ភ្នំពេញៈ អគ្គនាយកនៃអគ្គនាយកដ្ឋានភ័ស្តុភារកម្មនៃក្រសួងសាធារណការ និងដឹកជញ្ជូនអះអាងថា ការសិក្សាលទ្ធភាពបឋម (pre-feasibility study) ការបង្កើតមជ្ឈមណ្ឌលប្រមូលផ្តុំប្រព័ន្ធភ័ស្តុភារកម្មភ្នំពេញឡូជីស្ទីក បង្ហាញពីលទ្ធផលវិជ្ជមានដែលអាចធ្វើពាណិជ្ជកម្មបាន។
លោក ឈៀង ពេជ្រ អគ្គនាយកនៃអគ្គនាយកដ្ឋានភ័ស្តុភារកម្មប្រាប់ភ្នំពេញប៉ុស្តិ៍កាលពីថ្ងៃពុធថា ការសិក្សាលទ្ធភាពក្នុងការបង្កើតមជ្ឈមណ្ឌលប្រមូលផ្តុំប្រព័ន្ធភ័ស្តុភារកម្មភ្នំពេញឡូជីស្ទីកបានចប់សព្វគ្រប់អស់ហើយកាលពីថ្មីៗនេះ។ លោកបន្តថា ការសិក្សាបង្ហាញថា គម្រោងនេះអាចធ្វើពាណិជ្ជកម្មបាន ព្រមទាំងអាចរកប្រាក់ចំណេញបានទាំងផ្នែកឯកជន និងរដ្ឋផងដែរ។
លោកថ្លែងថា៖ «ក្រោយពីបានបញ្ចប់ការសិក្សាលទ្ធភាពបង្កើតគម្រោងនេះក្រសួងសាធារណការក៏បានរាយការណ៍រួចហើយពីលទ្ធផលការសិក្សានេះទៅក្រសួងសេដ្ឋកិច្ច និងហិរញ្ញវត្ថុ។ ប្រសិនបើក្រសួងសេដ្ឋកិច្ច និងហិរញ្ញវត្ថុផ្តល់ភ្លើងខៀវឲ្យយើងបន្តការសិក្សាលើលទ្ធភាពពេញលេញនោះ យើងនឹងធ្វើការសហការជាមួយធនាគារអភិវឌ្ឍន៍អាស៊ី ដើម្បីរៀបចំការសិក្សាបន្តទៀត»។
គម្រោងភ្នំពេញឡូជីស្ទីកនេះមានទីតាំងស្ថិតនៅក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញលើផ្ទៃដីសរុប ៩៨ ហិកតាដែលជាទីតាំងយុទ្ធសាស្ដ្រមួយតភ្ជាប់ទៅកាន់កំពង់ផែសមុទ្រទឹកជ្រៅក្នុងខេត្តព្រះសីហនុ និងផ្លូវដែកភាគខាងជើងដែលចេញពីរាជធានីភ្នំពេញឆ្ពោះទៅកាន់ក្រុងប៉ោយប៉ែតព្រំដែនប្រទេសថៃ។
វាជាទីតាំងស្ថិតនៅជិតព្រលានយន្តហោះអន្តរជាតិភ្នំពេញ ផ្លូវជាតិលេខ ៤ និងផ្លូវជាតិលេខ ៣ ព្រមទាំងទីតាំងស្ដុកទំនិញនៅស្ថានីយរថភ្លើង និងតំបន់សេដ្ឋកិច្ចពិសេសភ្នំពេញ។
ទីភ្នាក់ងារកិច្ចសហប្រតិបត្តិការអន្តរជាតិជប៉ុន (JICA) បានប៉ាន់ប្រមាណក្នុងរបាយការណ៍ឆ្នាំ ២០១៦ ថា ប្រទេសកម្ពុជាបានគិតសេវានាំចេញពីក្រុមហ៊ុននាំចេញសរុប ៥៤០ ដុល្លារក្នុងមួយ TEU (ទូ ២០ ហ្វីតទំហំស្ដង់ដារបស់កុងតឺន័រ) ខណៈប្រទេសថៃ បានគិតប្រាក់ប្រហែល ២០០ ដុល្លារ និងប្រទេសវៀតណាម ២៥០ ដុល្លារប៉ុណ្ណោះ។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានប្រាប់ភ្នំពេញប៉ុស្តិ៍កាលពីថ្ងៃពុធថា គម្រោងនេះនឹងផ្តល់ជម្រើសកាន់តែច្រើនដល់វិស័យឯកជនដែលកំពុងវិនិយោគលើវិស័យឡូជីស្ទីកក្នុងការដឹកជញ្ជូនទំនិញ ដោយវានឹងជួយកាត់បន្ថយថ្លៃដើមផលិត និងបង្កើនសមត្ថភាពប្រកួតប្រជែងទំនិញផលិតនៅកម្ពុជាជាមួយប្រទេសនានាលើពិភពលោកផងដែរ។
លោកបានថ្លែងថា៖ «ខ្ញុំគិតថា សព្វថ្ងៃយើងកំពុងរង់ចាំវិនិយោគិនដែលអាចធ្វើឲ្យគម្រោងនេះដំណើរការបានឆាប់។ ខ្ញុំសង្ឃឹមថា វានឹងសម្រេចបានក្នុងពេលឆាប់ៗ»៕ LA