវ និងការពិគ្រោះយោបល់ជាមួយអ្នកអនុវត្តច្បាប់ ក៏ដូចជាមជ្ឈត្តករជាតិ និងអន្តរជាតិ ដែលមានបទពិសោធខ្ពស់។
គិតត្រឹមថ្ងៃទី ១ ខែ មីនា ឆ្នាំ ២០២១ មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម (ម.ជ.ម.) បានទទួលចាត់ចែងធ្វើមជ្ឈត្តការលើសំណុំរឿងក្រោមវិធានស្តីពីមជ្ឈត្តការ ឆ្នាំ ២០១៤ ចំនួន ២៥ សំណុំរឿង (រួមទាំងសំណុំរឿងអន្តរជាតិ) ដែលទំហំវិវាទសរុបមានលើសពី ៧២ លានដុល្លារ។ ដោយឡែកបើគិតតែក្នុងឆ្នាំ ២០២០ ទំហំវិវាទមានទឹកប្រាក់ប្រហែល ២៩ លានដុល្លារ ស្មើនឹង ៣៥ ភាគរយនៃទំហំវិវាទសរុបចន្លោះពីឆ្នាំ ២០១៤-២០២០។
បើតាម ម.ជ.ម. «មជ្ឈត្តការពាណិជ្ជកម្មបានក្លាយជាជម្រើសដ៏សមស្របមួយសម្រាប់គូភាគីវិវាទដែលមានបំណងដោះស្រាយវិវាទរបស់ខ្លួនក្រៅប្រព័ន្ធតុលាការ ហើយនិន្នាការនេះត្រូវគេរំពឹងនឹងបន្តកើនឡើងខ្លាំងនៅពេលអនាគត»។
ចំណុចសំខាន់ៗនៃវិសោធនកម្មមានដូចជា ការអនុញ្ញាតឱ្យ ម.ជ.ម. អាចចាត់ចែងសំណុំរឿងមជ្ឈត្តការ និងផ្តល់សេវាកម្មផ្សេងៗ ក្រោមវិធានស្តីពីមជ្ឈត្តការរបស់ ម.ជ.ម. និងការអនុញ្ញាតឱ្យគូភាគីវិវាទអាចបន្ថយពេលវេលាកំណត់ដែលមានចែងនៅក្នុងវិធានស្តីពីមជ្ឈត្តការ ប្រសិនបើមានការព្រមព្រៀងពីគូភាគីវិវាទ។
ដើម្បីឆ្លើយតបទៅបញ្ហានានាដែលអាចកើតមានទាក់ទងនឹងឯករាជភាព និងអព្យាក្រឹតភាពរបស់មជ្ឈត្តករ ដែលកើតចេញពីការផ្លាស់ប្តូរអ្នកតំណាងរបស់ភាគីវិវាទ បន្ទាប់ពីវេទិកាមជ្ឈត្តកម្មត្រូវបានបង្កើតរួច វិសោធនកម្មថ្មីបានអនុញ្ញាតឱ្យវេទិកាមជ្ឈត្តកម្មមានសិទ្ធិអំណាចក្នុងការចាត់វិធានការចាំបាច់នានា ដើម្បីចៀសវាងការកើតមានទំនាស់ផលប្រយោជន៍ ចេញពីការផ្លាស់ប្តូរនោះ។ វិធានថ្មីនេះ ក៏បានកំណត់វិធីសាស្ត្រថ្មីក្នុងការកំណត់កាលបរិច្ឆេទនៃការចាប់ផ្តើមដំណើរការមជ្ឈត្តការដែលមានសារៈសំខាន់ ជាពិសេសសម្រាប់វិវាទដែលមានភាគីឆ្លើយតបច្រើន។
លោក ប៊ុន យូឌី ប្រធាន ម.ជ.ម. បានឱ្យដឹងថា ស្ថាប័នរបស់លោកពិតជាមានមោទនភាពក្រៃលែងដែល ម.ជ.ម សម្រេចបាននូវការប្តេជ្ញាចិត្តរបស់ខ្លួនក្នុងការផ្តល់នូវការដោះស្រាយវិវាទពាណិជ្ជកម្មប្រកបដោយប្រសិទ្ធភាព ទោះបីមានឧបសគ្គដែលកំពុងកើតឡើងដោយសារការរីករាលដាលជាសកលក៏ដោយ។
លោកថា៖ «ជោគជ័យនេះជាលទ្ធផលនៃការវិនិយោគយ៉ាងច្រើនទៅលើហេដ្ឋារចនាសម្ព័ន្ធព័ត៌មានវិទ្យា ចាប់តាំងពីដើមឆ្នាំនេះ ក៏ដូចជា ការត្រៀមរៀបចំយ៉ាងយកចិត្តទុកដាក់ពីសំណាក់ អគ្គលេខាធិការដ្ឋានរបស់យើង។ យើងខ្ញុំពិតជាមានសេចក្តីសោមនស្សរីករាយក្រៃលែងចំពោះការសម្រេចបាននូវគោលការណ៍ថ្មីមួយនេះ សម្រាប់ការផ្តល់សេវាកម្មក្នុងការជួយដោះស្រាយវិវាទពាណិជ្ជកម្ម»។
បន្ថែមលើនេះ វិធានថ្មីក៏បានចែងអំពីការប្រើប្រាស់មធ្យោបាយទំនាក់ទំនងតាមរយៈប្រព័ន្ធអេឡិចត្រូនិកក្នុងដំណើរការមជ្ឈត្តការឱ្យកាន់តែមានលក្ខណៈច្បាស់ជាងមុន ដើម្បីឆ្លើយតបនឹងទម្លាប់ថ្មីនាសម័យបច្ចុប្បន្ននេះ។ វិធានថ្មីនេះក៏បានកំណត់ពីពេលវេលាជាក់លាក់សម្រាប់វេទិកាមជ្ឈត្តកម្មក្នុងការប្រកាសបិទដំណើរការមជ្ឈត្តការ ដើម្បីអនុញ្ញាតឱ្យគូភាគីវិវាទអាចស្មានទុកជាមុននូវកាលបរិច្ឆេទចេញមជ្ឈត្តវិនិច្ឆ័យស្ថាពរ។
លើសពីនេះ វិធានស្តីពីមជ្ឈត្តការថ្មីក៏បានបន្ថែមនីតិវិធីពន្លឿន និងមជ្ឈត្តករបន្ទាន់ជាលើកដំបូងផងដែរ។ ភាគីវិវាទអាចដាក់សំណើសុំនីតិវិធីពន្លឿន និងមជ្ឈត្តករបន្ទាន់ជាលើកដំបូងផងដែរ។ ភាគីវិវាទអាចដាក់សំណើសុំនីតិវិធីពន្លឿនបាន ប្រសិនបើតម្លៃកម្មវត្ថុនៃវិវាទមានតម្លៃមិនលើសពី ៣ លានដុល្លារ មានការព្រមព្រៀងពីគូភាគីវិវាទក្នុងករណីពិសេសបន្ទាន់ខ្លាំង។
ក្រោមដំណើរការនីតិវិធីពន្លឿននេះ មជ្ឈត្តវិនិច្ឆ័យស្ថាពរនឹងត្រូវចេញក្នុងអំឡុងពេល ២៧០ ថ្ងៃ ប្រតិទិនគិតចាប់ពីថ្ងៃដែលវេទិកាមជ្ឈត្តកម្មត្រូវបានបង្កើត។ មុនពេលវេទិកាមជ្ឈត្តកម្មត្រូវបានបង្កើតឡើង ភាគីវិវាទក៏អាចដាក់សំណើនោះនឹងត្រូវចេញក្នុងអំឡុងពេល ១៥ ថ្ងៃប្រតិទិន បន្ទាប់ពីថ្ងៃដែលមជ្ឈត្តករបន្ទាន់ត្រូវបានតែងតាំង។
ម.ជ.ម. បញ្ជាក់ថា៖ «តាមរយៈវិធានថ្មីនេះ អ្នកប្រើប្រាស់អាចដោះស្រាយវិវាទខ្លួននៅ ម.ជ.ម ជាមួយនឹងភាពបត់បែន ប្រសិទ្ធភាព និងតម្លាភាពកាន់តែខ្ពស់ជាងមុនថែមទៀត»។
លោក លី តៃសេង នាយកប្រតិបត្តិនៃក្រុមហ៊ុនមេធាវី និងមន្ទីរសារការី អេច ប៊ី អេស បានលើកឡើងថា ភាពជោគជ័យនៃមជ្ឈត្តការផ្នែកពាណិជ្ជកម្ម គឺអាស្រ័យលើច្បាប់ និងវិធាននៃមជ្ឈត្តការល្អ ដើម្បីធានានូវប្រសិទ្ធភាព និងតម្លាភាពនៃដំណើរការ ភាពអព្យាក្រឹត និងភាពវិជ្ជាជីវៈរបស់មជ្ឈត្តករ។
លោកថ្លែងថា៖ «ខ្ញុំសង្ឃឹមថាតុលាការ និងស្ថាប័នរដ្ឋផ្សេងទៀតនៅកម្ពុជានឹងផ្តល់ការគាំទ្រចាំបាច់សម្រាប់បង្កើតលក្ខខណ្ឌអំណោយផលដល់ការរីកចម្រើនឆាប់រហ័សនៃមជ្ឈត្តការពាណិជ្ជកម្ម ដែលជាសេចក្តីត្រូវការនៃសហគមន៍ធុរកិច្ច»៕ LA