.jpg)
ផ្សារទំនើបមួយនៅខេត្តព្រះសីហនុ ដែលជាការវិនិយោគរបស់ជនជាតិចិន។ ក្រុមហ៊ុនក្នុងស្រុកនឹងបើកមណ្ឌលពាណិជ្ជកម្មដើម្បីបំពេញតម្រូវការចិននៅក្រុងព្រះសីហនុ។ ជីវ័ន
ក្រុងព្រះសីហនុៈ ក្រុមហ៊ុនអចលនទ្រព្យ Furi Real Estate បានប្រកាសពីគម្រោងវិនិយោគរួមគ្នា ជាមួយក្រុមហ៊ុនមកពីម៉ាកាវលើមជ្ឈមណ្ឌលពាណិជ្ជកម្មតម្លៃ ១០ លានដុល្លារ លើកដំបូងនៅខេត្តព្រះសីហនុ ដោយផ្តោតជាសំខាន់លើជនជាតិចិន។ នេះបើយោងតាមនាយកក្រុមហ៊ុន Furi Real Estate។
លោកស្រី ជិន ចាន់ឡែន នាយិកា Furi Times Squre បាននិយាយថា លំហូរចូលភ្ញៀវទេសចរ និងវិនិយោគិនជនជាតិចិនយ៉ាងគំហុក ធ្វើឲ្យក្រុងព្រះសីហនុប្រឈមនឹងកង្វះកន្លែងស្នាក់នៅ និងមជ្ឈមណ្ឌលពាណិជ្ជកម្មជាច្រើនកន្លែង។
លោកស្រីបន្តថា ភ្ញៀវបរទេស ពិសេសជនជាតិចិន តែងពិបាករកកន្លែងទិញទំនិញ និងអាហារ។
លោកស្រីបានថ្លែងថា៖ «ក្រុងព្រះសីហនុមានការរីកចម្រើនខ្លាំងស្ទើរគ្រប់វិស័យ តែមជ្ឈមណ្ឌលពាណិជ្ជកម្មរហូតមកដល់ពេលនេះនៅមិនទាន់មានទេ។ ដោយសារភ្ញៀវជនជាតិចិនមានចំនួនច្រើននៅទីនោះដូច្នេះការសងសង់ Furi Times Squre នឹងផ្តោតសំខាន់ទៅលើអតិ ថិជនជនជាតិចិន»។
របាយការណ៍របស់មន្ទីរទេសចរណ៍ខេត្តព្រះសីហនុ បង្ហាញថា ក្នុងឆមាសទី ១ ឆ្នាំ ២០១៨ ខេត្តព្រះសីហនុទទួលបានភ្ញៀវទេសចរ ១,៣ លាននាក់ កើនឡើង ១០,១២ ភាគរយបើធៀបនឹងរយៈពេលដូចគ្នាក្នុងឆ្នាំ ២០១៧ ដែលមានជាង ១,១ លាននាក់។ ក្នុងនោះភ្ញៀវទេសចរមកពីប្រទេសចិនបានឈានមុខគេ ដោយមានចំនួន ៨៤ ៦៦៤ នាក់កើនឡើង ៤៣,៦៣ ភាគរយ។
មជ្ឈមណ្ឌលពាណិជ្ជកម្មនេះមានទីតាំងស្ថិតក្នុងខណ្ឌមិត្តភាព ក្រុងព្រះសីហនុ ដែលនឹងសាងសង់លើ ផ្ទៃដីទំហំ ១ ហិកតាមានកម្ពស់៤ជាន់ និងមានទុនវិនិយោគ ១០ លានដុល្លារ។
តាមលោកស្រី ជិន ចាន់ឡែន មជ្ឈមណ្ឌលពាណិជ្ជកម្មនេះរួមមានផ្សារទំនើប ហាងលក់អាហារ កន្លែងលក់សម្លៀកបំពាក់ រោងភាពយន្ត និង Skybar។ គម្រោងនេះនឹងចាប់ផ្តើមសាងសង់នៅចុងខែនេះ ហើយតាមផែនការនឹងបើកដំណើរការនៅក្នុងខែកញ្ញា ឆ្នាំ ២០១៩។
Furi Real Estate គឺជាក្រុមហ៊ុនបម្រើសេវាកម្មទាក់ទងនឹងវិស័យអចលនទ្រព្យក្នុងស្រុក ដែលធ្លាប់ទទួលជោគជ័យក្នុងការលក់គម្រោងធំៗជាច្រើនដូចជា Casa Meridian Condo, TheBhumi Emerald និងគម្រោងDe Castle Royal ជាដើម។ ទោះបីយ៉ាងនេះក្តីក្រុមហ៊ុនមិនបានបង្ហាញឈ្មោះក្រុមហ៊ុនម៉ាកាវដែល វិនិយោគរួមគ្នានេះទេ។
អភិបាលខេត្តព្រះសីហនុ លោក យន្ត មីន ដែលទើបត្រឡប់មកពីប្រទេសចិនកាលពីថ្ងៃ ២២ កញ្ញា បាននិយាយថា ក្រុមការងាររបស់លោកបានខិតខំធ្វើការយ៉ាងខ្លាំងដើម្បីបង្ហាញពីសក្តានុពលរបស់ខេត្តព្រះសីហនុទៅដល់ថ្នាក់ដឹកនាំ និងវិនិយោគិនជនជាតិចិន។ លោកបន្តថា ការកើនឡើងនៃភ្ញៀវទេសចរ និងវិនិយោគិន បានធ្វើឲ្យក្រុងព្រះសីហនុមានការរីកចម្រើនយ៉ាងឆាប់រហ័ស។
លោកបានបន្តថា៖ «គ្រប់ប្រទេសសុទ្ធតែចង់ឲ្យវិនិយោគគិន និងភ្ញៀវទេសចរចិនទៅទស្សនាប្រទេសខ្លួន ព្រោះចិនមានលុយច្រើន»។
របាយការណ៍ស្រាវជ្រាវប្រចាំឆមាសទី ១ ឆ្នាំ ២០១៨ របស់ក្រុមហ៊ុនអចលនទ្រព្យ ឃី រៀលអីុស្ទេត បង្ហាញថា ដីនៅកណ្តាលក្រុងព្រះសីហនុបានហក់ឡើងយ៉ាងគំហុកតែក្នុងរយៈពេល ១ ឆ្នាំចាប់ពីឆ្នាំ ២០១៧។
ទិន្នន័យពីក្រសួងទេសចរណ៍បានបង្ហាញថា ក្នុងរយៈពេល ៧ ខែ ឆ្នាំ ២០១៨ ភ្ញៀវទេសចរអន្តរជាតិដែលមកទស្សនាកម្ពុជាមានចំនួន ៣,៤៥ លាននាក់ កើនឡើង ១១,១ ភាគរយ ធៀបនឹងរយៈពេលដូចគ្នាឆ្នាំ ២០១៧ ក្នុងនោះជនជាតិចិនមានប្រហែល១លាននាក់។
តួលេខពីក្រសួងមហាផ្ទៃបានឲ្យដឹងថា គិតត្រឹមឆ្នាំ ២០១៨ នេះ ជនជាតិចិនរស់នៅក្នុងប្រទេសកម្ពុជាបានកើនឡើងដល់ជាង ២១ ម៉ឺននាក់ បើធៀបនឹងឆ្នាំ ២០១៧ ដែលមានត្រឹមតែជាង ១០ ម៉ឺននាក់ប៉ុណ្ណោះ ហើយក្នុងនោះជាង ៧៨ ០០០ នាក់កំពុងរស់នៅខេត្តព្រះសីហនុ៕LA
