.jpg)
លោក ថោង ខុន រដ្ឋមន្ត្រីក្រសួងទេសចរណ៍ អញ្ជើញចូលរួមក្នុងពិធីសម្ភោធ មជ្ឈមណ្ឌលវាយតម្លៃផលិតកម្មម្ហូបអាហារ កាលពីពេលថ្មីៗនេះ។ រូបថត FN
ភ្នំពេញ: មជ្ឈមណ្ឌលវាយតម្លៃសមត្ថភាពអ្នកជំនាញទេសចរណ៍ ផ្នែកផលិតកម្មម្ហូបអាហារដែលជាការវិនិយោគរបស់ក្រុមហ៊ុន Thalias ត្រូវបានដាក់ឲ្យដំណើរការកាលពីថ្ងៃម្សិលមិញនៅទីក្រុងភ្នំពេញ ដែលគេរំពឹងថានឹងពង្រឹងធនធានមនុស្សក្នុងវិស័យទេសចរណ៍កម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍ដែលបានចូលរួមបើកដំណើរការមជ្ឈមណ្ឌលនេះបានឲ្យដឹងថា វានឹងជួយពង្រឹងសុវត្ថិភាពចំណីអាហារទៅស្របតាមស្តង់ដាអន្តរជាតិរបស់កម្ពុជាដែលជាផ្នែកមួយសំខាន់ក្នុងការទាក់ទាញទេសចរ។ លោកថ្លែងថា៖ «ការអភិវឌ្ឍធនធានមនុស្សនៅក្នុងវិស័យទេសចរណ៍តាមរយៈការបណ្តុះបណ្តាល និងវាយតម្លៃសមត្ថភាពអ្នកជំនាញទេសចរណ៍គឺជាគោលដៅយុទ្ធសាស្ត្រអាទិភាពមួយរបស់ក្រសួងទេសចរណ៍ និងបានឆ្លើយតបទៅនឹងផែនការយុទ្ធសាស្ត្រអាស៊ានផងដែរ»។
លោកបន្ថែមថាការទទួលស្គាល់មជ្ឈមណ្ឌលវាយតម្លៃសមត្ថភាពនេះគឺស្របតាមផែនការយុទ្ធសាស្ត្រអភិវឌ្ឍន៍ធនធានមនុស្សសម្រាប់វិស័យទេសចរណ៍ឆ្នាំ ២០១៧-២០២៥ របស់រដ្ឋាភិបាល។ លោកបន្តថា៖ «ការជំរុញដល់ភាគីពាក់ព័ន្ធស្ថាប័នបណ្តុះបណ្តាលវិជ្ជាជីវៈទេសចរណ៍ បុគ្គលិកបម្រើការងារ ពិសេសជំនាញចុងភៅឲ្យផ្សព្វផ្សាយ និងចូលរួមវាយតម្លៃសមត្ថភាពរបស់ខ្លួនបន្ថែមទៀត»។
លោក តុប សុភ័ក អ្នកនាំពាក្យក្រសួងទេសចរណ៍បានឲ្យដឹងថា មជ្ឈមណ្ឌលនេះនឹងជួយទាក់ទាញភ្ញៀវទេសចរ និងការអភិវឌ្ឍវិស័យទេសចរណ៍។ លោកថ្លែងថា៖ «មជ្ឈមណ្ឌលនេះបង្កើតឡើងក្នុងគោលបំណងចង់ឲ្យម្ហូបអាហារយើងមានគុណភាពទទួលបានការគាំទ្រពីអតិថិជន ភ្ញៀវទេសចរ រួមទាំងសុវត្ថិភាពចំណីអាហារ យើងចង់លើកតម្កើងម្ហូបខ្មែរដោយទទួលស្គាល់ពីអន្តរជាតិ»។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានឲ្យដឹងថា មជ្ឈមណ្ឌលនេះនឹងជួយផ្តល់ជំនាញម្ហូបអាហារច្បាស់លាស់ដល់អ្នកចង់សិក្សាផ្នែកនេះ។ លោកថ្លែងថា៖ «មជ្ឈមណ្ឌលដែលមានបង្រៀនជំនាញទេសចរណ៍ និងម្ហូបអាហារអាចផ្តល់ទំនុកចិត្តដល់ភ្ញៀវទេសចរតាមរយៈសេវាកម្មម្ហូបអាហារ»។
បើតាមលោក សុភ័ក ដើម្បីលើកកម្ពស់វិស័យទេសចរណ៍ ក្រសួងនឹងរៀបចំសន្និសីទអន្តរជាតិលើកទី ១ ស្តីពីទេសចរណ៍ម្ហូបអាហារដែលនឹងប្រព្រឹត្តទៅថ្ងៃទី ២១ ខែសីហា ឆ្នាំ ២០១៩ នៅទីក្រុងភ្នំពេញ។
តាមទិន្នន័យពីក្រសួងទេសចរណ៍នៅឆមាសទី ១ កម្ពុជាទទួលបានភ្ញៀវទេសចរអន្តរជាតិប្រមាណ ៣,៣ លាននាក់កើនឡើង ១១,២ ភាគរយ បើធៀបទៅរយៈពេលដូចគ្នាកាលពីឆ្នាំ ២០១៨។ បើតាមទិន្នន័យពីគ្រឹះស្ថានអង្គរ ប្រាក់ចំណូលពីការលក់សំបុត្រឲ្យភ្ញៀវទេសចរបរទេសចូលទស្សនារមណីយដ្ឋានអង្គរមានចំនួនជាង ៦២,៣ លានដុល្លារក្នុងរយៈពេល ៧ ខែ ឆ្នាំ ២០១៩ នេះធ្លាក់ចុះ ១០,៥៦ ភាគរយបើធៀបរយៈពេលដូចគ្នាកាលពីឆ្នាំមុន៕LA
