.jpg)
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាពេលកន្លងមក។ រូបថត ក្រសួងសាធារណការ
ភ្នំពេញៈ មន្ត្រីជាន់ខ្ពស់កម្ពុជាអំពាវនាវឲ្យមានការពង្រឹងកិច្ចសហប្រតិបត្តិការបន្ថែមទៀតក្នុងការប្រែក្លាយមហាអនុតំបន់មេគង្គ (GMS) ឲ្យកាន់តែមានភាពទាក់ទាញ សម្រាប់ការវិនិយោគ ពាណិជ្ជកម្ម និងទេសចរណ៍។
ការអំពាវនាវនេះត្រូវបានធ្វើឡើងដោយលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូននៅកិច្ចប្រជុំចង្អៀតលើកទី ៣ នៃគណៈកម្មាធិការរួមការងារដឹកជញ្ជូនឆ្លងត់ព្រំដែនក្នុងក្របខ័ណ្ឌមហាអនុតំបន់មេគង្គកាលពីថ្ងៃពុធ។
កិច្ចប្រជុំនេះមានការចូលរួមពីគណៈប្រតិភូជារដ្ឋមន្ត្រីក្រសួងដឹកជញ្ជូន មន្ត្រីជាន់ខ្ពស់ និងមន្ត្រីបច្ចេកទេសមកពីបណ្តាប្រទេសសមាជិកនៃមហាអនុតំបន់មេគង្គ (GMS) រួមមាន៖ ប្រទេស កម្ពុជា ចិន ឡាវ ថៃ មីយ៉ាន់ម៉ា វៀតណាម ធនាគារអភិវឌ្ឍន៍អាស៊ី និងវិទ្យាស្ថានមេគង្គ។
លោកថ្លែងថា៖ «កិច្ចប្រជុំថ្នាក់រដ្ឋមន្ត្រីដឹកជញ្ជូន មន្ត្រីជាន់ខ្ពស់ និងអ្នកជំនាញ ពេលនេះនឹងជំរុញឲ្យមានទំនាក់ទំនងកាន់តែប្រសើរឡើងក្នុងចំណោមប្រទេសសមាជិក GMS និងជំរុញកិច្ចសហប្រតិបត្តិការរវាងគ្នាបន្ថែមទៀតក្នុងការសម្របសម្រួល និងការលើកកម្ពស់ការដឹកជញ្ជូនសំដៅបង្កើនបរិមាណការដឹកជញ្ជូនឆ្លងកាត់ព្រំដែន ពង្រីកទំហំពាណិជ្ជកម្ម និងការទាក់ទាញការវិនិយោគផ្ទាល់ពីបរទេស»។
យោងតាមលោក ស៊ុន ចាន់ថុល នៅក្នុងកិច្ចប្រជុំគណៈកម្មាធិការរួមនៃកិច្ចព្រមព្រៀង CBTA លើកទី ៧ នៅខេត្តសៀមរាបកាលពីថ្ងៃទី ១៣ ខែ មីនា ឆ្នាំ ២០១៩ តំបន់នេះបានទទួលស្គាល់ថា ការកាត់បន្ថយឧបសគ្គមិនមែនរូបវន្តក្នុងការដឹកជញ្ជូន និងពាណិជ្ជកម្មគឺជាគន្លឹះក្នុងការជំរុញពាណិជ្ជកម្ម ទេសចរណ៍ និងការវិនិយោគ។
លោកបានថ្លែងថា៖ «ជាលទ្ធផលរយៈពេល ៩ ខែ ចាប់តាំងពីពេលនោះមក យើងបានកត់សម្គាល់ឃើញថា មានការរីកចម្រើនមួយចំនួនដូចជាការចាប់ផ្តើមប្រើប្រាស់លិខិតអនុញ្ញាតបណ្តោះអាសន្នសម្រាប់ការដឹកជញ្ជូន ក្រោមអនុស្សរណៈយោគយល់លើការអនុវត្តកម្មវិធីការប្រមូលផលដំបូង (CBTA)»។
លោក ស៊ុន ចាន់ថុល បានថ្លែងថា ទោះបីជាមានការរីកចម្រើនគួរឲ្យកត់សម្គាល់សម្រេចបាននៅក្នុងការអនុវត្តកិច្ចព្រមព្រៀង CBTA ក៏ដោយ បញ្ហាប្រឈមថ្មីៗបានកើតឡើង ស្របពេលដែលពិភពលោកកំពុងវិវឌ្ឍទៅជាបដិវត្តន៍ឧស្សាហកម្មទី ៤.០ ដែលតម្រូវឲ្យមានការច្នៃប្រឌិត ដើម្បីបង្កើតនូវវិធីសាស្ត្រថ្មីៗក្នុងការលើកកម្ពស់ប្រសិទ្ធភាពកិច្ចព្រមព្រៀង CBTA។
លោកបន្តថា៖ «យើងមិនត្រូវមើលរំលងកិច្ចសហប្រតិបត្តិការ និងគំនិតផ្តួចផ្តើមសេដ្ឋកិច្ចក្នុងតំបន់ និងអនុតំបន់ពង្រឹងសម្ព័ន្ធភាពជាមួយគំនិតផ្តួចផ្តើមផ្លូវមួយខ្សែក្រវាត់មួយ និងសមាគមសេដ្ឋកិច្ចអាស៊ាន កិច្ចសហប្រតិបត្តិការមេគង្គ-ឡានឆាង កិច្ចសហប្រតិបត្តិការមេគង្គ-ជប៉ុន ដែលអាចលើកកម្ពស់ការអភិវឌ្ឍវិស័យដឹកជញ្ជូនប្រកបដោយចីរភាពនៅក្នុងរដ្ឋសមាជិកនៃមហាអនុតំបន់ទន្លេមេគង្គទេ»។
លើសពីនេះទៀតកម្ពុជា និងវៀតណាមបានជួបពិភាក្សាបញ្ហាច្រកទ្វារអន្តរជាតិបាវិត-ម៉ុកបៃ កាលពីថ្ងៃទី ១៩ ខែ ធ្នូ ឆ្នាំ ២០១៩ និងមានជំនួបទ្វេភាគីនៅទីក្រុងហូជីមិញដើម្បីពិភាក្សា និងដោះស្រាយបញ្ហាដឹកជញ្ជូនរវាងប្រទេសទាំង ២។
កម្ពុជាក៏នឹងគ្រោងជួបពិភាក្សាជាមួយសមភាគីថៃដើម្បីពិភាក្សារកដំណោះស្រាយសម្រាប់ប្រតិបត្តិការបណ្តោះអាសន្ននៃច្រកព្រំដែនស្ទឹងបត់ច្រកទ្វារព្រំដែនបានណងអៀនផងដែរ។ នេះបើយោងតាមលោក ស៊ុន ចាន់ថុល។
គួររំឭកថា សម្រាប់ការបង្កើតនៃកិច្ចព្រមព្រៀងមហាអនុតំបន់នេះគឺចាប់ផ្តើមជាកិច្ចព្រមព្រៀងត្រីភាគីក្នុងចំណោមប្រទេស វៀតណាម ឡាវ និងថៃ ក្នុងឆ្នាំ ១៩៩៩ កិច្ចព្រមព្រៀងដែលគាំទ្រដោយធនាគារអភិវឌ្ឍន៍អាស៊ី បន្ទាប់មកត្រូវបានពង្រីកដោយមានការចូលរួមពីកម្ពុជា ចិន និងមីយ៉ាន់ម៉ា៕
