សៀមរាបៈ សណ្ឋាគារសុខានឹងបើកដំណើរការមជ្ឈមណ្ឌលសន្និសីទឈានមុខគេនៅខេត្តសៀមរាបនៅខែក្រោយដែលនឹងធ្វើឲ្យជាទិសដៅទេសចរណ៍មួយនេះទាក់ទាញក្រុមវិនិយោគិនបរទេសកាន់តែច្រើន។
សណ្ឋាគារនេះនឹងបើកដំណើរការមជ្ឈមណ្ឌលសន្និសីទទំហំ ៩ ០០០ ម៉ែត្រការ៉េនៅជិតបរិវេណរមណីយដ្ឋាន និងសណ្ឋាគារដែលមាន ៧៧០ បន្ទប់របស់ខ្លួន។
ការសាងសង់អគារនេះបានចាប់ផ្ដើមកាលពីខែឧសភាឆ្នាំ ២០១៤ ហើយគ្រោងនឹងបើកសម្ពោធនៅខែកញ្ញាដើម្បីឲ្យស្របគ្នានឹងការបើកដំណើរសណ្ឋាគារផ្កាយ ៥។
លោកស្រី Leena Rajagopal នាយកផ្នែកលក់របស់មជ្ឈមណ្ឌលនេះថ្លែងថាសណ្ឋាគារដែលមានស្រាប់នៅក្នុងខេត្តសៀមរាបនៅមានកម្រិតសម្រាប់ការប្រជុំ និងសន្និសីទ។
លោកស្រីបន្តថា៖ «កាលពីមុនសន្និសីទសំខាន់ៗភាគច្រើនត្រូវបានធ្វើឡើងនៅទីក្រុងភ្នំពេញ»។ លោកស្រីបន្តថា៖ «ការប្រកាសនេះនឹងអនុញ្ញាតឲ្យឧស្សាហកម្មនេះដឹងថាសៀមរាបនៅពេលនេះជាជម្រើសដ៏ល្អបំផុតក្នុងការរៀបចំព្រឹត្តិការណ៍អន្តរជាតិដែលរួមបញ្ចូលអាជីវកម្មជាមួយនឹងបទពិសោធវប្បធម៌»។
លោក ឆឺយ ឆន អនុប្រធានមន្ទីរទេសចរណ៍ខេត្តសៀមរាបបានថ្លែងថាមជ្ឈមណ្ឌលសនិ្នសីទថ្មីនេះនឹងបង្កើតជាទីកន្លែងសមរម្យសម្រាប់សន្និសីទ និងព្រឹត្តិការណ៍អាជីវកម្មធំៗដែលព្រឹត្តិការណ៍មួយចំនួនមានអ្នកចូលរួមជាងមួយពាន់នាក់។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំនៅកម្ពុជាថ្លែងថាមជ្ឈមណ្ឌលសន្និសីទថ្មីរបស់សណ្ឋាគារសុខានឹងដើរតួនាទីដ៏សំខាន់ក្នុងការលើកកម្ពស់ទេសចរណ៍ខេត្តសៀមរាបដែលផ្ដល់ប្រយោជន៍ដល់សេដ្ឋកិច្ចកាន់តែទូលំទូលាយ។
លោកថ្លែងថាវាជាផ្នែកមួយនៃការនាំយកទេសចររាប់ពាន់នាក់មកកម្ពុជា៕ LA/រាយការណ៍បន្ថែមៈ ចេង សុខហ័ង
